Nagkatigulang nga Matinud-anon
Mga Tumong alang sa Batan-on sa Kasingkasing
Ang tagsulat nagpuyo sa Utah, USA.
Sa dihang nahibaloan nako ang mahitungod sa bag-o nga programa sa Kabataan ug Kabatan-onan, gusto kong mahimong kabahin niini.
Paghulagway sa litrato ug sonar wave nga mga imahe gikan sa Getty Images
Sa dihang gisugdan sa Simbahan ang bag-o nga programa sa Kabataan ug Kabatan-onan, nakadungog ko sa among mga anak ug mga apo nga naghisgot sa ilang mga plano alang sa mga tumong ug mga leksyon. Hapit na ako mag-80, apan gusto kong mahimong kabahin niining talagsaon nga kahigayonan sa pagpalambo sa pagpamatuod.
Ang akong mga anak ug mga apo nagpuyo sa tibuok nasod, mao nga kaming tanan dili mahimong magkita sa personal. Hinoon, nakahukom kami nga magpahigayon og binulan nga online nga miting. Usa sa mga apo mohatag og leksyon ug mangulo og panaghisgotan sa ebanghelyo. Pagkahuman, ang tanan mopaambit sa ilang mga tumong ug sa ilang kalamboan sa pagkab-ot niini. Siyempre, personal ang pipila sa mga tumong, ug gitahod namo ang pagkapribado sa matag tawo.
Samtang nakig-istorya ko sa akong mga apo mahitungod sa ilang mga tumong, nagsugod ko sa paghunahuna mahitungod sa akong kaugalingon nga mga tumong. Unsa man ang gusto nakong makab-ot?
Ania ang lista sa mga tumong nga akong nahunahunaan, nga nagsunod sa mga hilisgotan ug mga sumbanan nga gigamit diha sa programa sa Kabataan ug Kabatan-onan. Ganahan ko nga tawagon kini nga akong mga tumong alang sa batan-on sa kasingkasing.
Intelektwal. Ang among kapangulohan sa Relief Society sa stake mihangyo sa mga sister sa pagsag-ulo sa “Ang Buhi nga Kristo.”1 Taas kini, apan nasayod ako nga makasag-ulo gihapon ako og ingon niana kadaghan nga materyal, ug kini ingon og usa ka bililhon nga tumong.
Espiritwal. Samtang nagserbisyo ko sa templo, usahay ako magbarog sulod sa usa ka oras o labaw pa diha sa hagdanan ug mogiya sa mga patron ngadto sa ilisinan. Ganahan ko nga ipabiling okupado ang akong hunahuna, busa mihukom ako sa pagsag-ulo sa daan nga mga bersikulo sa Kahanas sa Kasulatan sa seminary alang sa Basahon ni Mormon. Sa dihang nanirado ang mga templo atol sa COVID-19 nga pandemya, gipadayon gihapon nako kini nga tumong. Ang pagsag-ulo naghatag sa akong hunahuna og butang nga buhaton ug nakapuno kanako sa Espiritu.
Pisikal. Ang pisikal nga mga tumong sa among mga apo nakabase sa pagsayaw, volleyball, ug surfing, apil sa uban pa. Walay usa niana ang pwede alang kanako, mao nga mipili ako sa paglakaw og pipila ka kilometro sa usa ka adlaw. Nakaplagan nako nga mas abtik ako kon mag-ehersisyo ako. Maayo kini alang sa akong hunahuna ug sa akong lawas.
Sosyal. Ganahan ko nga mangumusta sa akong mga anak ug mga apo. Naandan namo kaniadto nga mag-istorya sa telepono (ug nagpadayon gihapon), apan ang pag-text mao ang bag-ong paagi sa pagpakigsulti karon. Ang mga bata mitudlo kanako kabahin sa mga emoji ug mubo nga gagmay nga mga video.
Pipila sa mga apo naglakip sa pagkat-on og luto isip usa ka tumong. Dihang mibisita sila, nagluto kami og dungan. Alang niadtong kinsa nagpuyo sa layo-layo, mag-video call kami sa usag usa aron sa paghisgot og mga resipe ug magluto og dungan samtang nag-video call.
Ganahan usab ako nga manawag sa mga sister nga akong gipangalagaran. Atol sa panahon sa sosyal nga pagdistansya gumikan sa pandemya, ang pag-istorya sa telepono mao ang usa ka talagsaong paagi sa pagpangumusta. Usahay moadto ako sa ilang mga panimalay ug mobilin og giputos nang daan nga mga pagkaon sa atubangan sa ilang pultahan uban sa usa ka sulat nga nagpahayag sa akong gugma alang kanila.
Paglambo diha sa Ebanghelyo
Dako kaayo nga panalangin ang programa sa Kabataan ug Kabatan-onan alang kanako ug sa akong pamilya atol sa pandemya. Bisan og nag-inusara ra ako sa panimalay kada adlaw, ako adunay mga tumong. Ang mga apo nagpadayon sa pag-ugmad sa ilang mga talento ug paglambo sa ebanghelyo, ug makasuporta ako kanila. Nagpaabot kami sa among online nga mga miting sa pamilya ug sa mga panahon sa pagpaambit.
Ug salamat sa inspirasyon nga miabot samtang nagtabang sa akong mga apo sa pagbuhat sa ilang mga tumong, ang akong focus mas klaro na karon nga nakatakda sa akong mga tumong, sa mubo og tagal [short-term] ug sa mahangturon. Naningkamot ako ug nag-ampo matag adlaw nga “ipatigbabaw ang Dios labaw sa tanan” sa akong kinabuhi ug sa mga kinabuhi sa akong mga sakop sa pamilya.2