Alang sa mga Ginikanan

Pagtudlo mahitungod sa Pagkapari ug sa Pagkaandam

Minahal nga mga Ginikanan,

Ang mga hilisgotan alang niining bulana naglakip sa pagkapari, kahimsog sa pangisip, ug espiritwal ug temporal nga pagkaandam. Gamita kini nga seksyon aron makakuha og mga ideya kon sa unsang paagi ninyo magamit kini nga isyu aron sa pagtabang kaninyo nga makaila og piho nga mga panglimbasog nga mahimong gisinati sa inyong mga anak ug sa pagtabang kaninyo sa pagtudlo sa ebanghelyo ni Jesukristo sa inyong panimalay.

Mga Panaghisgotan sa Ebanghelyo

Pagkapari

Samtang magtudlo kamo sa inyong mga anak mahitungod sa pagkapari ug sa mga ordinansa sa pagkapari, gamita ang “Mga Sukaranan sa Ebanghelyo” sa pahina 10 agig dugang sa artikulo ni Presidente Dallin H. Oaks sa pahina 6. Hisgoti uban sa inyong mga anak ang kamahinungdanon sa pagkapari ug sa unsang paagi ang Ginoo mopanalangin sa atong mga kinabuhi pinaagi niini.

Kahimsog sa Pangisip

Ang artikulo “Unsaon Nako sa Pagsuporta sa Anak Nga Mibati nga Masulubon [Depressed]?” sa pahina 16 naghisgot mahitungod sa pipila ka paagi nga kamo makaila sa mga sintoma sa depresyon sa inyong anak ug nagsugyot og pipila ka maayong pangsugakod nga mga estratehiya. Gamita kini nga artikulo uban sa mga artikulo sa pahina 12 ug 18 aron sa pagtabang sa inyong mga anak nga makasagubang sa mga hagit sa kahimsog sa pangisip.

Espiritwal ug Temporal nga Dangpanan

Ang artikulo sa pahina 20 makatabang sa inyong pamilya sa pag-ugmad og plano sa pagkaandam sa emerhensiya kon wala pa kamo makabuhat. Mas importante, nagtudlo usab kini og pipila sa mga kapareha alang sa atong espiritwal nga pagkaandam.

Mga Tabang sa Pagtuon sa Dali, Sunod Kanako

Tan-awa sa pahina 26 alang sa mga artikulo aron sa pagsuporta sa inyong pamilya nga pagtuon sa Doktrina ug mga Pakigsaad niini nga bulan.

Kalingawan sa Pamilya sa Dali, Sunod Kanako

Sa taas: litrato gikan sa Getty Images

Han-aya Ninyo ang Inyong mga Kaugalingon

Doktrina ug mga Pakigsaad 88

Ang atong mga panimalay mahimong mosunod niini nga sunbanan: “Han-aya ninyo ang inyong mga kaugalingon; andama ang matag butang nga kinahanglanon; ug pagtukod og usa ka balay, gani usa ka balay sa pag-ampo, usa ka balay sa pagpuasa, usa ka balay sa hugot nga pagtuo, usa ka balay sa pagtulun-an, usa ka balay sa himaya, usa ka balay sa kahusay, usa ka balay sa Dios” (Doktrina ug mga Pakigsaad 88:119).

Ang han-aya nagpasabot sa paghapnig sa mga butang o sa pag-andam sa usa ka kalihokan o panghitabo.

Han-aya ang inyong pamilya sa lain-lain nga mga paagi:

1. Hangyoa sila nga mobarog sa linya gikan sa kamagulangan hangtod sa kamanghoran.

2. Hangyoa sila nga mobarog sa alpabetikal nga pagkahan-ay, sumala sa ilang unang ngalan.

3. Hangyoa sila nga maglinya sumala sa bulan sa ilang pagkatawo.

Panaghisgotan: Sa unsang paagi ang Manluluwas gusto nga kita mohan-ay sa atong mga kaugalingon (1) sa atong mga buluhaton sa panimalay, (2) sa atong espiritwal nga pagtuon, (3) sa atong pagsimba sa simbahan ug sa templo?

Unsa nga mga tumong ang matakda sa inyong pamilya aron sa paghimo og usa ka “balay sa Dios”?

Gisumiter ni Lisa Thomas

Modagan ug Dili Maluya

Doktrina ug mga Pakigsaad 89

Sa Doktrina ug mga Pakigsaad 89, ang Ginoo mihatag og pagpadayag nga gitawag og ang Pulong sa Kaalam.

1. Human mabasa ang seksyon 89, pabaroga ang tanan sa tunga sa usa ka lawak.

2. Idestino ang usa ka bahin sa lawak nga mao ang “maayo” nga bahin ug ang pikas bahin sa lawak nga mao ang “dili maayo” nga bahin.

3. Ipabasa sa usa ka sakop sa pamilya ang mga bersikulo 5–17.

4. Ang ubang mga sakop sa pamilya mobalhin ngadto sa “maayo” o “dili maayo” nga bahin sa lawak, depende sa paghulagway niana nga bersikulo. Ang butang ba maayo alang sa atong mga lawas o dili?

Panaghisgotan: Unsa nga mga saad ang nalakip sa Doktrina ug mga Pakigsaad 89:18–21? Sa unsa nga paagi ang pag-atiman sa atong mga lawas makapalambo sa atong espiritwal nga relasyon sa Ginoo?

Gisumiter ni Mitzi Schoneman

Sa Niini nga Bulan nga Alang sa Kalig-on sa mga Kabatan-onan nga Magasin

Pagtakda og Tumong

Ang inyong tin-edyer ba naglisod sa paghimo ug pagtuman og mga tumong? Sunda ang mga baroganan niini nga artikulo aron sa pagtudlo kanila kon unsaon sa pagbahin-bahin sa ilang mga tumong ngadto sa mga piraso nga makaya ra.

“Mga Sakit sa Pangisip: Unsaon nga Makatabang Ka!”

Niini nga artikulo, tulo ka batan-on mipaambit sa ilang mga panglimbasog sa kabalaka, depresyon, ug mga problema sa pagkaon. Pagkat-on uban sa inyong tin-edyer mahitungod kon unsaon nga mas makatabang ug makasabot niini nga mga indibidwal—ug unsay buhaton kon kamo adunay sakit sa pangisip.

“Ang Batan-ong mga Babaye ug Ang Pagkapari: Unsay Kinahanglan Ninyong Masayran”

Basaha ang mga pulong gikan sa propeta ug ubang mga lider sa Simbahan aron sa pagtudlo sa inyong pamilya mahitungod sa relasyon sa batan-ong mga babaye ngadto sa gahom ug awtoridad sa pagkapari.

Sa Niini nga Bulan nga Higala nga Magasin

“Pag-atiman sa Akong Kaugalingon!”

Gamita kini nga kalihokan aron sa pagtudlo sa inyong mga anak mahitungod sa pag-atiman sa ilang mga kaugalingon pinaagi sa pagsunod sa Pulong sa Kaalam ug sa pag-amuma sa ilang espiritwal ug emosyonal nga kahimsog.

Tabang sa Pagtuon sa Kasulatan

Pangita og pangpamilya nga mga kalihokan alang sa matag semana sa Dali, Sunod Kanako karong bulana.

“Ang Pagkapari ug Ako”

Basaha ang usa ka mensahe mahitungod sa mga panalangin sa pagkapari gikan ni Elder Steven R. Bangerter sa Seventy. Pangita usab og usa ka pahina diha sa seksyon nga Alang sa Mas Magulang nga mga Bata mahitungod kon nganong importante ang pagkapari alang sa mga batang babaye ug mga batang lalaki.

Apil sa Pundok sa Matinabangong mga Kamot [Helping Hands Team]

Basaha ang mahitungod sa usa ka batang lalaki sa Uruguay nga nagtabang sa mga tawo sa iyang komunidad. Dayon buhata ang matinabangong mga kamot nga kalihokan karong bulana!

“Nakadungog Gihapon sa Awit ni Papa”

Nasagmuyo si Leah sa dihang ang iyang higala miingon nga ang iyang papa dili makaadto sa langit tungod kay siya namatay pinaagi sa paghikog. Basaha kining digital-lamang nga istorya aron sa pagtabang kaninyo nga magka-istoryahanay sa inyong anak mahitungod sa paghikog ug kasubo.