Kalimjōk m̧aaninļo̧k Iaļ eo
Mijeļo̧k wōt men ko me raorōktata—eļaptata men ko “im̧aaninļo̧k iaļ eo,” men ko an indeeo—ej juon kii n̄an kōjebwebwe ilo mour in.
Ke ikar tōpar 15 iiō detta, ikar bōke peba in mālim in ettōr eo, im kar kōmālim aō kattōrre juon wa eo n̄e juon iaan jinō ak jema rej pād ippa. Ke jema ekar kajjitōk eļan̄n̄e ikar kōņaan etal im kattōr, ikar lukkuun m̧ōņōņō.
Ekar ettōr jejjo m̧ail ettoļo̧k jān town n̄an juon iaļ aitok, ejim̧we, im ruo ļain in ettōr ie me jejjo wōt armej rej kōjerbale—ekar alikkar bwe ede eo jikin enkar lo kōjparok ie. Ekar bōjrakļo̧k itōrerein iaļ eo, im kom̧ro ekar jānij jeia. Ekar katakin n̄a jejjo wāween ko innem ba n̄an eō, “Kadikdik am̧ jearwaj n̄an ioon iaļ ņe im kattōr m̧ae iien eo inaaj ba kwon bōjrak.”
Ikar ļoor naan in kappe ko an ilo tu jejjōt. Ak ālikin wōt 60 jekōn ko, ekar ba, “Nejū, jeer waj im kabōjrak wa in. Kwoj kōm̧m̧an menin aō m̧ōļan̄ļōn̄. Kolukkuun ejeerer ilo aolepān iaļ eo.” Ekar kajjitōk, “Ta ņe kwoj kalimjōke?”
Kōn jidik en̄jaake in kūtōtō, ikar ba, “N̄aij kalimjōk iaļ eo.”
Innem ekar ba menin: “N̄aij lale mejom̧, im kwoj kalimjōkļo̧k wōt ta eo im̧aan in bōran wa in. Eļan̄n̄e kwonaaj wōt lale ta eo ej jitōn̄waj eok im̧aan, kojjāmin naaj ettōr jim̧we.” Ekar lukkuun kalikkar tok, “Kalimjōk m̧aaninļo̧k iaļ eo. Men eo enaaj jipan̄ eok ettōr jim̧we.”
Āinwōt juon eo 15 iiō dettan, ikar ļōmņak men eo ekar juon katak em̧m̧an n̄an kilen kattōr. Jān iien eo ikar kile bwe ekar barāinwōt juōn katak em̧m̧an n̄an mour in. Mijeļo̧k wōt men ko me raorōktata—eļaptata men ko “im̧aaninļo̧k iaļ eo,” men ko an indeeo—ej juon kii n̄an kōjebwebwe ilo mour in.
Ilo juon iien ilo mour eo an Rilo̧mo̧o̧r, Ekar kōņaan makeļo̧k iaan, kōn menin “Ej make lōñḷọk ñan toḷ bwe En jar.”1 Ekar jilkinļo̧k rikaļoor ro an kōn jekjek ko in kijoon lom̧aļo̧ eo. Ilo ibwilōn marok in bon̄in eo, wa eo me ekar bōke rikaļoor ro ekar ioon juon ļan̄ ekamijak. Jisōs ekar lo̧mo̧o̧ren er ilo juon wāween ejenolo̧k. Bwebwenato eo ilo jeje ko rekwojarjar āindein riiti “Im ilo iien waj kein ka emān ilo bon̄, Jisōs ej itok n̄an ippāer, im etal ioon lọjet.”2 Ke rekar lo E, rekar jinoe leln̄o̧n̄, bwe raar ļōmņak bwe annan̄ eo ej kepaakļo̧k er ekar juon mejatoto ak tim̧ōņ. Jisōs, ke ej en̄jake aer leln̄o̧n̄ im kōņaan kaenōm̧m̧an ļōmņak ko aer im būruweer, ekar kūr er, “Koṃwin peran; N̄a E; koṃwin jab abwinmake.”3
Pita ekar jab wōt jako an mijak ak ekar barāinwōt bōk peran. Peran iien otemjej im emakijkij an im ilo an m̧akūtkūt, Pita ekar ikkūr ļo̧k n̄an Jisōs, “Irooj, eļan̄n̄e Kwe ṇe, Kwōn jiron̄ eō bwe in iwōj n̄an Ippaṃ ioon lọjet.”4 Jisōs ekar ikkūrļo̧k kōn kūr eo allikar im ejjāmin oktak : “Itok.”5
Pita, ilo an iruj kōn elmo̧kot eo, ekar to jān wa eo ejjab n̄an ium̧win dān ak n̄an ioon dān. Ke ekar mijeļo̧k wōt Rilo̧mo̧o̧r, ekar maron̄ kōm̧m̧ane men ko ejjab maron̄ kar kōm̧m̧ane, em̧ool etetal ioon dān. M̧okta, Pita ekar kōjekdoon ļan̄ eo. Ak āļiktata “kōto” eo6 ekar kapok e, im ekar jako an reim̧aanļo̧k wōt. Mijak eo an ekar bar ro̧o̧ltok. Kōn menin, tōmak eo an ekar jakoļo̧k, im ekar jino an tūmlaļļo̧k. “E laṃōj im ba, Irooj Kwōn lọmọọren eō.”7 Rilo̧mo̧o̧r, eo iien otemjej ej kijooror n̄an kōjparok, ear leļo̧k pein im ļōn̄aj e jān jorāān.
Elōn̄ im lōn̄ katak ko n̄an ekkatak jān bwebwenato in ekabwilōn̄lōn̄, bōtaab inaaj kwaļo̧k wōt jilu.
Mijeļo̧k wōt Jisōs Kraist
Katak eo m̧okta: mijeļo̧k wōt Jisōs Kraist. Ke Pita ekar dābij an mejen mijeļo̧k wōt Jisōs, emaron̄ kar etetal ioon dān. Ļan̄ eo, ņo ko, im kōto ko rekar jab maron̄ kapan̄ e toon wōt an kar kōm̧m̧an bwe an mijeļo̧k Rilo̧mo̧o̧r ekar men eo eaorōktata.
Meļeļe kōn kadkad eo ad em̧ool ej jipan̄ kōj kālet ta eo jej aikuj mijeļo̧k wōt. Jejjab maron̄ tōprak ilo ad ikkure juon ikkure eļan̄n̄e jejaje ta kōttōpar eo, barāinwōt jejjab maron̄ mour juon mour eļap meļeļein n̄e jejaje ta unin. Juon iaan kōjeraam̧m̧an ko in jepļaaktok eo an gospel in an Jisōs Kraist ej bwe ej uwaak, ilōn̄inļo̧k men ko jet, kajjitōk eo “Ta un eo unin mour in?” “Unin ad mour ilo mour in ej n̄an bōk lan̄lōn̄ im m̧aanjapopo n̄an jepļaak n̄an im̧aan Mejān Anij.”8 Keememej bwe jej pād ioon laļ in n̄an m̧aanjapopo n̄an jepļaak im mour ippān Anij ejipan̄ kōj mijeļo̧k wōt men ko me renaaj tōl kōj n̄an Kraist.
Mijeļo̧k wōt Kraist emenin aikuji pokake, eļaptata kōn m̧wil ko reddik im pidodo me remaron̄ jipan̄ kōj erom̧ rikaļoor ro rem̧m̧anļo̧k. Ejjeļo̧k erom̧ rikaļoor n̄e ejjeļo̧k katakin.
Mijeļo̧k wōt eo ad n̄an Kraist ej lukkuun alikkar ilo ad kalimjōk m̧aaninļo̧k iaļ eo n̄an ijo jekōņaan pād ie im wōn eo jekōņaan erom̧ innem kōm̧m̧an iien aolep raan n̄an kōm̧m̧an men ko me renaaj jipan̄ kōj tōprakļo̧k ijo. Mijeļo̧k wōt Kraist emaron̄ kapidodoikļo̧k kālet ko ad im letok juon unin tōl n̄an wāween ad maron̄ kōkm̧anm̧anļo̧k ad kōjerbal iien ko ad im men ko jej kōjerbali.
Ilo an bwijin men ko raorōk n̄an ad mije, jej ekkatak jān waanjon̄ak eo an Pita kōn aorōk eo n̄an ad iien otemjej likūt Kraist ilo ioļapļap in ad mijeļo̧k. Ej wōt ilo Jisōs Kraist me jemaron̄ bar jepļaak im mour ippān Anij. Jej pedped wōt ioon jouj eo an Kraist ilo ad kate kōj n̄an erom̧ āinwōt E im kappukot jeorļo̧k bōd eo an im kajoor in kōkajoorļo̧k n̄e jej likjab.
Ekkōl kōn Menin Kōm̧ad ko
Katak eo kein karuo: ekkōl kōn menin kōm̧ad ko. Ke Pita ekar ukōt an mijeļo̧k Jisōs n̄an kōto im ņo ko rej rūb ņae ineen, ekar jino tum̧laļļo̧k.
Elōn̄ men ko “im̧aan bōran wa eo” me remaron̄ bōbrae kōj jān ad mijeļo̧k wōt Kraist im men ko an indeeo me rej pād “im̧aaninļo̧k iaļ eo.” Devil eo emaron̄ rikapo eo eļap. Jej ekkatak jān ettōņak eo an Liai bwe ainikien ko jān m̧weo ekilep im ļap ej kappukot n̄an kapoik kōj n̄an men ko me renaaj bōk kōj jān iaļ in m̧aanjapopo eo ad n̄an mour ippān Anij .9
Bōtaab ebar wōr jet menin kapo ko me rejjab alikkar im ko me remaron̄ bar ļap aer kauwōtata. Āinwōt an enaan eo ba, “Men eo emenin aikuj n̄an anjo̧ ioon men ko renana ej n̄an armej ro rem̧m̧an n̄an jab kōm̧m̧an jabdewōt men.” Rikapo eo āinwōt em̧ōj an kālet n̄an kōm̧m̧an bwe armej ro rem̧m̧an ren jab kōm̧m̧man jabdewōt men, ak barāinwōt kakkure iien ko aer kōn men ko me renaaj kapoik er jān un ko im kōttōpar ko aer raorōk. N̄an waanjon̄ak, jet men ko me rej menin kejmour n̄an kōj remaron̄ menin kapo ko rejjab em̧m̧an n̄an mour ilo an ejjeļo̧k katak. Rikapo eo emeļeļe bwe menin kapo ko remaron̄ jab nana ak jerawiwi bwe ren wājabdik.
Maron̄ Lo̧mo̧o̧ren Kōj
Katak eo kein kajilu: maron̄ lo̧mo̧o̧ren kōj. Ke Pita ekar jino tūm̧laļļo̧k, ekar jino jan̄, “Irooj, lo̧mo̧o̧ren eō. Im e ṃōkaj an Jisōs erḷọke pein, im dāpij e.”10 N̄e jej loe ad make tūm̧laļļo̧k, n̄e jej ioon en̄taan, ak n̄e jej m̧ōjņo̧ļo̧k, kōj jej barāinwōt maron̄ bōk lo̧mo̧o̧r jān E.
Ilo am̧ jelm̧ae en̄taan ak māllijon̄, komaron̄ āinwōt n̄a im kōjatdikdik bwe lo̧mo̧o̧r enaaj m̧ōkaj an itok. Bōtaab keememej bwe Rilo̧mo̧o̧r ekar itok n̄an lo̧mo̧o̧ren Rikaļoor ro ilo iien waj ka emān ilo bon̄—ālikin aer kar en̄taan ilo ļan̄ eo ilo aolepān bon̄in eo.11 Jemaron̄ jar bwe eļan̄n̄e jipan̄ eban itok wōt kiiō, ke enaaj baj itok wōt ilo iien waj karuo ak em̧ool waj kajilu in bon̄ in jabon̄ kōnaan eo. N̄e jej aikuj kōttar, kakkije im lōke bwe Rilo̧mo̧o̧r enaaj iien otemjej lale, lukkuun kōm̧m̧an bwe jen jab aikuj en̄taan jān jon̄an eo jemaron̄ e.12 Ro rej kōttar ilo iien waj kein ka emān, bōlen ilukwōn wōt en̄taan, jab joļo̧k kōjatdikdik. Lo̧mo̧o̧ren enaaj baj wōt iien otemjej itok n̄an ro rej tiljek, men̄e ilo mour in ak ilo mour indeeo.
Jet iien ad tum̧laļļo̧k ej itok kōnke kōn bōd ko ad make im jerawiwi ko. Eļan̄n̄e kwoj lo am̧ make tum̧laļļo̧k kōn un kein, kōm̧m̧ane kālet eo ekam̧ōņōņō n̄an ukweļo̧k.13 Ij tōmak bwe jejjo men ko rej leļo̧k eļapļo̧k lan̄lōn̄ n̄an Rilo̧mo̧o̧r jān kōjparok ro rej eļļo̧k, ak jepļaakļo̧k, n̄an E. .14 Jeje ko rekwojarjar rej obrak kōn bwebwenato ko kōn armej ro rekar wōtlo̧k juon kattōn im kōm̧m̧an bōd ak rekar ukweļo̧k im erom̧ dim ilo tōmak ilo Kraist. Ij ļōmņak bwebwenato ko ilo jeje ko rekwojarjar rej kakeememej kōj bwe iakwe eo an Rilo̧mo̧o̧r n̄an kōj im kajoor eo An n̄an lo̧mo̧o̧ren kōj rej indeeo. Rilo̧mo̧o̧r ejab wōt lan̄lōn̄ n̄e jej ukweļo̧k, ak jej barāinwōt bōk eļap lan̄ļōn̄.
Jem̧ļo̧k in
Ij karuwaineneik eok n̄an likkuun m̧ool kōn “kalimjōk m̧aaninļo̧k iaļ eo” im kōļapļo̧k am̧ mijeļo̧k men ko me relukkuun aorōk. Jen dāpij Kraist ilo ioļapļap in men ko jej mijeļo̧k. Ilo ibūļōņ aolepān menin kapo ko, men ko “ilo im̧aan bōran wa eo,” im aer in kōto ko me rej jepooļe kōj, ij kam̧ool bwe Jisōs ej ad Rilo̧mo̧o̧r im ej ad Ripinmuur im ad Rilo̧mo̧o̧ren. Ilo etan Jisōs Kraist, Amen.