Mga Sukaranan sa Ebanghelyo
Ang Pagkapari Mao ang Gahom sa Dios
Ang Dios mopanalangin kanato pinaagi sa gahom sa pagkapari. Ang mga panalangin sa pagkapari magamit sa tanan.
Ang pagkapari mao ang gahom sa Dios. Siya naggamit niining gahom sa pagpanalangin sa tanan Niyang mga anak ug sa pagtabang kanila nga makabalik sa pagpuyo uban Kaniya. Ang Dios mihatag sa gahom sa pagkapari ngadto sa Iyang mga anak sa yuta. Gamit niining gahom, ang mga lider sa pagkapari makapangulo sa Simbahan, ug ang mga naghupot sa pagkapari makapahigayon og mga ordinansa, sama sa bunyag, nga makatabang kanato nga mas mapaduol ngadto sa Dios. Matag lalaki ug babaye kinsa takos nga makadawat sa mga ordinansa sa pagkapari ug motuman sa mga pakigsaad (sagradong mga saad) adunay access sa gahom sa Dios.
Ang Gahom sa Pagkapari Gihatag ngadto ni Joseph Smith
Sa dihang si Jesukristo anaa pa dinhi sa yuta, Siya nangulo sa Iyang Simbahan gamit ang gahom sa pagkapari. Siya mihatag usab niining gahom ngadto sa Iyang mga Apostoles. Sa mga siglo human sila namatay, daghang mga miyembro ang mibiya sa Simbahan. Giusab nila sa sayop nga paagi ang ebanghelyo ug ang paagi sa pagdumala sa Simbahan. Ang pagkapari sa Dios wala na dinhi sa yuta. Niadtong 1829, si Jesus mipadala ni Juan Bautista ug sa mga Apostoles nga si Pedro, Santiago, ug Juan aron sa paghatag ni Joseph Smith sa pagkapari. Ang Simbahan ni Jesukristo sa mga Santos sa Ulahing mga Adlaw mao ang bugtong organisasyon sa yuta nga aduna niining awtoridad gikan sa Dios.
Mga Yawe sa Pagkapari
Ang mga yawe sa pagkapari mao ang awtoridad nga modirekta sa paggamit sa pagkapari, sama sa paghatag og pagtugot sa pagpahigayon og mga ordinansa. Si Jesukristo naghupot sa tanang mga yawe sa pagkapari. Ang Presidente sa Simbahan mao lang ang bugtong tawo sa yuta kinsa makagamit niining mga yawe sa pagdumala sa tibuok Simbahan. Ubos sa iyang direksyon, ang uban makagamit og piho nga mga yawe aron mahimo ang buhat sa Dios. Ang mga lider sama sa mga bishop ug mga stake president mogamit sa yawe sa pagkapari sa pagpangulo sa ilang mga ward ug mga stake. Tungod kay ang mga calling sa pagserbisyo moabot gikan sa mga lider nga adunay yawe sa pagkapari, ang mga lalaki ug mga babaye kinsa nagserbisyo sa ilang mga calling mogamit sa awtoridad sa pagkapari samtang sila mobuhat sa ilang mga katungdanan.
Ang Melchizedek nga Pagkapari ug Aaronic nga Pagkapari
Ang pagkapari adunay duha ka bahin: ang Melchizedek nga Pagkapari ug ang Aaronic nga Pagkapari. Pinaagi sa Melchizedek nga Pagkapari, ang mga lider sa Simbahan modumala sa tanang espirituhanong buhat sa Simbahan, sama sa misyonaryo nga buhat ug buhat sa templo. Ang Aaronic nga Pagkapari naglihok ubos sa awtoridad sa Melchizedek nga Pagkapari. Kini gigamit sa pagpahigayon sa mga ordinansa sama sa bunyag ug sa sakramento.
Mga Panalangin sa Pagkapari
Pinaagi sa mga pakigsaad ug mga ordinansa, ang Dios mihimo sa mga panalangin sa pagkapari nga magamit sa tanan Niyang mga anak. Kini nga mga panalangin naglakip sa bunyag, gasa sa Espiritu Santo, sa sakramento, ug sa mga ordinansa sa templo. Ang mga lalaki ug babaye kinsa na-endowed sa templo makadawat og gasa sa gahom sa pagkapari sa Dios pinaagi sa ilang mga pakigsaad. Makadawat usab kita og mga panalangin sa pagkapari nga mamaayo, mahupay, ug magiyahan.
Unsa ang Gisulti diha sa mga Kasulatan mahitungod sa Pagkapari?
Ang pagkapari nga anaa sa karaang panahon mao gihapon ang anaa karon (tan-awa sa Moises 6:7).
Ang mga yawe sa pagkapari mosiguro nga kita makatuman sa buhat sa Ginoo diha sa han-ay nga paagi (tan-awa sa Doktrina ug mga Pakigsaad 42:11).
Ang kalalakin-an nga naghupot sa pagkapari makagamit niini “diha lamang sa mga baruganan sa pagkamatarung” (Doktrina ug mga Pakigsaad 121:36).
Pipila ka mga katungdanan niadtong naghupot sa pagkapari gihulagway sa Doktrina ug mga Pakigsaad 20:38–67.