2021
Tampeļ Eo im Pedped Eo Am Ilo Jetōb
Oktoba 2021
18:59

Tampeļ Eo im Pedped Eo Am Ilo Jetōb

Jān Būreejtōn Russell M. Nelson

Būreejtōn eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata

Jekdo̧o̧n ia, jabdewōt iien jabdewōt men rej waļo̧k ilo mour eo am̧, jikin eo ekōjparok n̄an mour ilo jetōb ej mour ilowaan bujen ko an tampeļ eo am̧!

Ro jeiū im jatū rejitōn bōro, ij kam̧m̧oolol bwe imaron̄ pād ippāmi jibbon̄ in im kwaļo̧k en̄jake ko an būruwō.

Āinwōt ami jeļā, jej kōm̧m̧ane kōkāāl ko reļļap n̄an Salt Lake Temple eo. Jerbal in kōkāāl in ekitbuuj jerbal in kōkajoorļo̧k pedped ko an ilaļ, eo me enej maron̄ kajoor wōt ium̧win bar bukwi tok iiō ko. Ak tampeļ in eaikuj aitokļo̧k an jutak. Ilo jem̧ļo̧kin Māe eo, ikar etale eddōkļo̧k in jerbal in kōkāāl in eļap. Ikar ļōmņak bwe kwonej m̧ōņōņō in lale ta eo kōrā eo pāleeō im n̄a kom̧ro kar loe. Ij ļōmņak bwe kwonej loe etke al in “Bedbed Eo E Bin”1 ekar itok im ewōr juon meļeļein n̄an kōj.

2:4

Pija eo jān jikin eo rej kōkāāle ilo Salt Lake Temple: “Jej kalimjōke lukkuun pedped eo an Salt Lake Temple. Ij jutak ilo juon eria itulaļ in kar jikin eo kar ņaetan Garden Room. Ke ij ekkatak kōn jerbal in pā an aolepān m̧wiin, ij bwilōn̄ kōn ta eo painier ro rekar kōttōbrake. Eļap aō lukkuun kam̧m̧oolol ke ij ļōmņak bwe rekar kalōk tampeļ em̧m̧anm̧ōn in kōn kein jerbal ko wōt im kapāāl ko wōt ewōr ippāer elōn̄ļo̧k jān jibukwi iiō ko rem̧ootļo̧k.

“Elōn̄ iiō ko tokālik, mekarta, eļan̄n̄e jenej lukkuun etale pedped in, jemaron̄ loe jikin ko rejorrāān, peļļo̧k ko ilo dōkā ko, im oktak ko ilo m̧ōttan ko reppen ilo jimāān eo.

“Kiiō ilo aō kam̧oole ta eo injinia ro raan kein, rijin̄a em̧ ro, im rikkaļ em̧ ro rem̧ōkade remaron̄ kōm̧m̧ane n̄an kapenļo̧k lukkuun pedped eo, eļap an ļo̧kjenaō. Jerbal eo aer ekabwilōn̄lōn̄!

“Pedped eo an jabdewōt em̧, eļaptata juon em̧ eo ekilep āinwōt in, ej aikuj kajoor im maron̄ bwe an joor katkat n̄an bōbrae m̧akūtkūt in laļ ko, lōjo̧, kōto ko rekajoor, im jekjek ko ejej uwaer remaron̄ jelet aolep em̧. Jerbal eo eļap n̄an kōkajoore kiiō ium̧win enaaj kōkajoor e tampeļ in ekwojarjar kōn juon pedped eo me emaron̄ im enaaj jutak ilo tōre in idajon̄jon̄.”

Jejjab kajejtokjen kijejeto eo n̄an kōm̧m̧an bwe tampeļ in jej kautieje, eo ekar jino ļapļo̧k an pidodo an jorrāān, juon pedped eo me enaaj jutak wōt ņae kajoor ko an laļ in ilo Millenium eo. Ilo ejja jekjek in, ej kiiō iien bwe kōj kajjojo jen kōjerbal jon̄ak ko reļļapļo̧k—bōlen jon̄ak ko jej jan̄in kar būki m̧okta—n̄an kōkajoorļo̧k pedped eo ad make ilo jetōb. Iien ko jekar jab jeļā kaki rej kūr jon̄ak ko jekar jab jeļā kaki.

Ro jeiū im jatū rejitōb bōro, iien kein rej raan ko āliktata. Eļan̄n̄e kwe im n̄a aikuj in jutak ņae kauwōtata ko im kareel ko, elukkuun aorōk bwe kōj kajjojo eaikuj wōr juon ad pedped eo epen kar kalōke ioon ejm̧aan an ad Rilo̧mo̧o̧r, Jisōs Kraist.2

Kōn menin, ij kajjitōk ippemi kajjojo, epen ke pedped eo ami? Im ta kein kōkajoor ko n̄an naan in kam̧ool eo ami im meļeļe eo ami kōn gospel eo kom̧ij aikuji?

Tampeļ eo ej pād ilo ioļapļap in kōkajoorļo̧k eo an tōmak eo ad im kajoor in jetōb eo ad kōnke Rilo̧mo̧o̧r eo im katak ko An rej lukkuun mour eo an tampeļ eo. Men otemjej katakin ilowaan tampeļ eo, jān kōmeļeļe im jān Jetōb eo, ej kōļapļo̧k ad meļeļe kōn Jisōs Kraist. Kain̄i ko An raorōk rej likwōj kōj n̄an E kōn bujen ko rekwojarjar an priesthood. Innām, ilo ad kōjparoki bujen ko ad, Ej letok n̄an kōj An kōmour, im kajoor in kōkajoorļo̧k.3 Im o, ekōjkan ad naaj aikuji kajoor eo An ilo raan ko rej pād im̧aan.

Jekar bōk juon kallim̧ur bwe “eļan̄n̄e [jej] pojak [jej] jamin mijak.”4 Kallim̧ur in ekar juon kajjitōk eļap rainin. Irooj ekar kwaļo̧k bwe men̄e apan̄ ko jekar jab jeļā kaki rainin, ro rej kalōk pedped eo aer ioon Jisōs Kraist, im kar ekkatak wāween n̄an kepaakļo̧k kajoor eo An, ban aikuj inepata kōn iien ko ad.

Kain̄i ko an tampeļ im būjen ko rej jān etto. Irooj ekar kōmeļeļeik Adam im Iv n̄an jar, kōm̧m̧an bujen ko, im katok n̄an E.5 Ilo m̧ool, “jabdewōt iien Irooj ewōr an armej ioon laļ in ro renaaj pokake naan ko An, kar kean̄ er n̄an kalōk tampeļ ko.”6 Bok ko rekwojarjar robrak kōn meļeļe ko n̄an katak ko an tampeļ, nuknuk, kajin, im ebar lōn̄.7 Men otemjej jej tōmak im aolep kallim̧ur Anij ekar kōm̧m̧an n̄an armej in bujen ro An rej itok ippān doon ilowaan tampeļ eo. Ilo aolep iiō, tampeļ eo kwaļo̧k m̧ool eo eaorōk me ro otemjej rej kōm̧m̧an bujen ko ippān Anij im kōjparoki rej ajri in bujen ro.

Wāween in, ilo m̧weo im̧ōn Irooj, jemaron̄ kōm̧m̧ane ejja bujen kein ippān Anij me Ebream, Aisek, im Jekab rekar kōm̧m̧ani. Im jemaron̄ būki ejja kōjeraam̧m̧an ko wōt!

Kirtland im Nauvoo Tampeļ

Tampeļ ko rekar m̧ōttan wōt tōre in bōk eddo in jān raan ko m̧okta.8 Ilaija ekar liļo̧k kii in maron̄ liāp n̄an Josep Smith ilo Kirtland Tampeļ eo. Tarlep in priesthood eo ekar ba jepļaaktok ilo Nauvoo tampeļ eo.9

Mae iien raar m̧ane, Josep Smith ekar wōnm̧aanļo̧k im bōk revelesōn ko me rekar kōwōnm̧aanļo̧k jepļaaktok eo an bōk mennin letok kwojarjar eo im kain̄i in liāp eo.10 Ekar kile, kōn menin, kōkāāl eo eļapļo̧k ekar aikuj kōm̧m̧an. Ālkin leļo̧k mennin letok kwojarjar eo n̄an Brigham Young ilo Māe 1842, Josep ekar jiron̄ Brigham, “Menin ejjab jim̧we ij karōke, ak jekar kōm̧m̧ane jon̄an eo em̧m̧antata jemaron̄e ium̧win jekjek ko ilo wāween eo kar likūti kōj ie, im ikōņaan bwe kwon bōk menin ilo peim̧ im ejaake im karōke aolep ceremony kein.”11

Ālkin mej eo an Rikanaan Josep, Būreejtōn Young ekar loe an dedeļo̧k Nauvoo Temple12 im tokālik kar kalōke tampeļ ilo Utah Territory. Ilo iien aje eo an po ko ilaļ in St. George Temple, Brigham Young ekar kwaļo̧k aorōk in ukōte im jāniji jerbal in tampeļ ke ekar ba, “N̄e ij ļōmņak kōn unin kōnono in, ikōņaan bwe lo̧ ko jiljilimjuon ren kōjaururi im karuj armej ro.”13

Jān iien eo m̧aantak, kain̄i ko an tampeļ rekar lukkuun em̧m̧anļo̧k. Būreejtōn Harold B. Lee ekar kōmeļeļeiki etke wāween jerbal in, kakien ko, im aaet jerbal ko an kain̄i ko an tampeļ rej wōnm̧aanļo̧k wōt im oktak ilowaan Kabun̄ eo ekar jepļaaktok an Rilo̧mo̧o̧r eo. Būreejtōn Lee ekar ba: “Pedped ko an gospel eo an Jisōs Kraist rekwojarjar. Ejjeļo̧k juon ej ukōt pedped ko im [katak] ko an Kabun̄ in ijjelo̧kin wōt jān revelesōn jān Irooj. Ak wāween ko rej oktak āinwōt tōl ko reim̧we rej itok n̄an ro rej tōl ilo juon iien kar leļo̧k.”14

Ļōmņak kōn ewi wāween an kar oktak wāween kōm̧m̧ane kwojkwoj eo ium̧win elōn̄ iiō ko. Ilo raan ko m̧okta, dān n̄an kwojkwoj eo kar leļo̧k n̄an jarlepju eo ilo juon nien dān killep. Aolep rej idaak jāne. Kiiō jej kōjerbale kajjojo kab ko jemaron̄ julo̧k ālkin kōjerbali. Wāween jerbal in ekar oktak, ak bujen ko rekar jab oktak.

Kejōkļo̧kjeņ kōn m̧ool kein jilu:

  1. Jepļaaktok eo ej juon jerbal, jab juon m̧akūtkūt, im enaaj m̧ae iien Irooj ej bar itok.

  2. Ruo: Jibadbad eo eļap an aiintok Israel15 ej n̄an bōktok kōjeraam̧m̧an ko an tampeļ eo n̄an ajri ro retiljek nejin Anij.

  3. Im jilu: Ilo ad kappukot wāween ad kōttōbrake jibadbad in ilo wāween ewājabdikļo̧k, Irooj ej kwaļo̧k eļapļo̧k ļōmņak ko. Jepļaaktok eo ej wōnm̧aanļo̧k wōt ej aikuji revelesōn ko rej wōnm̧aanļo̧k wōt.

Būreejtōnji eo Kein Kajuon im Doulul eo an Jon̄oulruo Rijilōk ro emakijkij aer kajjitōk ippān Irooj eļan̄n̄e elōn̄ wāween ko rem̧m̧anļo̧k n̄an bōk kōjeraam̧m̧an ko an tampeļ n̄an ajri ro retiljek Nejin. Jekar kappukot tōl aolep iien kōn ewi wāween an laļ in jokun wōt juon im kōmeļeļe ko an tampeļ jokun wōt juon, bujen ko, im kain̄i ko men̄e oktak in kajin im m̧anit.

Ium̧win tōl eo an Irooj im ilo uwaak n̄an jar ko ad, oktak ko kiiō kōn wāween jerbal ko rekar kōm̧m̧an. E ej E eo im ekōņaan bwe kwon meļeļe kōn alikkar eļap jim̧we in ta eo kwoj kōm̧m̧ane bujen ko n̄an kōm̧m̧ani. E ej E eo im ekōņaan bwe lukkuun en̄jake kain̄i ko An rekwojarjar. E ekōņaan bwe kwon meļeļe anemkwoj ko kwomaron̄ kōm̧m̧ani, kallim̧ur ko, im eddo ko. E ekōņaan bwe en wōr am̧ loļo̧kjeņ ko ilo jetōb im elewetak ko kwoj jan̄in kar kili m̧okta. Menin Ej kōņaan jān aolep tampeļ patron ro, jekdo̧o̧n ia eo rej jokwe ie.

Kiiō oktak ko ilo jerbal in tampeļ ko, im ro jet me renaaj itok tokālik, rej kam̧ool ko rej wōnm̧aanļo̧k bwe Irooj ej lukkuun tōl Kabun̄ eo An. E ej litok iien ko rem̧m̧an n̄an kajjojo iaad bwe jen kōkajoorļo̧k pedped ko in jetōb ko ad wājabdikļo̧k ilo ad likūt ilo ioļapļap in mour ko ad Ippān im ilo kain̄i ko im bujen ko an tampeļ eo An. N̄e kwoj bōktok peba in mālim eo n̄an deļo̧n̄e tampeļ eo am̧, juon bōro erub, im juon ļōmņak ej kappukot m̧weo im̧ōn ekkatak an Irooj, E enaaj katakin eok.

Enaaj ke ettoļo̧k eo, apan̄ in nan̄inmej, ak jon̄ak ko jet rej bōbrae am̧ pād ilo tampeļ ilo juon iien, ij karuwaineneik eok bwe kwon kakoņe juon iien ilo iien ko am̧ n̄an kōmālmele ilo ļōmņak eo am̧ bujen ko kwaar kōm̧m̧ani.

Eļan̄n̄e kwoj jan̄in de iakwe etal n̄an tampeļ eo, en emakijkij am̧ etal—en jab dik. Kōtļo̧k bwe Irooj, jān Jetōb eo An, en katakin im im̧we eok ijeņ. Ij kallim̧uri eok bwe iien ej itok, tampeļ eo enaaj juon jikin kōjparok, kaenōm̧m̧an, im revelesōn.

Eļan̄n̄e ekar pidodo n̄an n̄a bwe in kōnono juon ilo̧k juon ippān aolep rūm̧m̧an ded ro, ij akweļap ippemi bwe kom̧win kappukot juon m̧ōttam̧ eo komaron̄ in liāp ippān ilowaan tampeļ eo. Komaron̄ ļōmņak ta oktak eo menin enaaj kōm̧m̧ane ilo mour eo am̧. Ij kallim̧ur bwe enaaj kōm̧m̧an aolep oktak ko. Ilo am̧ m̧are ilowaan tampeļ eo im ro̧o̧lļo̧k aolep iien, kwonaaj kajoorļo̧k im bōk tōl ilo kālet ko am̧.

Eļan̄n̄e imaron̄ kōnono ippān kajjojo em̧m̧aan im kōrā ro ripālele ro rej jan̄in liāp ilowaan tampeļ eo, ij akweļap ippemi n̄an bōk bun̄tōn ko remenin aikuj n̄an bōk kain̄i in ej kōbālbel, ej ukōt mour.16 Enaaj ke kōm̧m̧ane juon oktak? Eļan̄n̄e wōt im kwoj kōņaan eddōkļo̧k n̄an indeeo im kōņaan ippān doon n̄an indeeo. Kōņaan ippān doon n̄an indeeo eban kōm̧m̧ane menin. Ejjeļo̧k bar juon ceremony ak koņ enaaj kōm̧m̧ane menin.17

Eļan̄n̄e imaron̄ kōnono n̄an kajjojo m̧aan ak kōrā ro eto aer kōņaan m̧are ak rej jan̄in de loe kōm̧pānien eo n̄an indeeo, ij rōjan̄ eok bwe kwon jab kōttar m̧ae iien m̧are bwe kwon maron̄ bōk mennin letok kwojarjar eo ilo m̧weo im̧ōn Irooj. Jino kiiō n̄an ekkatak im en̄jake ta meļeļein kōņak nuknuk in tariņae kōn kajoor an priesthood eo.

Im n̄an kom̧ kajjojo ro rekar kōm̧m̧an bujen ko an tampeļ, ij akweļap ippemi n̄an kappukot—jar im jokun wōt juon—n̄an meļeļe bujen ko an tampeļ im kain̄i ko.18 Kōjem ko ilo jetōb renaaj peļļo̧k. Kwonaaj ekkatak wāween kōjepel ikōtaan lan̄ im laļ, ewi wāween n̄an kajjitōk n̄an enjeļ an Anij pād ippem̧, im ewi wāween an em̧m̧anļo̧k am̧ bōk tōl jān lan̄. Kijejeto ko am̧ retiljek n̄an kōm̧m̧an āindein renaaj kapenļo̧k im kōkajoorļo̧k pedped eo am̧ ilo jetōb.

Ro jeiū im jatū rejitōn bōro, n̄e jerbal in kōkāāl ko n̄an Salt Lake Temple rej dedeļo̧k, enaaj ejjeļo̧k jikin ekōjparok ilo iien m̧akūtkūt laļ ilo Salt Lake Valley ijjelo̧kin ilowaan tampeļ in.

Barāinwōt, jabdewōt iien jabdewōt men rej waļo̧k ilo mour eo am̧, jikin eo ekōjparok n̄an mour ilo jetōb ej mour ilowaan bujen ko an tampeļ eo am̧!

Jouj tōmak eō n̄e ij ba bwe n̄e pedped eo am̧ ilo jetōb ej ekkal pen ilo Jisōs Kraist, kwojjab aikuj in jab mijak. Ilo am̧ m̧ool wōt n̄an bujen ko kwaar kōm̧m̧ani ilo tampeļ eo, kwonaaj kajoorļo̧k kōn kajoor eo An. Innām, n̄e m̧akūtkūt in laļ ilo jetōb rej waļo̧k, kwonaaj maron̄ jutak pen kōnke pedped eo am̧ ilo jetōb epen im eban em̧m̧akūtkūt.

Ij iakwe kom̧, ro jeiū im jatū rejitōn bōro. Mool kein ijeļā: Anij, Jemedwōj Ilan̄, ekōņaan bwe kwon kālet n̄an itok n̄an m̧weo Ippān. Karōk eo An kōn eddōkļo̧k eo ejjeļo̧k jem̧ļo̧kin ejjab kaipokpok, im ej kautiej anemkwoj eo am̧. Kwoj anemkwoj n̄an kālet wōn eo kwonaaj erom̧—im ippān wōn eo kwonaaj pād ippān—ilo laļ eo ej itok!

Anij emour! Jisōs ej Kraist eo! En̄in ej Kabun̄ eo An, ekar jepļaaktok n̄an jipan̄ eok kakūrm̧ool mejān kajjik eo am̧ ekwojarjar. Ij kwaļo̧k aō kam̧ool ilo et eo ekwojarjar etan Jisōs Kraist, amen.

Kakeememej ko

  1. Lale “Bedbed eo Ebin,” Al, no. 5.

  2. Bwe “n̄e devil … [ej jilkinļo̧k] kōto ko an [rekajoor], … enaaj ejjeļo̧k an kajoor [iood] …kōnke ejm̧aan eo [jej] ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄” (Hilam̧ōn 5:12; eoon eo eaorōk kar kobaiktok).

  3. Lale Katak im Bujen Ko 109:15, 22.

  4. Katak im Bujen Ko 38:30; barāinwōt lale Katak im Bujen Ko 10:55.

  5. Lale Moses 5:5–6.

  6. Bible Dictionary, “Temple.”

  7. N̄an waanjon̄ak, lale Exodus 28; 29; Livitikōs 8. Tabernacle eo an Moses kar ņa etan “m̧ōn kallim̧ur eo” (Bōnbōn 9:15) im juon “m̧ōn kōppād in kōnnaan” (Exodus 38:21). Tampeļ eo an Solomon kar kakkure ilo 587 BC., jejjo iiō ko remootļo̧k ālkin an kar baam̧le eo an Liai em̧akūt jān Jerusalem. Jepļaaktok eo an tampeļ in jān Zerubbabel ekar bōk jikin 70 iiō ko tokālik. Innām ekar jorrāān kōn kijeek ilo 37 BC. Herod ekar kōdabakbakļo̧k tampeļ eo ilo tūrinļo̧k 16 BC. Innem tampeļ in, Jisōs ekar jeļā kae, kar kakkure ilo AD 70. Nipai ekar en̄jake eļap kōn tampeļ ilo an etal “emmakijkijļo̧k n̄an toļ eo,” im jar (1 Nipai 18:3) im tokālik, ilo Amedka kar kalōk juon tampeļ “kalōk e āinwōt jekjekin tampeļ eo an Solomon,” men̄e ekar dik an ainōknōk (lale 2 Nipai 5:16).

  8. Lale Katak im Bujen Ko 88:119; 124:31.

  9. Lale Katak im Bujen Ko 110:13–16; 124:28. Dōkā in jabōn em̧ eo n̄an Nauvoo Temple kar likūti ilo Eprōļ 6, 1841, jejjo allōn̄ jān iien eo Josep Smith ekar bōk revelesōn n̄an kalōke. Nauvoo Temple ekar ļapļo̧k jerbal ko an. N̄an waanjon̄ak, Irooj ekar kōmeļeļeiki bwe juon jikin peptaij ekar aikuj n̄an Armej ro Rekwojarjar n̄an aer peptaiji ro rekar mej (lale Katak im Bujen Ko 124:29–30).

  10. Lale Katak im Bujen Ko 131; 132. Katak im Bujen Ko 128 ekoba juon bwebwenato Josep Smith ekar je n̄an Armej ro Rekwojarjar kōn peptaij kōn remej. Ijeņ ekar kwaļo̧k bwe lo̧mo̧o̧r an ro remej “aikuj im eaorōk n̄an lo̧mo̧o̧ren eo ad, … [bwe] er ijello̧kwid reban maron̄ weepān—im kōj ijello̧kun rimej ro ad jeban weeppān” (Katak im Bujen Ko 128:15).

  11. Joseph Smith, in Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 454.

  12. “Rijeje Bwebwenato an Kabun̄ in George A. Smith ekar ba bwe 5,634 em̧m̧aan ro im kōrā ro jeid im jatid rekar bōk menin letok kwojarjar eo aer jim̧ettan ke ekar dedeļo̧k Nauvoo Temple ilo Tijem̧ba 1845 im Jānwōde 1846. Liāp ko an ripālele ro ekar wōnm̧aanļo̧k wōt jān Pāp. 7, [1846,] ilo iien eo ekar lōn̄ļo̧k jān 2,000 rekar koba ippān doon kōn priesthood eo n̄an iien in im n̄an indeeo” (Bruce A. Van Orden, “Temple Finished before Exodus,” Deseret News, Dec. 9, 1995, deseret.com; see also Richard O. Cowan, “Endowments Bless the Living and Dead,” Church News, Aug. 27, 1988, thechurchnews.com).

  13. “Ta eo kwoj kōtmāne bwe baba ro renaaj kar ba eļan̄n̄e remaron̄ kar kōnono jān rimej ro? Renaaj ke ba, ‘Jekar likūti ijin taujin iiō ko, ijin m̧win im̧ōn kalbuuj, ej kōttar n̄an an itok tōre in bōk eddo in ej itok? Etke, eļan̄n̄e ekar wōr aer kajoor in jourur ko ilan̄ renaaj pād ilo ad ron̄, eļan̄n̄e remaron̄ ak kile aorōk in jerbal eo jej jerbale. Aolep enjeļ ro ilo lan̄ rej reilo̧k n̄an jarjepju in edik, im rōjan̄ er n̄an lo̧mo̧o̧r eo an baam̧le in armej ro … N̄e ij ļōmņak kōn unin kōnono in, ikōņaan bwe lo̧ ko an jourur ko jiljilimjuon ren karuj armej ro” (Discourses of Brigham Young, sel. John A. Widtsoe [1954], 403–4).

  14. Harold B. Lee, “God’s Kingdom—a Kingdom of Order,” Ensign, Jan. 1971, 10. Lale barāinwōt juon ennaan jān Būreejtōn Wilford Woodruff ilo 1896; ekar ba: “Ikōņaan ba, āinwōt Būreejtōn eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata, bwe jej aikuj wōnm̧aanļo̧k wōt im eddōkļo̧k. Jejjan̄in [bōke] kōn revelesōn. … Būreejtōn [Brigham] Young, eo ekar ļoor Būreejtōn Josep Smith, ekar tōltok kōj n̄an ijin. Ekar ejaake tampeļ kein im kōm̧m̧ani kōttōbar ko an kūr eo an im opiij. … Ekar jab bōk aolep revelesōn ko me rej iookļo̧k jerbal in, barāinwōt Būreejtōn Taylor, barāinwōt kar Wilford Woodruff. Enaaj ejjeļo̧k jem̧ļo̧kin jerbal in m̧ae iien ewāppen” (The Discourses of Wilford Woodruff, sel. G. Homer Durham [1946], 153–54).

  15. Lale 3 Nipai 29:8–9.

  16. Lale Katak im Bujen Ko 131:2, 4.

  17. Lale Katak im Bujen Ko 132:7.

  18. Elder John A. Widtsoe ekar je: “N̄an em̧m̧aan im kōrā eo, eo ej etal n̄an tampeļ eo, kōn māj ko reppeļļo̧k, eo̧ron̄ kōkkaļļe ko im bujen ko, im kōm̧m̧ane juon kijejeto eo edim n̄an meļeļe likio in meļeļe eo an, Anij ej kōnono naan eo An, im revelesōn ko rej itok. Menin letok kwojarjar eo jejjet kōkkaļļe eo an bwebwe wōt enaaj kajjieon̄ kōmeļeļeiki, elukkuun obrak kōn revelesōn ko n̄an ro rej kōjerbale kajoor eo aer n̄an kappukot im lale, bwe ejjeļo̧k armej emaron̄ in kōmeļeļeiki ak kalikkar wāween ko repidodo n̄an jokwe ilo jerbal in tampeļ eo. Menin letok kwojarjar eo kar letok kōn revelesōn emaron̄ em̧m̧anļo̧k meļeļe kōn revelesōn” (in Archibald F. Bennett, Saviors on Mount Zion [Sunday School manual, 1950], 168).