Men ko an Būruō
Ta men ko kwoj kejekļo̧kjeņ kaki? Ta men ko rej lukkuun in aorōk n̄an kwe? Ta men ko an būruōm̧?
Ro jeiū im jatū, ilo aō jutak ilo Im̧ōn Kweilo̧k in ad aorōk bar juon alen, ij keememej naan ko an Rijilōk Piter: “Irooj, em̧m̧an ad pād ijin.”1
Ļōmņak ko aō rej pedped ioon naan ko an rikanaan Nipai, eo ekar kōjparok ļo̧o̧k eo an armej ro doon ālkin mej eo an Jemed Liai. Nipai ekar je, “Im ioon men kein ij jeik men ko an būruō.”2
Ikōn riiti im jab ļōmņak kōn eoon in, ļōmņak naan eo men ko ekar jab kanooj karbōb ak ejetōbtōb, ejjab kanooj ļap n̄an kobaik ippān “aō jetōb.” Aaet ikar ekkatak bwe naan eo men ko kar kōjerbale ilo jeje ko rekwojarjar 2,354 alen.3 N̄an waanjon̄ak, ilo Moses: “N̄aij Jinoin im Jem̧ļo̧kin, Anij Ekajoor Bōtata; jān Nejū Iaar Make Keotake Iaar kōm̧anm̧ani men kein.”4 Im naan ko an Nipai: “Lo, aō ej lan̄lōn̄ ilo men ko an Irooj; im buruō ejjab jem̧ļo̧k an lin̄ōri men ko iaar loi im ron̄.”5
Naan ko an Nipai rej kwaļo̧k kajjitōk ko “Ta men ko kwoj kejekļo̧kjeņ kaki?” “Ta men ko rej lukkuun in aorōk n̄an kwe?” “Ta men ko an būruōm̧?”
Men ko an būruōd emakijkij aer alikkar im m̧wilaļ kōn kajjitōkin kajjitōk ko.
Ilo iien ajeded in nan̄inmej in ikar ioon jodikdik ro jān aolepān laļ in ilo elōn̄ nokon ko, ko reļļap im iddik, kōn kadiwōjļo̧k ko imejatoto im social media, im em̧ōj am kar ekōnono kōn kajjitōk ko aer.
Eo jon̄oul emān iiō-rūto̧o̧n Josep Smith ekar wōr juon an kajjitōk em̧wilaļ ilo būruōn, im ekar bōkļo̧k n̄an irooj. Būreejtōn Russell M. Nelson ekar kōmejajaik: “Leļo̧k kajjitōk ko ami n̄an Irooj im n̄an kein jipan̄ ko jet retiljek. Ekkatak kōn ikdeleel n̄an tōmak ijjelo̧kin kōn kōjatdikdik bwe kwomaron̄ loe juon bōd ilo eo an mour eo an juon rikanaan ak oktak ilo jeje ko rekwojarjar. Bōjrak am̧ kōļapļo̧k pere ko am̧ ilo am̧ kōnono kaki ippān … ripere ro. Kōtļo̧k an Irooj tōl eok ilo iaļ eo ami n̄an elolo men ko an jetōb.”6
Jodikdik ro emakijkij aer kajjitōk ippa ta eo ij tōmak e im etke ij tōmak e.
Ij keememej aō loļo̧k juon jiron̄ ilo intōrnet ilo m̧weo im̧ōn. Ikar kajjitōk eļan̄n̄e ekar kein kajuon in an juon Rijilōk kar pād ilo m̧weo im̧ōn. Liin em̧ōkaj an kar ettōn̄ im uwaak, “Aaet.” Kajjitōk eo an n̄an n̄a ekar em̧m̧an: “Ta men ko raorōk tata ij aikuj jeļā?”
Ikar uwaak kōn men ko an būruō, men ko me rej kōpooj eō n̄an ron̄ im̧we ko, me rej ļōn̄aj kōļmenļo̧kjeņ ko aō reļļapļo̧k jān wāween ko an laļ in, me rej letok jibadbad n̄an jerbal eo aō ilo gospel eo im n̄an lukkuun mour eo aō.
Imaron̄ ke kwaļo̧k ippāmi jet iaan men ko an būruō? Men kein rej jerbal n̄an aolep ro rej pukōt n̄an erom rikaļool ro rem̧ool an Jisōs Kraist. Jon̄oul men ko enaaj em̧m̧an, epidodo keememej. Rainin ij lewaj n̄an kom̧ jijlimjuon kōn kōjatdikdik eo bwe kom̧ naaj kadedeļo̧k ruwalitok, ruwatimjuon, im jon̄oul jān en̄jake ko ami make.
Juon, iakwe Anij Jemed im Jisōs Kraist, ad Rilo̧mo̧o̧r.
Jisōs ekar kwaļo̧k kien eo eļap im m̧oktata: “Kwōn yokwe Irooj am̧ Anij kōn aolepen būruom̧ im kōn aolepen am̧, im kōn am̧ ļōmņak otemjej.”7
Būreejtōn Nelson ekar kwaļo̧k wūjlepļo̧k eo an n̄an Anij, Jemed Indeeo, im n̄an Nejin, Jisōs Kraist, ke kar kūr e n̄an tōl Kabun̄ eo an Irooj, ba, “Ijelā Kajjiero, ij iakwe Er, im kallim̧ur n̄an jerbal n̄an Er—im kwe—kōn aolep kitwōn mour eo aō āliktata.”8
Kōn menin m̧oktata, iakwe Jemed im Nejin.
Ruo, “Iakwe rūturum̧.”9
Ejjab baj wōt juon ļōmņak em̧m̧an, ej kein eo eļap kein karuo. Ro rūturumi rej eo pālem̧ im baam̧le eo, ward membōr ro, rijerbal ro m̧ōttam̧, ruum̧ mate ro ami, ro rejjab jān tōmak in ad, ro rej aikuj pein jipan̄, im, ilo m̧ool, aolep. Loļātāt eo kōn “iakwe eo rūturum̧” kar likūti ilo al eo “Love One Another [Iakwe Doon].”10
Būreejtōn Nelson ej kakeememej kōj, “N̄e jej iakwe Anij kōn aolepān būruwōd, E ej jipan̄ kōj en̄jake im ļōmņak kōn mour an ro jet.”11
Jilu, iakwe eok make.
En̄in ej ijo elōn̄ rej kakkōt ie. Ekaitoktok ke limo bwe iakwe kōj make ej āinwōt ejjab pidodo an itok jān iakwe ro jet? Aaet Irooj ekar ba, “Kwōn iakwe ri turum̧ im āinwōt kwe.”12 E ej kaorōk kwojarjar ilo kōj, im jej aikuj in bar. N̄e ewōr eddo ko ad reddo kōn jerawiwi ko, rub bōro ko, en̄jake ko kōn likjab, inepata, illu, ak jerawiwi, kajoor eo an Pinmuur eo an Rilo̧mo̧o̧r eo ej, kōn ļam eo ekwojarjar, juon iaan men ko me rej ļōn̄aj jetōb eo.
Emān, kōjparok kien ko.
Irooj ekar kalikkare: “Eļan̄n̄e kom̧wij iakwe eō, kōjparok kien ko aō.”13 Kajjieon̄ kajjojo raan n̄an erom im n̄an em̧m̧anļo̧k jidik im n̄an bun̄ m̧aanļo̧k ilo jim̧we.
Ļalem, iien otemjej erreo n̄an etal n̄an tampeļ.
Ij ņa etan kar leļo̧ke n̄an Irooj. Mekarta ewōr am̧ maron̄ in etal n̄an juon tampeļ ak jaab, erreo kōn juon peba in mālim deļo̧n̄e tampeļ ekāāl ej dāpij wōt am̧ pedped ioon men ko me raorōk, iaļ in bujen eo.
Jiljino, kom̧win lan̄lōn̄ im lem̧ōņōņō.
“Kom̧in m̧ōņōņō, im jab mijak,”14 Irooj ekar ba. Etke? Ekōjkan, n̄aat eo apan̄ ko rej jelm̧ai kōj ilo aolep jikin? Kōnke kōn kallim̧ur eo kar kōm̧m̧an jān Jisōs Kraist: “N̄a Irooj Ij pād ippemi, im naaj jutak ippemi.”15
Būreejtōn Nelson ej kōmeļeļeik gospel eo kar kōjepļaaktok āinwōt “juon ennaan in lan̄lōn̄!”16 Im ej kōmeļeļeik, “M̧ōn̄ōņō eo jej en̄jake edik jetņakin ilo wāween mour ko ad im aolep men otemjej jej kōm̧m̧ani kōn mije mour ko ad.”17
Jijlimjuon, ļoor rikanaan eo emour an Anij.
Menin emaron̄ in kein kajimjuon ilo laajrak in men ko aō, bōtaab ej ilōn tata ilo ļōmņak eo aō ikkijien aorōk eo an ilo rainin.
Ewōr juon ad rikanaan an Anij ioon laļ in rainin! Lale kwar n̄an jidik kajejtokjān ta meļeļe in n̄an kwe. Keememej jiron̄ eo ikar kōnono kake ilo jinoin. Liin ekar kōņaan jeļā ta men ko raorōk tata. “Ļoor rikanaan eo emour,” innān ikar ba im ij kōmejajaik bar juon alen rainin.
Jej jenolo̧k āinwōt juon Kabun̄ eo ej tōl jān rikanaan ro, rilolo ro, im ribōk revelesōn ro kar kūr jān Anij n̄an iien in. Ij kallim̧ur bwe ilo ami ron̄jake im ļoor kapilōk eo aer, kom̧ij jamin naaj jōbwābwe. Jāminļo̧ n̄an Jidik!
Jej mour ilo juon tōre eo me jej “jeplōklōk āinwōt ņo ko,”18 n̄e men ko an jetōb, karbōb, m̧ool, im kautiej rej luko̧rko̧r er. Jej aikuj in kōm̧m̧ani kāālet ko. Ewōr ippād ainikien Irooj kōn rikanaan eo An n̄an kaenōm̧m̧an mijak ko ad im joļo̧k itok limo ko ad make, bwe n̄e Būreejtōn Nelson ej kōnono, ej kōnono n̄an Irooj.
Jej jeraam̧m̧an kōn jeje ko rekwojarjar im katak ko me rej kakeememej kōj, “Bwe ļōmņak ko Aō re jab ļōmņak ko ami; im iaļ ko ami re jab iaļ ko Aō, Jeova ej ba. .”19
Āindein ekar āinwōt ippān Naaman, juon ritōl jarin tariņae eo eļap ilo Syria, aaet juon rileba, eo kar jiron̄ e bwe rikanaan Elisha emaron̄ kemour e. Elisha ekar jilkinļo̧k rikoj meļan eo an n̄an jiron̄ Naaman n̄an kwaļe ilo Reba Jordan jiljilimjuon alen im enaaj kar erreo. Naaman ekar jab m̧ōņōņō. Em̧ool ekar wōr juon reba ekajoorļo̧k jān Jordan, im etke kar jilkinļo̧k juon rijerbal ke ekar kōtmene Elisha, rikanaan eo, n̄an e make en kar kemour e? Naaman ekar ilo̧k bōtaab āliktata kar kareele jān rijerbal ro an: “eļan̄n̄e ri kanaan eo ear jiron̄ eok bwe kwōn kōm̧m̧an jabdewōt men eo eļap, kwō jāmin kar kōm̧m̧ane ke?”20 Āliktata Naaman ekar tulo̧k jiljilimjuon alen ilo Jordan im ekar mour.
Bwebwenato eo an Naaman ej kakeememej kōj kōn kauwōtata eo kōn bōk im kāālet m̧ōtta ko an kapilōk in kanaan eo me ejetjet n̄an ļōmņak eo ad, kōtmene ko, ak jekjek ko an rainin. Rikanaan eo ad ej wōnm̧aanļo̧k in kwaļo̧k n̄an kōj Reba Jordan ko ad make n̄an kemour.
Naan ko raorōk tata jemaron̄ ron̄, kejekļo̧kjeņ, im ļoori rej ko kar kwaļo̧k jān rikanaan eo ad emour. Ij kwaļo̧k kam̧ool bwe em̧ōj aō jijet ilo kapilōk ippān Būreejtōn Nelson n̄an ekōnono kōn jerbal ko raorōk an Kabun̄ in im an laļ in, im em̧ōj aō lo an revelesōn jiōbtok kōn e. Ejeļā kajjien Irooj, ejeļā wāween ko An, im ej ikdeelel bwe aolep ajri ro nejin Anij renaaj ron̄jake E, Irooj Jisōs Kriast.
Ium̧win elōn̄ iiō ko jaar ron̄ jān rikanaan eo ruo alen juon iiō ilo kweilo̧k eo eļap. Bōtaab kōn unin kōnono ko rōkapokpok an tōre in ad, Būreejtōn Nelson ej kōnono eļapļo̧k an emakijkij ilo forum ko,21 social media,22 nokon ko,23 im em̧ool press briefing ko.24 Ikar lale an m̧aanjabpopo im kwaļo̧k ennaan ko roarōk in revelesōn me raar kōketak eļapļo̧k kam̧m̧oolol, kōkōm̧anm̧anļo̧k kobaik aolep ro jeid im jatid ilo laļ in, im kōļapļo̧k aenōm̧m̧an, kōjatdikdik, lan̄lōn̄, ājmour, im kemour ilo mour ko an kajjojo armej.
Būreejtōn Nelson ej juon rikōnono eo elo̧ļe, bōtaab eo aorōkļo̧k, e ej juon rikanaan an Anij. Elukkuun in kabwilōn̄lōn̄ n̄e kwoj ļōmņak kake, bōtaab ej lukkuun aorōk n̄an kile bwe tōl eo an alikkar enaaj bōbrae kōj jān aolep m̧oņ,kapeel, im wāween ko an jidik iien rej bōk itok limo eo ilo laļ in rainin.25
Kōļmenļo̧kjeņ an rikanaan ej aolep kōn revelesōn. “Jepļaaktok eo an Tarlep in Gospel: Juon Naan in Kean̄ n̄an Laļ in kōn Rūbukwi Iiō in Jepļaaktok eo,” kar letok ilo Eprōļ 2020 kweilo̧k eo eļap, ej kōmejajaik bwe Irooj ej tōl jerbal eo An. Ilo naan in kean̄ in, Būreejtōnji eo Kein Kajuon im Doulul eo an Jon̄oulruo Rijilōk ro rej ba: “Kōmij lukkuun m̧ōņōņō in kwaļo̧k bwe Jepļaaktok eo kar kallim̧ur kake ej wōnm̧aanļo̧k wōt kōn revelesōn ko rejjab jem̧ļo̧k. Laļ in eban bar āinwōt m̧okta, āinwōt an Anij naaj ‘kobaik men otemjej ilo Kraist’ (Epesōs 1:10).”26
“Men ko otemjej iloKraist”27 im “men ko an būruō”28 rej ta eo Kabun̄ in ej, gospel in, im armej in rej kake aolep.
Ij kiil kōn juon kūr n̄an kajjojo iami n̄an ļōmņak kōn “men ko an būruō” jiljilimjuon ikar kwaļo̧ki rainin, iakwe Anij Jemed im Jisōs Kraist, ad Rilo̧mo̧o̧r; iakwe eo rūturum̧; iakwe eok make; kōjparok kien ko; iien otemjej erreo kōn juon peba in mālim deļo̧n̄e tampeļ; kom̧win lan̄lōn̄ im lem̧ōņōņō; im ļoor rikanaan eo emour an Anij. Ij kajjitōk ippāmi n̄an kwaļo̧k ruwalitōk, ruwatimjuon, im jon̄oul ko ami make. Ļōmņak kōn wāween ko kom̧ maron̄ kwaļo̧k en̄jake ko rem̧ool an “men ko” an būruōm̧ ippān ro jet im kōketak er n̄an jar, kejekļo̧kjeņ, im pukōt tōl eo an Irooj.
Men ko an būruō rej aorōk n̄an n̄a āinwōt ko ami n̄an kom̧. Men kein rej kōkajoorļo̧k jerbal in jipan̄ eo ad ilo Kabun̄ in im ilo aolep m̧ōttan ko an mour. Rej kōm̧m̧an bwe jen kallim̧ur n̄an Jisōs Kraist, rej kakeememej kōj kōn bujen ko ad, im rej jipan̄ kōj en̄jake ineem̧m̧an eo ilo pā ko pein Irooj. Ij kam̧ool bwe ikdeelel ko An ej bwe jetōb ko ad “ enaaj jamin kwōle ak maro, a naaj obrak”29 kōn iakwe eo An ilo ad pukōt n̄an erom rikaļoor ro rem̧o̧o̧l An, n̄an juon wōt Ippān āinwōt An ippān Jemen. Ilo etan Jisōs Kraist, amen.