Itok n̄an Kraist im Jab Itok Make Iaam
Wāween eo em̧m̧antata n̄an eok n̄an kōkm̧anm̧anļo̧k laļ in ej n̄an kōpooj laļ in n̄an Kraist ilo ad karuwaineneik aolep n̄an ļoor E.
Raan ko ļo̧k ikar bōk juon leta jān juon jiron̄ eo ekōņaan jeļā aolep men. Ekar je: “Ijitak. … Ijjab lukkuun jeļā wōn n̄a, ak ij en̄jake bwe ij pād ilo laļ in kōn juon jibadbad eļap.”
Kwonan̄in ke kar en̄jake n̄an kappukote, ļōmņak eļan̄n̄e Anij elukkuun jeļā wōn kwe im eļan̄n̄e E ej aikuj eok? Jodikdik in nejū ejitōnbōro, im n̄an aolep, ij kam̧ool bwe uwaak eo ej aeet! Ewōr an Irooj juon karōk n̄an eok. E ekar kōpooj eok n̄an rainin, kiiō, n̄an erom̧ juon kajoor im kipel n̄an em̧m̧an ilo jerbal eo ekajoor An. Kōm̧ij aikuj eok! Ej meļeļein eban ļap eļan̄n̄e ejjab kwe!
Ium̧win jekjek ko rekwojarjar, rikanaan eo ad ejitenbōro, Būreejtōn Russell M. Nelson, ekar kakemeemej eō juon iien kōn m̧ool ko reļam waan me rej pedped n̄an jerbal in eļap im aibojooj.
Ke ikar jijet ilo jea eo ippān ļeo pāleeō, rikanaan eo ad ekar kepaak tok jea eo an n̄an kōm, lukkuun epaake kom̧ro, im kalimjōk eō kōn mej ko mejān rebūlu. Ikar jab lukkuun jeļā eļan̄n̄e buruō ekar jab kajju bōjrak ke ekar kūr e n̄an jerbal āinwōt Būjeetōn eo Eutiej ilo Doulul eo an Jiron̄ ro. Ekar kajjitōk juon kajjitok me ej pād wōt ilo buruōm, “Bonnie, ta men eo eaorōk tata me [jodikdik ro] rej aikuj jeļā?”
Ekar kejōkļo̧kjeņ jidik im ba, “Rej aikuj jeļā wōn er.”
“AEET!” ekar ba, “im rej aikuj jeļā jibadbad eo aer.”
Kadkad Ko Ad ReKwojarjar
Kwoj juon ajri aorōk im jitōnbōro nejin Jemedwōj Ilan̄. Iakwe eo An n̄an kōj ewāppen jon̄an Ekar jilkintok eo Nejin, Jisōs Kraist, n̄an mej kōn kwe im n̄a.1 Iakwe eo an Rilo̧mo̧o̧r n̄an eok ejjab likjab—em̧ool n̄e jejjab likjab! Ejjeļo̧k men emaron̄ kōjparok kōj jān iakwe eo an Anij.2 Keememej iakwe in emaron̄ bōk liktak eok jān poktak ko an laļ in me rej kajjieon̄ kōm̧ōjņoik lōke eo am̧ ilo kadkad eo am̧ ekwojarjar im kapiloik eok jān am̧ jeļā lukkuun wōn kwe.
Ilo juon kweilo̧k N̄an Kōkajoorļo̧k Jodikdik ro, ikar ioone jiron̄ ro rekar ioon apan̄. Kajjojo iaer rekar ba kōn aer oktakļo̧k n̄an petriak kōjeraam̧m̧an ko aer kajjojo n̄an bar lo iakwe eo an Irooj im tōl n̄an mour ko aer kajjojo. Kappukot petriak kōjeraam̧m̧an eo am̧, joļo̧k būn̄aļ n̄e kwoj aikuj, ak en emakijkij kate kake. Eļan̄n̄e ejjeļo̧k juon am̧ petriak kōjeraam̧m̧an, bōk juon—en jab to. Jab karūm̧ūjļo̧k n̄an kappukot ta eo Irooj ej kōņaan ba n̄an eok kiiō kōn wōn kwe.
Jibadbad Indeeo eo Ad
Mool eo kein karuo kar kōnono kake an Būreejtōn Nelson n̄an kōj ej n̄an jeļā jibadbad eo ad. En̄in ej eddo eo ad eļap im em̧m̧an.
Elōn̄ iiō ko remootļo̧k, ļaddik eo nejū Tanner kar ļalem wōt an iiō ke ekar jino ikkure jekad. Ekar lukkuun m̧ōņōņō!
Ke ekar itaakļo̧k jikin ikkure eo, jekar kile bwe tiim eo an rekar kōjerbal m̧ool in jakkad goal ko—ejjab bajjōk goal ak kar juon o̧o̧k kileplep me ekar lukkuun kilep n̄an juon ļaddik jidikdik eo me ļalem an iiō.
Ke ikkure eo ekar jinoe, ikar bwilōn̄ ke ij lo an Tanner kar ikkure āinwōt juon goalie. Iaar lukkuun bwilōn̄. Ekar ke lukkuun jeļā jibadbad eo an ilo an lale o̧o̧k ak net eo?
Ej jan̄ wijōļ eo, im ekar mootļo̧k am im alooje jon̄an jemeļo̧kļo̧k kōn Tanner. Ejjab to bo̧o̧l eo epād ippān tiim eo juon im rekar kajju juuj bo̧o̧l eo n̄an e. Ikar kalimjōk ijo Tanner ej pād ie im lale n̄e ekar pojak in jutak ilo ijo im lale goal eo. Ikar lo juon men ikar jab kōtmene.
Juon iien ilo iien ikkure eo, Tanner ekar jino m̧ad im jino an karumļo̧k pein tuanmiin̄ im lukwōje ilo ron̄ ko ilo o̧o̧k eo. Innem ekar kōm̧m̧an ejja menin wōt n̄an pā eo juon tuanm̧oon. Āliktata, ne eo tuanmiin̄. Āliktata, ne eo tuanm̧oon. Tanner ekar lukkuun lokjak ilo o̧o̧k eo. Em̧ōj an meļo̧kļo̧k jibadbad eo an im ta eo eto aer kar lōke n̄an kōm̧m̧ane.
Ilo an kar jab to an Tanner kōm̧m̧ane ilo ikkure jekad eo, katak eo ikar ekkatak jāne raan eo ijamin meļo̧kļo̧k e. Ekkā ad aolep m̧ad im leļo̧k ad jān ad jeļā etke jej pād ijin im leļo̧k ad kajoor n̄an aolep jikin. Juon iaan kein tariņae ko an Setan rekajoor ej n̄an kam̧ad kōj kōn jerbal ko rem̧m̧an im rem̧m̧anļo̧k, ilo iien aikuj, emaron̄ kabiloik im lukwōj kōj jān jerbal eo em̧m̧an tata—lukkun jerbal eo kar kūr kōj n̄ane unin ad itok n̄an laļ in.3
Jibadbad eo ad indeeo ej n̄an itok n̄an Kraist im m̧ōņōņō ilo aer kobaļo̧k Ippān ilo jerbal in An eļap. Pidodo in wōt ad kōm̧m̧ane ta eo Būreejtōn Nelson ekar katakin: “Jabdewōt iien jej kōm̧m̧ane jabdewōt men ko me rej jipan̄ jabdewōt armej … kōm̧m̧an im kōjparok bujen ko aer ippān Anij “jej jipan̄ aiintok Israel.”4 Im n̄e jej kōm̧m̧an jerbal in An ippān doon Ippān, jenej jeļā E im iakwe E eļapļo̧k.
Innem jej wōnm̧aanļo̧k wōt n̄an kepaak kōj n̄an E kōn tōmak, ukweļo̧k eo jej kaorōke, im kōjparok kien ko. Ilo ad liāp e kōj make n̄an E kōn bujen im kain̄i ko, jej kobrak mour ko ad kōn eļap lōke,5 kōjparok,6 im lan̄lōn̄ em̧wūlaļ im ejjeļo̧k jem̧ļo̧kin.7
Ilo ad itok n̄an E, jej kalimjōk ro jet kōn mej ko Mejān.8 Itok n̄an Kraist. Itok kiiō, ak jab itok make iaam̧!9
Gospel eo an Jisōs Kraist ejjab em̧m̧an wōt; emenin aikuj n̄an aolep. “Ejjeļo̧k bar juon iaļ ak wāween eo [jemaron̄] bōk lo̧mo̧o̧r, ijello̧kun wōt ilo im kōn Kraist.”10 Jej aikuji Jisōs Kraist! Laļ in ej aikuji Jisōs Kraist.11
Keememej, wāween eo em̧m̧antata n̄an eok n̄an kōkm̧anm̧anļo̧k laļ in ej n̄an kōpooj laļ in n̄an Kraist ilo ad ļoor E.
Ewōr juon bwebwenato ekajoor ilo Bok in Mormon me ej kōnono kōn Kraist ālkin an kar jerkakpeje ekar joļo̧k iien ko an ippān Rinipai ro. Kwomaron̄ ke pijaikļo̧k ta eo enaaj kar āinwōt?
Āinwōt Kraist ekar ba bwe E enaaj bar jepļaak n̄an ippān Jemān, “eaar bōk mejān ipeļaakin ijo bar juon alen.”12 Lo dānin kōmjaļaaļ ilo mejān armej, E ekar jeļā bwe buruōer rekar jan̄nuwaad kōn E bwe En pād wōt.
Ekar kajjitōk: “Ewōr ke ami jabdewōt rinan̄inmej ilubwiljimi? Kom̧in bōktok er ije. Ewōr ke ami jabdewōt riakā, ak ripilo, … ak ro rejarron̄ron̄, ak ro rej m̧ōjņo̧ ilo jabdewōt wāween otemjeļo̧k? Kom̧in bōktok er ije im Inaaj kōmour er.”13
An ļap tūriam̧o Ippān, E ekar jab kōm̧m̧an jon̄an im kūr n̄an aolep “ro rej m̧ōjņo̧ ilo jabdewōt wāween otemjeļo̧k.” Elukkuun em̧m̧an ippa ilo an ejjeļo̧k juon men ekilep im edik n̄an Jisōs Kraist n̄an kōmouri.
E ejeļā kōn en̄taan im apan̄ ko barāinwōt im ej kūr n̄an bōktok ro rej mijak, inepata, pere, utiej bōro im jab lōke, rijameļeļe, riajimakeke, ak ro me rej “m̧ōjņo̧ ilo jabdewōt wāween otemjeļo̧k.”
Im aolep “im Eaar kōmour er … ; otemjej ke raar bōk m̧aanļo̧k er n̄an E. …
“… Jim̧or er ro kar kōmour er im ro raar mour, bukwelōlō ineen, im raar kabun̄-jar n̄an E.”14
Aolep iien ij riiti menin, ij kajjitōk ippa make: Wōn eo imaron̄ bōktok n̄an Kraist? Wōn eo kwonaaj bōktok?
Jemaron̄ ke bar lale ipeļaakin ijo bar juon alen, āinwōt an Jisōs kar kōm̧m̧ane, n̄an lukkuun lale bwe ejjeļo̧k juon ej jo̧o̧l im karuwaineneik kajjojo n̄an itok im jeļā E?
Ikōņaan kwaļo̧k juon waanjon̄ak ilo raan kein kōn wāween an maron̄ ļam waan. Eo m̧ōtta Peyton 15 an iiō ekar wōr juon an kōttōpar n̄an riiti eoon ko ļalem ilo iien m̧abun̄ kajjojo raan, ak ekar jab kōm̧m̧ane make iaan. Aō bar pijaikļo̧k, Peyton ekar kajjitōk ippān ro jinen im jemān im ro jein im jatin, im bar ļaddik jidikdik eo jatin ļalem an iiō. Menin`emaron̄ dik ilo kalimjōke ak ej ta eo Kraist ej katakin ke Ej kūr, “Kom̧in bōktok er ije.”
Kūr in jān Irooj ej wōnm̧aanļo̧k wōt n̄an rainin. Jiron̄ ro im likao ro, rej jino kiiō, ilo m̧weo m̧ōm̧ make. Kwonaaj ke jar im kajjitōk ippān Jemedwōj Ilan̄ wāween am̧ maron̄ rie jiņōm̧ im jem̧am̧ ilo aer wōnm̧aanļo̧k wōt n̄an itok n̄an Kraist? Rej aikuj eok āinwōt am̧ aikuji er.
Innem bar kalimjōk ro jeim im jatūm̧, ro m̧ōttan, im ro rūtūrūm̧. Wōn eo kwonaaj bōktok n̄an Kraist?
Ad Rilo̧mo̧o̧r ekar kwaļo̧k, “Lo N̄a meram eo; Iaar kwaļo̧k jon̄ok eo n̄an kom̧.”15 Jenaaj en̄jake iakwe eo An im An aenōm̧m̧an eļan̄n̄e jenaaj itok n̄an E ilo ad lo̧mo̧o̧ren baam̧le eo an Anij, bwe E ekar kallim̧ur, “Eo ej ļoor Eō e jamin etal ilo marok, a enaaj an meram in mour.”16
Ej juon iien eo eaibojooj n̄an bōk koņaad ilo jerbal in an Kraist!
Aaet, kom̧ij pād ilo laļ in kōn juon jibadbad eļap. Ij kobaļo̧k ippān Būreejtōn Nelson, eo ekar ba: “Irooj ej aikuji kom̧ n̄an ukōt laļ in. Ilo ami bōk im ļoor Ankilan n̄an kom̧, kom̧ naaj lo kom̧ make ami kadedeļo̧k men ko reppen!”17
Ij kam̧ool ilo ejjeļo̧k idadik bwe Irooj ejeļā wōn kwe im Ej iakwe eok! Ippān doon, jenaaj kōwōnm̧aanļo̧k jibadbad eo An m̧ae raan eo Eļap n̄e Kraist make ej jepļaak n̄an laļin im kūr kajjojo iaad n̄an itok n̄an Ippān “ije.” Jenaaj lan̄lōn̄ ilo ad koba ippān doon, bwe kōj ro me jej itok n̄an Kraist, im jejjab itok make iaad. Ilo etan Jisōs Kraist, amen.