Pagtukod og Espiritwal ug Temporal nga Dangpanan
Ang tagsulat nagpuyo sa Utah, USA.
Ang pandemya ug may kalabotan nga mga kanihit, mga pagpanira, ug ekonomikanhong kasamok nakapahunahuna sa daghan kanato, Unsaon nako nga mahimong mas andam alang sa umaabot?
Mga paghulagway pinaagi ni David Green
Gitambagan kita sa pagtukod og usa ka dangpanan alang sa atong mga pamilya sa pisikal ug espiritwal nga paagi. Si Elder David A. Bednar sa Korum sa Napulog Duha ka mga Apostoles mitudlo, “Isip mga disipulo sa Manluluwas, kita gisugo nga ‘andama ang matag butang nga kinahanglanon’ [Doktrina ug mga Pakigsaad 88:119; emphasis gidugang].” Siya mitudlo og dugang: “Kita gisaraan usab nga ‘kon kamo andam dili kamo mahadlok’ [Doktrina ug mga Pakigsaad 38:30]. … Ang gibalik-balik nga mga pahimangno sa pagpangandam gipahayag sa mga lider sa Simbahan sulod sa mga dekada.”1
Aron makaandam, makakaplag kita og giya gikan sa Ginoo. Si Presidente Russell M. Nelson mipahayag:
Sulod sa mga dekada, ang mga propeta sa Ginoo miawhag nato sa pagtipig og pagkaon, tubig, ug reserba nga kwarta alang sa panahon sa panginahanglan. … Ako moawhag ninyo sa paghimo og mga lakang nga mahimong andam sa temporal nga paagi. Apan mas nabalaka ako sa inyong espirituhanon ug emosyonal nga pagpangandam.”2
Nasayod kita nga ang kataposang mga adlaw dili alang sa mahuyang og kasingkasing. Ang kalibotan makasinati og mas daghang kasamok, ug ang mga matinud-anon masulayan. Si Presidente Nelson miingon: “Siyempre, makapundo kita og kaugalingon natong mga reserba sa pagkaon, tubig, ug tinigum nga kwarta. Apan sama ka mahinungdanon mao ang atong panginahanglan nga pun-on ang atong personal nga espirituhanong mga tipiganan og hugot nga pagtuo, kamatuoran, ug pagpamatuod.”3
Kini mahinungdanon kaayo nga ang matag usa kanato maandam dili lamang sa temporal ug pisikal nga paagi alang sa unsay moabot apan usab sa espiritwal nga paagi. Kini adunay makasurprisa nga mga pagkapareha sa atong mga pagpangandam.
Tubig ug Buhi nga Tubig
Sa pisikal nga paagi, usa sa atong mahinungdanon nga mga panginahanglan mao ang magkanaa og limpyo nga mainom nga tubig nga gitipigan. Alang sa daghang tawo, ang mga huwaw, hugaw nga mga tinubdan sa tubig, ug ubang mga problema nga may kalabotan sa tubig nakaingon og seryoso nga kabalaka. Kon mahimo, maayo nga adunay usa ka tinubdan sa tubig nga molungtad og dili mominos sa pipila ka adlaw hangtod mabalik ang access sa mainom nga tubig. (Ang mga indibidwal nagkinahanglan og mga upat ka litro kada adlaw alang sa pag-inom ug pagpanglimpyo.)
Sa espiritwal nga paagi, nagkinahanglan usab kita og kanunay nga suplay sa buhi nga tubig gikan sa atong Manluluwas, si Jesukristo (tan-awa sa Juan 4:10). Kini nagsulti nga ang nag-unang mensahe nga gihatag sa atong propeta sa dihang miigo ang pandemya mao ang pagpaminaw Kaniya—ang pagpaminaw ni Jesukristo pinaagi sa Iyang Espiritu ug sa Iyang mga pagtulun-an. Si Presidente Nelson miingon:
“Sa milabayng mga semana, kadaghanan nato nakasinati og pagkabalda sa atong personal nga kinabuhi. Mga linog, mga sunog, mga baha, mga sakit, ug ang mga resulta niini nakabalda sa mga naandan, ug nakaingon sa kakulang sa mga pagkaon, nag-unang mga panginahanglan, ug mga tinigum. …
“Isip mga disipulo ni Jesukristo, ang atong mga paningkamot sa pagpaminaw Kaniya kinahanglan nga mas gitinguha nato. Kinahanglan og tininuod ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtulun-an, sa Iyang mga kamatuoran. …
“Ako mousab sa akong hangyo alang ninyo nga inyong buhaton bisan unsa ang makapadugang sa inyong espirituhanong kapasidad sa pagdawat og personal nga pagpadayag.
“Ang pagbuhat sa ingon makatabang ninyo unsaon sa pagpadayon sa inyong kinabuhi, unsay buhaton sa panahon sa krisis, ug unsaon sa pag-ila ug paglikay sa mga tintasyon ug mga pagpanglimbong sa kaaway.”4
Ang propeta balik-balik nga mihangyo kanato sa pagpalambo sa atong abilidad sa pagdawat og pagpadayag. Importante kaayo alang sa matag usa kanato ang paghimo og lawom nga espiritwal nga paningkamot sa paggamit sa buhi nga tubig kada adlaw aron kita makadungog, makadawat, ug molihok sa personal nga pagpadayag.
Pagkaon ug Espiritwal nga Pag-amuma
Ang pagbaton og igong suplay sa pagkaon importante usab kaayo aron makalahutay sa panahon sa emerhensiya. Bisan kon ang sitwasyon mao ang pagkawala sa trabaho, natural nga mga katalagman, o ubang mga kalisdanan, ang pagtipig og pagkaon makatabang kanato nga makalahutay sa mga pagsulay. Ang mga propeta miawhag kanato sa pagtipig og pagkaon kon kita makahimo. Ang pagsugod og pipila ka semana nga suplay mahimong importante nga unang lakang sa pagpalambo og igong gitipigan nga pagkaon aron sa pagsangkap sa atong mga pamilya sa panahon sa panginahanglan.
Kinahanglan nga maandam usab kita pinaagi sa paghimo sa espiritwal nga pag-amuma nga usa ka bahin sa atong inadlaw-adlaw nga kinabuhi. Si Presidente Nelson mitudlo: “Ang atong kinatas-ang paninguha sa kinabuhi mao ang pag-andam nga mohimamat sa atong Tiglalang. Ato kining buhaton pinaagi sa pagpaningkamot kada adlaw nga mas mahisama sa atong Manluluwas, si Jesukristo. Ug buhaton nato kana samtang maghinulsol kita kada adlaw ug modawat sa Iyang makalimpyo, makaayo, ug makapalig-on nga gahum. Dayon mobati kita og malungtarong kalinaw ug hingpit nga kalipay, bisan atol sa gubot nga mga panahon.”5
Ang sambingay sa napulo ka dalagang birhen klaro nga nagtudlo niini nga baroganan. Si Presidente Dallin H. Oaks, Unang Magtatambag sa Unang Kapangulohan, mipahayag:
“Ang numero nga nalakip niini nga sambingay makahahadlok. Ang napulo ka mga dalagang birhen tataw nga nagrepresentar sa mga miyembro sa Simbahan ni Kristo, kay ang tanan giimbitar man sa kumbira sa kasal ug ang tanan nahibalo sa unsay gikinahanglan aron makasulod inig abut sa pamanhunon. Apan katunga lamang ang andam sa dihang siya miabut. …
“… Sama sa gitudlo sa Basahon ni Mormon “kini nga kinabuhi mao ang panahon alang sa mga tawo sa pagpangandam sa pagsugat sa Dios” (Alma 34:32). … Nangandam ba kita?”6 Dili kita mahimong maghulat hangtod moanhi ang Ginoo sa pag-amuma sa atong mga kaugalingon sa espiritwal nga paagi.
Komunikasyon ug Pag-ampo
Atol sa usa ka krisis, ang komunikasyon importante kaayo nga panginahanglan. Atol sa mga panahon nga walay kuryente o uban pa nga mga kalamidad, ang mga tore sa cell phone dali nga mabug-atan, ug ang abilidad sa pagkomunikar seryoso nga maapektohan. Ang pagbaton og plano sa komunikasyon alang sa mga sakop sa pamilya ug sa ward usa ka importante nga pagpangandam. Unsaon man nato pagkontak ang atong mga sakop sa pamilya kon dili mogana ang atong mga telepono o kon dili nato sila maabtan sa pisikal nga paagi? Ang pagbaton og gikasabotan nga plano makatabang sa mga sakop sa pamilya nga mahibalo kon unsay buhaton aron makakomunikar.
Ang atong Amahan sa Langit miestablisar sa Iyang plano sa komunikasyon pinaagi sa pag-awhag sa kanunay nga pag-ampo. Pagkanindot nga dungog nga makigsulti sa atong Langitnong Amahan bisan kanus-a ug bisan asa nato gusto! “Pagmatinud-anon,” ang Manluluwas nagsulti kanato, “mag-ampo kanunay, nga ang inyong mga lampara maandam ug magsiga, ug ang lana anaa kaninyo, nga kamo andam sa pag-anhi sa Pamanhonon” (Doktrina ug mga Pakigsaad 33:17).
Pinaagi sa atong mga paningkamot nga mag-ampo nga adunay pagkamatinuoron, mahimo kitang komportable nga makig-istorya ug modawat og giya gikan sa atong Amahan sa Langit, ug kana mohatag og importante kaayo nga koneksyon aron sa paggiya kanato ug sa atong mga pamilya sa panahon sa panginahanglan.
Kapasilongan ug Pagbarog sa Balaan nga mga Dapit
Kadaghanan kanato gihangyo sa “pagpasilong sa atong mga nahimutangan” atol sa pandemya. Direkta natong nakat-onan nga ang pagbaton og luwas nga kapasilongan nga adunay igong mga suplay importante kaayo sa pagkahimong andam. Maalamon usab ang pagtinguha og alternatibo nga mga kapasilongan kon ang atong mga panimalay mahimong dili luwas tungod sa natural nga mga katalagman o uban pang mga kahimtang nga nagkinahanglan kanato sa pagbiya.
Sa samang paagi, giawhag kita sa “pagpasilong” diha sa ebanghelyo. Si Presidente Oaks mitudlo: “Nagsunod ba kita sa sugo sa Ginoo, ‘Barug kamo sa balaan nga mga dapit, ug ayaw pagbalhin, hangtud ang adlaw sa Ginoo moabut; kay tan-awa, kini moabut sa labing madali’? (D&P 87:8). Unsa man kanang ‘balaan nga mga dapit’? Sigurado gayud nga naglakip kini sa templo ug matinud-anong paghupot sa mga pakigsaad niini. Sigurado gayud nga naglakip kini sa panimalay diin ang mga anak gimahal ug ang mga ginikanan gitahud. Sigurado gayud nga ang balaan nga mga dapit naglakip sa atong mga katungdanan nga gisangon sa atoa sa mga lider sa priesthood, lakip sa mga misyon ug mga balaang tawag nga matinud-anong gituman.”7
Ang mga miyembro sa Simbahan mibati nga adunay importante kaayo nga nawala sa dihang dili kita makahimo sa pagtigom isip mga kongregasyon o sa pagserbisyo sa templo. Apan nakat-onan usab nato kon unsa ka importante ang pag-establisar sa atong mga panimalay isip balaan nga mga dapit. Ang pagtambong sa mga miting sa Simbahan, pagserbisyo sa templo, ug paghimo sa atong mga panimalay nga mga dalangpan sa hugot nga pagtuo molig-on kanato ug sa atong mga pamilya samtang mangandam kita alang sa Ikaduhang Pag-anhi.
Pasiunang Tabang [First Aid] ug Paghinulsol
Ang maayo nga mga suplay ug mga kahanas sa pasiunang tabang importante aron mahimong andam sa temporal nga paagi. Ang tibuok kalibotan nangita og maayo nga mga mask ug mga suplay sa medikal atol sa pandemya. Ang pagtipig og mga tambal ug mga suplay sa medikal usa ka importante nga bahin sa pagkahimong andam alang sa natural nga mga katalagman ug uban pang mga pagsulay nga moabot.
Sa samang paagi, ang espiritwal nga pasiunang tabang importante. Ang Ginoo mihatag og paagi aron kita mamaayo. Ang paghinulsol nagtanyag kanato og oportunidad sa paghusto sa mga butang sa atong kinaiya ug sa pagpalimpyo kanato pinaagi sa panambal ni Jesukristo ug sa Iyang Pag-ula. Si Elder Hans T. Boom sa Seventy mipahayag, “Ang uban kanato mga samaran, apan ang unang pangtambal sa Ginoo adunay mga bendahe nga igo ang gidak-on aron makatabon sa tanan natong samad.”8
Ang kanunay nga paghinulsol motabang sa paghashas kanato agi og pagpangandam alang sa unsay moabot. Samtang kita makanunayon nga maghinulsol, mahimo kitang mas lig-on, mas maayo, ug mas mahiangay sa Ginoo. Si Presidente Nelson mitudlo:
“Kon si Jesus moingon kaninyo ug kanako sa ‘paghinulsol,’ Siya nagdapit kanato sa pag-usab sa atong hunahuna, sa atong kahibalo, sa atong espiritu. …
“Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag-adlaw nga paghatag og gibug-aton sa paghinulsol. … Kon inubanan sa hugot nga pagtuo, ang paghinulsol moabli sa atong agianan ngadto sa gahum sa Pag-ula ni Jesukristo.”9
Kalig-on sa Pangisip ug Pagpamatuod
Daghang tawo ang nanglimbasog sa kahimsog sa pangisip atol sa pandemya. Kabahin sa atong pagpangandam naglakip sa pagbaton og giestablisar nga mga pamaagi sa pagpasiugda og maayong kahimsog sa pangisip. Daghan kanato ang gisulayan samtang ang mga pagsulay nagdugay ug nagkadaghan paglabay sa panahon. Ang mga lider sa Simbahan miawhag kanato sa paghimo sa kahimsog ug kalig-on sa pangisip nga kabahin sa atong pagpangandam.
Sa espiritwal nga paagi, kinahanglan nga tutokan nato ang pagpalig-on sa atong mga pagpamatuod aron kini makasugakod sa mga pagsulay nga moabot ngadto sa tanan nga matinud-anon. Si Presidente Russell M. Nelson mipahayag: “Ang atong Manluluwas ug Manunubos, si Jesukristo, mohimo sa uban Niyang labing gamhanan nga mga buhat karon ug sa higayon nga Siya mobalik na pag-usab. Makakita kita og milagrusong timailhan nga ang Dios Amahan ug ang Iyang Anak, si Jesukristo, magdumala dinhi sa kalibutan sa kahalangdon ug himaya. Apan sa umaabut nga mga adlaw, dili na posible ang espirituhanong pagsugakod kon wala ang giya, direksyon, makahupay, ug kanunay nga impluwensya sa Espiritu Santo.”10
Sama sa gitudlo sa Manluluwas, ang matag usa kanato kinahanglan gayod nga motukod sa atong espiritwal nga balay diha ibabaw sa bato—nga nagpasabot nga magpuyo sa pagkamasulundon sa Iyang mga pagtulun-an—aron nga kita adunay lig-on nga pundasyon (tan-awa sa 3 Nephi 14:24–25). Kini kinahanglanon aron makasugakod sa espiritwal nga mga pag-atake nga seguradong moabot.
Samtang kita maningkamot sa pag-andam sa atong kaugalingon ug sa kalibotan alang sa Ikaduhang Pag-anhi ni Jesukristo, kinahanglan nga andamon nato ang atong mga pamilya sa temporal nga paagi alang sa unsay gipanagna mahitungod niadto nga mga adlaw. Ang tanang natural nga mga katalagman, mga kagubot sa katilingban, ug politikal nga kaguliyang nagpaabot kanato sama sa gipanagna sa atong mga propeta. Kini nga mga hitabo magkinahanglan og mabinantayong pagpangandam aron sa pagpanalipod sa atong mga kaugalingon ug sa atong mga pamilya sa pisikal nga paagi.
Sa samang paagi, kinahanglan nga atong panalipdan ang atong mga kaugalingon ug ang atong mga pamilya gikan sa mga daotan nga molaglag kanato. Ang pagsalig sa personal nga pagpadayag; paghimo og regular nga mga kinaiya sa espiritwal nga pag-amuma, lakip sa pag-ampo ug paghinulsol; ug ang pagbarog sa balaan nga mga dapit makatabang kanato sa pagpalambo og mga pagpamatuod nga lig-on ug dili matarog.
Dayon kita mahimong seguradong mahupay sa saad sa Ginoo nga kon kita andam—sa temporal ug espiritwal nga paagi—dili kita mahadlok (tan-awa sa Doktrina ug mga Pakigsaad 38:30).