Aikuj eo n̄an juon Kabun̄
Jeje ko rekwojarjar rej kalikar an katakin jinoin im aikuj eo an juon kabun̄ tōl jān im ippān kajoor eo an ad Irooj, Jisōs Kraist.
Elōn̄ iiō remootļo̧k, Elder Mark E. Petersen, juon membōr in Doulul eo an Jon̄oulruo Rijilōk ro, kar jinoe kōnono eo an kōn waanjon̄ak in:
“Kenneth im kōrā eo ippān, Lucille, rej armej em̧m̧an, m̧ool im jim̧we. Rej jab etal im jar, jekdo̧o̧n, ak rej en̄jake bwe remaron̄ em̧m̧an jekdo̧o̧n kabun̄. Rej katakin ajri ro nejier m̧ool im jim̧we im rej ba n̄an er make bwe en̄rein rej men ko me kabun̄ renaaj kar bar katakin kom̧ kaki.
“Im, mekarta, rej ba bwe rej aikuji weekend n̄an m̧akūtkūt ko an baam̧le … [im] bwe etal n̄an jikin jar enaaj lukkuun ļap an kapan̄ er.”1
Rainin, enaan in aō ejelōt armej ro rem̧m̧an im armej in kabun̄ ro rej bōjrak aer etal ak bōk kwonaer ilo kabun̄ ko aer.2 Ilo aō ba “kabun̄ ko,” ekoba im̧ōn kweilo̧k ko, mosques ko, ak doulul ko an kabun̄ ko jet. Jej loe bwe kajjojo oran armej ro rej etal im jar ilo aolepān m̧ōnjar kein reiietļo̧k, ilo aolepen laļ in.3 Eļan̄n̄e jej kajekdoon aorōk eo an kabun̄jar ko kōn elon̄ wūn ko, jej kakkure mour in jetōb ko ad make, im jon̄an oran armej rein rellōn̄ me rej kōjenoļo̧k er jān Anij ej kadikļo̧k kōjeraam̧m̧an ko An n̄an laļ ko ad.
Pād ilo im m̧akūtkūt ko an kabun̄ ej jipan̄ kōj erom armej ro rem̧m̧anļo̧k im jelōt em̧m̧anļo̧k eo an m̧our ko an ro jet. Ilo kabun̄ ko, rej katakin kōj elmen ad mour kōn pedped in katak ko an kabun̄. Jej ekatak jen doon. Juon waanjon̄ak eļapļo̧k an kajoor jān naan in kwaļo̧k. Jej kajoorļo̧k ilo ad ippān doon ippān ro juon me juon wōt ad ļōmņak ak kōlmenļo̧kjen ippāer. Ilo ad pād ilo kabun̄ ko im bōk koņaad, buruōd rej, ainwōt an Bible ba, “ippan̄ doon ilo yokwe.”4
I.
Jeje ko rekwojarjar Anij ekar letok n̄an Rikūrijin ro ilo Baibōl im ilo revelesōn ko raan kein ej kalikkar ilo an katakin kōj aikuj eo n̄an juon kabun̄. Jim̧or men kein rej kwaļo̧k bwe Jisōs Kraist ekar ejaake juon Kabun̄ im kōlmenļo̧kjeņ bwe juon kabun̄ enaaj kōm̧m̧ane jerbal eo An ilo aer ļoor E. Ekar kūr jon̄oulruo Rijjilōk ro im leļo̧k maron̄ im kii n̄an kōjekeki. Baibōl eo ej katakin bwe Kraist ej “bōran eklejia”5 im bwe opija ro kar leļo̧k “bwe En koweeppānḷọk ro reṃṃan, kōn jerbal in jipañ, kōn kalōk ānbwinnen Kraist.”6 Aaet Baibōl ej kalikkar kōn kabun̄ eo jiniontata im aikuj eo kōn juon kiiō.
Jet rej ba bwe etal n̄an kweilo̧k ko an kabun̄ ko ejjab jipan̄ er. Jet rej ba, “Ikar jab ekkatak jabdewōt men rainin” ak “ejjeļo̧k ekar em̧m̧an n̄an n̄a” ak “ilukkuun kar jook.” Kainepata ko ad make rej jab aikuj dāpij kōj jān katak ko an Kraist, eo ekar katakin kōj n̄an jerbal, ejjab jerbal n̄an kōj.7 Kōn ļōmņak in, bar juon membōr ekar kōmeļeļeik kōttōbar eo an kōn etal n̄an m̧ōnjar in:
“Iiō ko rem̧ootļo̧k, ikar ukōt ļōmņak im m̧wilū ikkijeen aō etal im jar. Ejako aō etal n̄an jikin jar kōn n̄a make, ak kōn ļōmņak ko an ro jet. Ij kōm̧m̧an aō kōttōbar bwe in iakweiki armej ro rej jijet make iaer, n̄an karwainene rilotok ro, … n̄an bōk kwonaaō ilo jerbal. …
“Ilo tukaduin, ij etal im jar kajjojo wiik kōn juon kōttōbar bwe in emourrur im kajoor, ejjab kōn kōnaan ko an ro jet, im kōm̧m̧ani oktak ko rem̧m̧an ilo mour ko an armej.”8
Būreejtōn Spencer W. Kimball ekar katakin bwe “jej jab etal n̄an kweilo̧k ko ilo Jabōt bwe jān limo ak baj ekkatak. Jej etal bwe jen kabun̄jar n̄an Irooj. Ej eddo an kajjojo. N̄e kweilo̧k eo ekar jab em̧m̧an n̄an eok, innem kwaar likjab. Ejjeļo̧k remaron̄ kabun̄jar n̄an kwe; kwoj aikuj kōm̧m̧ani eddo ko am̧ make n̄an Irooj.”9
Pād ilo kabun̄ emaron̄ kōppeļļo̧k būruwōd im karreoik būruwōd.
Ilo juon kabun̄ jejjab jerbal make iaad jān kālet ko ad make ak ilo iien eo rem̧m̧an n̄an kōj. Ekkā ad jerbal ilo juon tiim. Ilo ad jerbal jej kapukōt iien ko rem̧m̧an jān lan̄ n̄an walon̄ļo̧k ilo kōj make ilo iiō ko ad. Iien kweilo̧k ko ilo kabun̄ ej jipan̄ kōj anjo̧ jān ad ļōmņak kōn kōj make eo emaron̄ dāpij kōj jān ad eddōkļo̧k ilo jetōb.
Ewōr jejjo em̧m̧an ko raorōk n̄an kwaļo̧ki, mōttan jidik. Ilo kabun̄ ko jej iiaio ippān armej ro rem̧m̧an me rej kajjieon̄ jerbal n̄an Anij. Menin ej kakeememej kōj bwe jejjab make iaad ilo m̧akūtkūt ko an kabun̄. Kōj aolep jej aikuj ippān doon ippān ro jet, im m̧akūtkūt ko an kabun̄ ej jet iaan en̄jake ko rem̧m̧an, n̄an kōj im ro karejerad, im ajri ro nejid. N̄e ejjab koba ippān doon kein, eļaptata ikōtaan ajri ro im mama im baba, ekkatak ko rej kwaļo̧k bwe enaaj pen an mama im baba karutoļo̧k ajri ro ilo tōmak eo aer.10
II.
Ilo torein, emōj aō kōnono kōn kabun̄ ko. Kiiō inaaj kwaļo̧k kōn wūnin an aorōk membōr ro, oran ro rej pād, im bōk kwonaam ilo jepļaaktok eo an Kabun̄ eo an Rilo̧mo̧o̧r Jisōs Kraist im Armej ro Rekwojarjar ilo Raan Ko Āliktata.
Kōj, aaet, jej kam̧ool bwe jeje ko rekwojarjar, jem̧aan im raan kein, rej kalikkar an katakin jinoin im aikuj eo an juon kabun̄ tōl jān im ippān kajoor eo an ad Irooj, Jisōs Kraist. Jej barāinwōt kam̧ool bwe jepļaaktok eo an Kabun̄ eo an Jisōs Kraist emōj an ekkaļ n̄an katakin tarlep in katak ko An im n̄an tōl kōn maron̄ eo an priesthood eo An n̄an kōm̧m̧ani kain̄i ko remein aikuj n̄an delōn̄e aelōn̄ eo an Anij.11 Membōr ro rej jab etal n̄an jikin jar im pedped ioon jetōb ko aer make im kōjenolo̧k er jān aorōk kein an gospel: kajoor im kōjeraam̧m̧an eo an priesthood, jepļaaktok in tarlep in katak, im kōnaan eo im iien ko rem̧m̧an n̄an bōke katak eo. Rej joļo̧ke iien eo em̧m̧an n̄an waanm̧aanļo̧k ko an baam̧le ko aer.
Juon iaan men ko rem̧m̧an an jepļaaktok eo an Kabun̄ in ej bwe ej jipan̄ kōj eddōkļo̧k ilo jetōb. Eddōkļo̧k meļeļein oktak. Ilo naan ko an jetōb meļeļein men in ej ukweļo̧k im pukōt n̄an epaake Irooj. Ilo jepļaaktok eo an Kabun̄ in ewōr ad katak, bun̄tōn ko, im ro rijpan̄ ro reim̧we me rej jipan̄ kōj ukweļo̧k. Un eo aer, men̄e ilo membōrship ko̧o̧njeļ ko, ejjab n̄an kaje, āinwōt juon jemļo̧kin jorrāān ko reļļap ilo jikin ekajet. Membōr ro an Kabun̄ in rej ko̧o̧njel n̄an pukōt n̄an jipan̄ kōj n̄an bōk tiriam̧o eo an jorļo̧k bōd itōk jān Pinmuur eo an Jisōs Kraist.
Kajjojo jetōb enan̄in kar jab maron̄ lewaj ikdeelel im kōmeļeļe ko n̄an jerbal n̄an er make letok n̄an jepļaaktok eo an Kabun̄ in. Juon iaan waanjon̄ak ko rem̧m̧an ej kōn jodikdik ro im ritto ro rej likuti jikuuļ im iien kakije ko aer n̄an bōke kūr ko n̄an jerbal in mijenede. Rej jerbal in mijenede n̄an armej ro rejaje kajeer ilo ijoko rekar jab keleti. Ejjeļo̧k oktak membōr ro rej bōk kwonaer ilo jerbal ko jej ņae etan “jerbal ko ilo tampel.” Jerbal kein repan kar tōprak eļan̄n̄e en kar jab jipan̄ jān Kabun̄ eo ej bōk eddo in, karōke, im tōl e.
Tōmak eo an membōr rein im jerbal ko ilo Kabun̄ in emōj katakin er elmen kilen jerbal ippān doon n̄an em̧m̧anļo̧k eo an jukjukin ped ko reļļap. Kain en̄jake rōt kein im eddōkļo̧k rej jab waļo̧k ilo iminene ko repedjake jukjuk in pād eo ijo armej rej make iaer ilo aer kōm̧m̧an bwe ren make jeraam̧m̧an. Ilo karōk eo an ward ko ad, jej ippān doon im jerbal ippān armej ro jemaron̄ kar jab kālet er, armej ro rej katakin kōj im teej e kōj.
Ilo kakobaba n̄an jipan̄ kōj katak kōn jetōb ko raikuj āinwōt iakwe, tiriam̧o, jeorļo̧k bōd, im kijenmej, menin ej letok iien em̧m̧an n̄an ekkatak elmen jerbal ippān armej eo oktak ijo rej itok jān e im ta ko rekōņaan. Em̧m̧an eo emōj an jipan̄ elōn̄ iaan membōr ro ad im elōn̄ doulul ko me rej jeraam̧m̧an kōn aer bōk kwonaer. Armej ro rekwojarjar ilo raan kein āliktata rej bōk men kein kōn aer tōl im ippān doon ilo jerbal ippān doon im kijejeto. Imenene in ekar itōk jān painier ro reperan ro rekar bōke jikin ko irālik im kajutak imenene ko raorok me rej jab ļōmn̄ak kōn er make n̄an ippān doon n̄an em̧m̧anļo̧k eo.
Jerbal ko jān armej im iakwe in kijejeto rej aikuj dedeļo̧k ilo unin im tōl kajjojo kein jerbal ko ilo ijoko reļļap. Jepļaaktok eo an Kabun̄ ej kōm̧m̧an menin ilo kijejeto ilo aolepen laļin. Men kein ekoba leto letak kein jerbal ko ilo jikin jikuuļ im jikin taktō, naajik ro rej kwole, lale ro ejjeļo̧k jikier, jipan̄ ro rej an̄ūr, im elōn̄ ko jet. Membōr ro an Kabun̄ in repojak kōn jerbal in Pā in Jipan̄ ilo iien ko ej lon̄ jorrāān ko an mejatoto. Membōr ro an Kabun̄ in rej kōm̧m̧an bwe jen bōk kwonaad ijo elap kijejeto. Membōr ro an Kabun̄ in rej barāinwōt kōļļā jortak ko n̄an jipan̄ ro rej aikuj.
Kakobaba ilo en̄jake ko n̄an aenōm̧m̧an kōn m̧ōttā eo jān Jetōb, membōr ro rej itok n̄an jar rej lem̧ōņōņō kōn leen gospel eo em̧our, āinwōt kōjeraam̧m̧an ko ilo m̧our kōn Naan in Māletlet im men ko im kōjeraam̧m̧an an jetōb kalim̧uur n̄an mour kōn kien juon mōttan jonoul. Jej barāinwōt jeraam̧m̧an kōn koonjel ko jān ritōl ro.
Jeraam̧m̧an ko an aolepen men kein rej kaini ko aikuj mālim an priesthood eo emenin aikuj n̄an indeeo, ekoba kwojkwoj eo jej bōke kajjojo raan in Jabōt. Kōtōpar in kain̄i ko ilo jepļaaktok eo an Kabun̄ in ej bujen in m̧are eo ejeļo̧k jemļo̧kin, eo ej kōm̧m̧an waanmaanļo̧k eo aiboojoj an jem̧jerā an baam̧le. Būreejtōn Russell M. Nelson ekar ekar katakin pedped in ilo juon wāween jemaron̄ keememeje: Ekar ba: “Jejjab maron̄ etōņake ial eo ad n̄an ippan̄ Anij. Jej aikuj pokake kien eo me ioon [kōjeraam̧m̧an eo e ej] pedped.”12
Juon iaan kien ko ej kabun̄jar kajjojo raan in Jabōt.13 Kabun̄ jar ko ad im jerbal ko ad kōn katak ko n̄an indeeo ej kepaake kōj n̄an Anij im kōlapļo̧k im kadebakabk jon̄an ad iakwe. Parley P. Pratt, juon iaan Rijiļōk ro jinoin ilo epepen in, ekar kōmeļeļe elmen an kar en̄jake iien eo Rikanaan Josep Smith ekar kōmeļeļe katak kein: “Ikar en̄jake bwe Anij em̧ool ej jema Ilan̄; bwe Jisōs ekar jeiū, im bwe kōrā eo pāleeō jān lo̧jeeō ekar juon rājeta indeeo ejjab wabanban; juon enjeļ rikarejar ejouj, kar letok n̄an eō āinwōt juon rikaenōm̧m̧an, im juon nōbar in aiboojoj n̄an indeeo im indeeo.” Ilo tukaduin, imaron̄ kiiō iakwe kōn jetōb im kōn meļeļe barāinwōt.”14
N̄an kiloke, ij kakeememej aolep bwe jej jab tōmak bwe em̧m̧an ko remaron̄ waļo̧k itok wōt kōn im̧ōnjar. Kajjojo im̧ōnjar, jej loi milien armej ro rej jipan̄ doon im kōm̧m̧ani elōn̄ kain jerbal ko rem̧m̧an. Kajjojo, Armej ro Rekwojarjar ilo Raan Kein Āliktata rej bōk koņaer ilo elōn̄ iaer. Jej loe bwe jerbal kein āinwōt kwaļo̧k ko an m̧ool indeeo bwe “Jetōb eo ej leļo̧k meram n̄an aolep armej rej itok n̄an laļin.”15
Ijeļo̧kin jerbal ko rem̧m̧an ma remaron̄ tōprak ilo an ejjeļo̧k juon m̧ōnjar, tarlep in katak im pinmuur im kain̄i ko an lo̧mo̧o̧r im mour ijo eutiej tata repojak wōt ilo Kabun̄ eo em̧ōj an jepļaaktok. N̄an kakobaba, pād ilo jikin jar ej letok n̄an kōj kajoor im elapļo̧k tōmak eo ej itok jān ippān doon ippān ro rej tōmak im kabun̄-jar ippān doon ippān ro rej barāinwot kakkōt n̄an ped wōt ilo ial in bujen in im em̧m̧anļo̧k āinwōt rikaloor an Kraist. Ij jar bwe jenaaj aolep dim wōt ilo en̄jake kein ilo Kabun̄ in ilo ad kappukot mour indeeo, menin letok eo elap tata jān aolep menin letok jān Anij, ilo etan Jisōs Kraist, amen.