Sapatos nga Pang-Tennis sulod sa Templo
Pagahukman ba ako sa uban sama sa paagi nga ako dili makiangayon nga mihukom sa uban?
Litrato gikan sa Getty Images
Atol sa miting sa pagkapari, akong namatikdan ang usa ka sakop sa korum nga nagsul-ob og maong ug sapatos nga pang-tennis. Naghunahuna ko, “Nganong moanhi man siya sa simbahan sa kaswal nga sinul-oban sa sinina? Nagmasinupakon ba lang kaha siya? Nagpatig-a ba siya sa kasingkasing? Wala ba niya mabati ang Espiritu sa iyang kinabuhi?”
Kon siya tinuoray nga adunay usa ka lig-on nga pagpamatuod, sigurado nga siya mopakita og mas dakong pagtahod alang sa sagrado nga mga miting ug mga dapit.
Usa ka semana ang milabay samtang ang akong asawa ug ako mibisita sa among anak nga babaye, gusto namo nga moadto sa templo uban kaniya. Samtang akong giablihan ang akong maleta, nakalitan ko sa pagdiskobre nga akong nakalimtan ang akong pangdisente nga sapatos! Tungod kay ang among sesyon sa templo magsugod na sa dili madugay, wala na koy panahon sa pagpalit og bag-ong parisan. Busa mihukom ko nga isul-ob ang akong pang-tennis nga sapatos.
Samtang gisul-ob nako ang akong sapatos, nahinumdom dayon ko sa miting sa pagkapari. Ania ko, nag-andam sa pag-adto sa labing sagrado nga mga dapit sa yuta nagsul-ob sa pang-tennis nga sapatos. Naghunahuna ko kon unsa kahay hunahunaon sa uban. Mohukom ba sila nako isip masinupakon ug tig-a og kasingkasing o kulang sa Espiritu o sa usa ka lig-on nga pagpamatuod?
Naulaw ko sa akong kalit-kalit, dili makiangayon nga paghukom sa nangagi. Kinsa man ko aron mosaway sa pagpamatuod sa usa ka tawo tungod sa iyang gisul-ob? Wala koy nahibaloan sa iyang mga kahimtang.
Ang Manluluwas nakatutok sa espiritwal nga paglambo sa tanan nga anak sa Iyang Amahan. Sama sa Iyang gipahinumdom ni Samuel, “Ang Ginoo nagatan-aw dili ingon sa makita sa tawo; kay ang tawo nagatan-aw sa panagway sa gawas, apan ang Ginoo nagatan-aw sa kasingkasing” (1 Samuel 16:7).
Ang sinina sa usa ka tawo, hitsura, kaliwat, o sekso kinahanglang dili mohimo og kalainan. Kitang tanan managsoon. Ang pagkatinuod nga kining igsoon nagsimba mao unta ang sentro sa akong hunahuna.
Kita kinahanglang maningkamot kanunay nga magsul-ob sa atong labing maayo nga sinina kon kita moadto sa simbahan o sa templo.1 Hinoon, kita dili gayod angayg mohukom sa uban sa unsay ilang gisul-ob, tungod kay kita wala masayod sa ilang mga kahimtang.
Tanan niadtong naglibot kanato tinud-anay nga adunay balaanong potensyal. Kita kinahanglan nga mohalad og Kristohanong gugma ngadto sa tanan natong mga kaigsoonan sa bisan unsa pa ang ilang mga panagway, bisan kon sila magsul-ob sa sapatos nga pang-tennis sulod sa templo!