Mga Baroganan sa Pagpangalagad
Mangalagad nga Maghunahuna bahin sa Kahimsog sa Pangisip
Mahimo natong ipaambit ang gugma sa Manluluwas niadtong kinsa nagpuyo nga adunay mga hagit sa pangisip ug sa emosyonal nga kahimsog.
Usa ka batan-ong inahan ang nakakaplag sa iyang kaugalingon nga nanglimbasog sa depresyon. Nakigtambayayong siya sa mga doktor aron makaplagan ang sakto nga tambal, apan ang proseso nagkinahanglan og panahon. Dunay usa ka adlaw nga labihang malisod, ug mihimo siya og dinalian nga appointment sa iyang doktor. Midesisyon silang duha nga kinahanglan siyang ipaospital.
Ang mga miyembro sa ward nagtinabangay aron sa pagbisita, pag-atiman sa iyang mga anak, ug paghatag og tabang sa pagkaon. Atol sa mga semana ug mga bulan human niana, ang depresyon sa babaye mihimong lisod sa pagpangayo og tabang, mao nga ang mga miyembro sa ward nakakat-on sa pagpasiugda sa paghatag og suporta.
Sa wala madugay, ang sister miistorya nga ang tabang miabot sa dinasig nga mga higayon, sa dihang kini labing gikinahanglan. Mihisgot siya nga usa sa labing bililhon nga mga butang nga miabot gikan niana nga panahon mao ang pagkasayod nga ang iyang mga kaigsoonan nagpabakabana mahitungod kaniya ug anaa aron sa pagsuporta kaniya. Nabati niya ang gugma sa Manluluwas pinaagi sa serbisyo sa mga miyembro sa iyang ward. Nakat-onan niya sa iyang kaugalingon nga Siya nakaila kaniya ug sa iyang mga panglimbasog ug nga uban sa Iyang tabang siya makalahutay sa iyang mga hagit uban sa hugot nga pagtuo.
Mga Ideya alang sa Pagpangalagad
Komon ang mga problema sa pangisip ug emosyonal nga kahimsog, bisan kon wala gikinahanglan ang dinalian nga pagpaospital alang sa kadaghanan. Kini nga mga hagit lagmit nga makaplagan taliwala sa mga miyembro sa matag ward o branch. Kini makaapekto sa mga tawo sa tanang nasyonalidad ug tanang kahimtang sa kinabuhi.
Samtang kamo mangalagad, lagmit nga makasugat kamo og usa ka tawo nga adunay sosyal o emosyonal nga mga kalisod. Kon makasugat man kamo, palihog hunahunaa ang tambag nga nadawat ni Presidente Henry B. Eyring, Ikaduhang Magtatambag sa Unang Kapangulohan: “Kon ikaw makahimamat og tawo, tagda sila ingon nga sila anaa sa seryuso nga kasamok, ug ikaw sakto labaw sa katunga sa panahon.”1 Ang usa ka problema sa pangisip, sosyal, o emosyonal mahimong usa ka rason kon nganong tingali nanglimbasog ang usa ka tawo.
Ania ang pipila ka ideya kon unsaon sa pagpangalagad:
-
Paminaw aron magkat-on. Tugoti ang tawo sa pagpaambit og ingon ka daghan o gamay nga impormasyon nga siya komportable sa pagsulti. Nagsuporta kamo kaniya pinaagi sa pagpaminaw lamang; mahimong makadawat kamo og pagdasig mahitungod sa mga paagi sa paghatag og kahupayan. (Alang sa dugang nga mga ideya, tan-awa sa “Lima ka Butang nga Buhaton sa Maayong mga Tigpaminaw,” Liahona, Hunyo 2018, 6–9.)
-
Pagpakita og kaluoy. Paningkamoti nga sugdan ug taposon ang matag interaksyon uban sa usa ka kinasingkasing nga pagpahayag sa gugma ug pakabana alang sa tawo. (Alang sa dugang nga mga ideya, tan-awa sa “Motabang Uban sa Kalooy,” Liahona, Hulyo 2018, 6–9.)
-
Paghatag og suporta. Ang pagkaulian gikan sa sosyal ug emosyonal nga mga kalisod dili yano ug dili sayon. Usahay, mahimong gusto niya nga mag-inusara o mahimong mangayo og tabang. Paghatag og suporta sa panahon ug paagi nga madawat sa tawo. (Alang sa dugang nga mga ideya, tan-awa sa “Pagpalambo sa Empatiya [Empathy] aron Mangalagad,” Liahona, Peb. 2019, 8–11)
-
Pakigtambag sa mga lider. Wala kamo mag-inusara. Pagtinguha og suporta gikan sa mga lider ug sa uban. Uban sa pagtugot, ipaambit ang mga panginahanglan sa tawo nga nanglimbasog ug posible nga mga paagi nga ang uban mahimong makaserbisyo. (Alang sa dugang nga mga ideya, tan-awa sa “Pagpangayo og Tabang aron sa Pagtabang sa Uban,” Liahona, Okt. 2018, 6–9.)
Pahinumdom: Kon ang tawo kang kinsa kamo nangalagad usa ka peligro sa kaugalingon o sa uban, mahimong kinahanglanon ang paglambigit sa tukma nga mga awtoridad aron sa pagtabang.