“Kwoj Iakwe Eō Eļapļo̧k Jān Rein Ke?”
Ta men ko komaron̄ kōm̧m̧ani ilo mour eo am make n̄an kwaļo̧k ke kwōj iakwe Irooj m̧okta?
Ilo Nobōm̧ba 2019 eo, eo m̧ōtta im na komro kar loļo̧k Āne Kwojarjar. Ke pād ijo, jekar etale im ekkatak jeje ko rekwojarjar kōn mour eo an Jisōs Kraist. Juon jibbon̄ kom̧ro ekar jutak ilo ean̄ ļo̧k in barijet eo an Lojet eo an Galilee juon jikin eo me emaron̄ kar ijo Jisōs kar ioone rikaloor ro An m̧okta jān jerkakpeje eo An.
Ālikin jerkakpeje eo Kraist, ilo ad riiti ilo Jon jebta 21, Piter im rikaloor ro jet rekar eņōd aolepen bon eo ak ejeļo̧k tōprak.1 Ke ej jibbon̄, rekar loe juon em̧m̧aan ej jutak ilo barijet eo ekar jiron̄ er n̄an joļo̧k ok eo aer iturejet eo juon in wa eo. Ilo aer būlon̄, ok eo aer ekar kabūlon̄lon̄ an obrak.2
Rekar kaju jelā ke em̧m̧aan in ej Irooj, im rekar ekairir n̄an aer iakwe E.
Ilo aer kanōkeļo̧k ok eo aer n̄an ibarijet, obrak kōn ek, Jisōs ekar ba, “Itok im m̧ōn̄ā.”3 Jon ekar ba bwe “Innām ke emōj aer m̧ōn̄ā, Jisōs e ba n̄an Saimōn Piter, Saimōn, nejin Jonas, kwōj iakwe eō eļap jān rein ke?”4
Ke ikar jutak ilo ejja barijet in, ikar loe bwe kajjitōk eo an Rilo̧moor eo ekar juon iaan kajjitōk ko raorōk Enkar kajjitōk ippa juon raan. Ij ron̄ Anikien an kajjitōk, “Russell, kwōj ke iakwe eō eļap jān rein ke?”
Kwōj ke kōlmenļo̧kjen kōn ta eo Jisōs ej ekōnono kake ke Ekar kajjitōk ippān Piter, “Kwōj iakwe eō eļapļo̧k jān rein?”
Keidi kajjitōk in n̄an kōj make ilo raan kein, Irooj emaron̄ kar kajjitōk ipped kōn ewi jon̄an an poub im jete iaan men ko rem̧m̧an im renana rej jelet kōj n̄an ad reiļo̧k n̄an im leļo̧k ad iien. Emaron̄ kajjitōk ipped kajjojo elan̄e jej iakwe E eļapļo̧k jān men ko an laļin. Menin in emaron juon kajjitōk kōn ta eo aorōk tata ipped ilo mour in, wōn ro rej loore, im elmen ad lale jemjera eo ad ippān baamle ro ad im ro rutūrid. Ak E maron̄ kajjitōk ta eo ej lukkun boktok lan̄lon̄ im m̧ōņōņō n̄an kōj.
Men ko an laļin ej ke boktok n̄an kōj lan̄lon̄, m̧ōņōņō, āeņom̧m̧an me Rilo̧moor eo ekar leļo̧k n̄an rikaloor ro An im bwe Ej letok n̄an kōj? E wōt emaron̄ boktok lan̄lon̄ eo em̧ool, m̧ōņōņō, āeņom̧m̧an ilo ad iakwe E im loore katak ko An.
Elmen aō nej uwaak e kajjitōk in “Kwōj iakwe eō eļapļo̧k jān rein ke?”
N̄e jenaaj lukkun loe melele in kajjitōk in, jemaron̄ erom ro uwaan baamle eo, ro ritūrid, membōr in Kabun̄, im laddrik im leddrik ro nejin Anij rem̧m̧anļo̧k.
Ilo iiō in aō, ikar pād ilo elōn̄ ilomej ko. Ijeļa elon̄ iaami rej loe ta eo ij barāinwōt loe. N̄e jej m̧ōņōņō kōn mour eo an juon iaan baamle ko ad ejako ak juon m̧ōttad, ekkā an jab rikōnono eo kōnaan kon ewi kilep in m̧weo im̧ōn armej eo, jete waan wa, ak jete kobban akawun eo an ilo bāān̄. Rej jab ekōnono kōn ta ko ilo social media. Ilo enan̄in aolep ilomej ko ikar ped ie, rej pedped wōt ioon jemjera eo an armej eo emej, an kar jerbal n̄an ro jet, ekatak ko an ilo mour in im en̄jake ko an, im iakwe eo aer n̄an Jisōs Kraist.
Jab bōk meļeļein in ilo bōd. Ijjab ba bwe enana ne em̧m̧an juon em̧ ak em̧m̧an juon wa ak bwe kōjerbale social media enana. Ta eo ij ba bwe ilo āliktata, men kein ejjab lukkun wōr tokjeer jān iakwe eo ad n̄an Rilo̧moor eo.
N̄e jej iakwe im loor E, ewōr ad tōmak ilo E. Jej ukweļo̧k. Jej loore waanjon̄ak eo An im peptaij im bōk Jetōb Kwojarjar. Jej niknik n̄an jemļo̧kin im ped wōt ilo ialin bujen eo. Jej jeorļo̧k an baamle ko aer bwōd im ro rūtūrid ilo ad joļo̧ki inepata ko jemaron̄ dāpiji. Jej kajeon niknik n̄an kōjpārok kien ko an Anij. Jej kakkōt n̄an pokake. Jej kōm̧m̧an im kōjparok bujen ko. Jej pokake jined im jemed. Jej leliktak men ko rejjab em̧m̧an an laļin. Jej kōpooje kōj make n̄an Itok eo An kein Karuo.
Ilo “Kraist Eo Emour: Naan in Kam̧ool eo an Rijilōk ro”: jej riit: “[Jisōs] enaaj bar rooltok n̄an laļin juon raan. … Enaaj peek Kiin io̧o̧n Kiin ro im Irooj ioon Irooj ro, im aolep buken ņe renaaj bun̄badikdik im aolep lo renaaj ekōnono kabun̄-jar n̄an E. Kōj kajjojo naaj jutak n̄an ekajet ilo E ekkar n̄an jerbal ko ad im ikdeleel ko an būruwōd.”5
Āinwōt juon iaan Rijiļo̧k ro rekar jaini “Kraist eo Emour” peba eo, imaron̄ ba bwe ilo aō jelā bwe Jisōs “ej meram eo, mour eo, im kōjatdikdik eo an laļ in”6 ej letok n̄an n̄a eļaļo̧k ikdeleel n̄an iakwe E eļapļo̧k kajjojo raan.
Ij kam̧ool bwe Jemedwōj Ilan̄ im Jisōs Kraist rej mour. Ij kam̧ool bwe Rej iakwe kōj. Jeje ko rekwojarjar rej katakin bwe “Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.”7 Jeje ko rekwojarjar rej barāinwōt katakin bwe Jisōs “bwe jon̄an An iakwe laļ eaar ajeļo̧k mour eo An make, bwe jon̄an wōt eo enaaj kar lōke emaron̄ erom m̧aan ro nejin Anij.”8
Jemedwōj Ilan̄ lukkun eo jon̄an an iakwe kōj Ekar kōpooj karōk in lo̧moor eo An ippān Rilo̧moor eo bwe en io̧lapļap in. Im Jisōs ekar lukkuun iakwe kōj jon̄an ilo Ko̧o̧njeļ eo eļap ilo Lan̄, Ke Jemedwōj Ilan̄ ekar kajjitōk, “Wōn I naaj jilkinļo̧k?” Jisōs, eo rittotata iaan aolep ajri in jetōb nejin Jemen, ekar uwaak, “N̄a e, jilkinļo̧k eō.”9 Ekar ba n̄an Jemen, “Jema, Ankilam en kōm̧m̧an, im eaiboojoj eo en Am̧ indeeo.”10 Jisōs ekar make kōnaan bwe en ad Rilo̧moor im Ripinmuur bwe jān maron̄ āinwōt Er im rool n̄an Imaaner.
Jeje kein rekwojarjar ruo rej barāinwōt katakin bwe n̄an maron̄ jeplaak n̄an Imaaner jej iakuj tōmak. Jej aikuj tōmak ilo Jisōs im karōk in m̧ōņōņō eo an Anij. N̄an tōmak ej n̄an iakwe im loore Rilo̧moor eo ad im kōjpārok kien ko, menn̄e ilo io̧lap in melijon̄ im aitwerōk.
Laļin rainin ebōk. Ewōr kallulu ko, jab errā, liaajlo̧l, im kabo ko.
Būreejtōn Dallin H. Oaks, ej kōnono ilo 2017, jeje āinwōt in: “Iien ko kein rapan̄, obrak kōn eļap inepata ko: tarinae im ekeroro bajjōk ko kōn tarinae, n̄aninmej in mejin ko, mōrā, ibwijleplep, im oktak in mejatoto.”11
Ej jab aikuj jako iakwe eo ad n̄an im kōjatdikdik ilo Jisōs, menn̄e jej iooni apan̄ ko reļap. Jemedwōj Ilan̄ im Jisōs Kraist reban meļo̧kļo̧k kōj. Rej iakwe kōj.
Oktoba eo ļo̧k, Būreejtōn Russell M. Nelson ekar katakin kōj aorōk in likūt Jemedwōj Ilan̄ im Jisōs Kraist m̧oktata ilo mour ko ad. Būreejtōn Nelson ekar katakin kōj bwe juon melelein naan in Israel ej n̄an kōtļo̧k bwe “Anij en Anjo̧.”12
Būreejtōn Nelson ekar kajitōk: “Kwoj ke kōņaan bwe Anij en anjo̧ ilo mour eo am̧? Kwoj ke kōņaan bwe kajoor eo an Anij en im̧we mour eo am̧? Kwon ke kōtļo̧k naan ko An, kien ko An, im bujen ko An n̄an im̧we ta eo kwoj kōm̧m̧ane kajjojo raan? Kwon ke kōtļo̧k Ainikien bwe en m̧oktata ioon jen ko jet jabdewōt? Kwoj ke kōņaan bwe jabdewōt men eo Ej kōņaan bwe kwon kōm̧m̧an en aorōk ļo̧k jen ko jet? Kwoj ke kōņaan bwe ankilaam en oran̄ļo̧k ankilaan?13
Jej aikuj keememej m̧ool in m̧ōņōņō eo ad ej pedped ioon jemjera eo ad ippān Anij, ippān Jisōs Kraist, im ippān doon.
Juon wāween n̄an kwaļo̧k iakwe eo ad ej ilo ad kobaļo̧k ippān baamle, m̧ōttad, im ro tūrid n̄an kōm̧m̧an men ko redik n̄an em̧m̧anļo̧k ad jerbal n̄an doon. Kōm̧m̧ani men ko rekōm̧m̧an bwe laļin en juon jikin em̧m̧anļo̧k.
Ta men ko komaron̄ kōm̧m̧ani ilo mour eo am make n̄an kwaļo̧k ke kwōj iakwe Irooj m̧okta?
Ilo ad pedped ioon iakwe ro ritūrid āinwōt An iakwe er, jej jinoe lukkuun iakwe ro ipelaakid.14
Ij bar kajjitōk, elmen am nej uwaak e kajjitōk eo an Rilo̧moor “Kwōj iakwe eō eļapļo̧k jān rein ke?”
Ilo am lōmn̄ak e kajjitōk in, āinwōt aō kar, ij jar bwe kwonej uwaak āinwōt Piter ekar jem̧aanļo̧k, “Aaet, Irooj; Kwō jeḷā Ij yokwe Eok”15 innem kwaļo̧ke ilo am iakwe im jerbal n̄an Anij im ro ipelaakim.
Ij kam̧ool bwe jejeram̧m̧an bwe gospel eo an Jisōs Kraist emaron̄ tōl kōj ilo wāween ad mour im kōm̧m̧an n̄an doon. Ilo E, jej loe bwe aolep leddik im ļaddik ro nejin Anij relukkuun aorōk Ippān.
Ij kam̧ool bwe Jisōs Kraist ej ad Rilo̧mo̧o̧r ejitōnboro. E ej Make Wōt Nejin Anij. Im kwaļo̧k aō naan in kam̧ool ilo ettā ilo etan Jisōs Kraist, amen.