Ang Pagdaog sa usa ka Debate
Akong nakat-onan nga ang gugma sa Dios alang kanato wala gibase sa atong pag-eskwela, trabaho, o abilidad nga makadaog sa usa ka debate.
Mga imahe gikan sa Getty Images
Usa ka adlaw samtang ako adunay usa ka init nga diskusyon mahitungod sa politika diha sa internet, ang akong mga opinyon gibiay-biay tungod sa matang sa edukasyon nga akong nadawat sa kolehiyo.
Malingaw ko og maayong debate, apan ang personal nga pag-atake dili makiangayon. Ang mga komentaryo sakit tungod kay kini ingon og makapaduda sa akong personal nga bili. Unsa pay nakapasamot niini mao nga ang tawo kinsa mikomentaryo usa ka miyembro sa Ang Simbahan ni Jesukristo sa mga Santos sa Ulahing mga Adlaw.
Sa pagpamalandong, hinoon, ako misugod sa pagkaamgo nga ako usab mihimo og dili maayo nga personal nga mga komentaryo aron modaog sa usa ka argumento. Nakaamgo ko nga kining matang sa kinaiya komon sa katilingban sa akong palibot.
Akong nakat-onan nga ang kapakyas sa pag-ila sa dignidad sa uban makahimo og kadaot, ilabi na diha sa Simbahan. Si propeta Alma kusganong nagsangyaw batok sa “kasilag, ug panagbangi, ug dautan og tuyo, ug panggukod, ug garbo” diha sa Simbahan (Alma 4:9). Siya nakakita nga ang ingon nga kinaiya “usa ka dako nga babag” sa kauswagan sa Simbahan (tan-awa sa Alma 4:10).
Ang panagbangi nakapahimo nako sa pagpamalandong sa akong bili diha sa panan-aw sa Dios. Sa pagtuon pa og dugang, nakakita ko og usa ka kinutlo ni Elder Dieter F. Uchtdorf sa Korum sa Napulog Duha ka mga Apostoles. Siya mitudlo nga ang Langitnong Amahan “Iya kitang gihigugma tungod kay Siya puno sa walay sukod nga balaan, lunsay ug dili mahulagway nga gugma. Importante kita sa Dios dili tungod sa atong résumé apan tungod kay kita Iyang mga anak.”1
Akong nakat-onan nga ang gugma sa Dios alang kanato wala mag-agad sa atong pag-eskwela, trabaho, o abilidad nga makadaog sa debate. Ang Dios nahigugma kanato sa lunsay, walay kinutuban, ug gawasnon nga paagi tungod kay Siya ang atong Amahan ug kita Iyang mga anak.
Ang pagbati sa hilabihan ka dakong gugma sa Dios nakapahanaw sa akong kasilag. Nakaamgo ko nga samtang OK ra nga dili mouyon sa uban, ang pakiglantugi sa usag usa walay mahimo kon dili kasakit ug kadaot.
Kon si Jesukristo andam nga motugyan sa Iyang kinabuhi, nasayod ko nga makakat-on kita nga motugyan sa atong garbo, motan-aw lapas sa garbo sa kalibotan, ug mohatag og bili sa usag usa sama sa gihimo sa Dios. Sa Iyang mga panan-aw, ang atong pagtratar sa usag usa mas adunay gibug-aton mahitungod kanato kay sa pagdaog sa usa ka debate sa internet.