Juon Im̧ōn Elaajrak Ekoņ
“Elaajrak ekoņ“ ej juon wāween eo epidodo, ejim̧we, im ejjejōt n̄an an Irooj katakin kōj, ajri ro Nejin, pedped in katak ko rem̧ool.
Ilo jerbal eo aō ilo mour in im ilo jerbal eo aō ilo Kabun̄ in, em̧ōj aō kōm̧m̧ane menin taujin kattōn—ak ejjāmin m̧okta jān em̧m̧aan rein 15 rej jijet wōt ilikū. Ij en̄jake jar ko ami im aer.
Ro jeiū im jatū, n̄aij juon lukkuun armej in Kingdom in Tonga ilo South Pacific im kar dik im rūttoļo̧k ilo North Amedka. Nan̄inmej in ajedeed em̧ōj an dāpij bukwi, bōlen taujin mijenede ro in Tonga ro rej jerbal ipeļaakin laļ in jān aer ro̧o̧l n̄an aelōn̄ eo aer ejitōn bōro kōn an kilōk border ko. Jet elder in Tonga ro rej pād ilo mijen ko aer ium̧win jilu iiō ko im sister ro eļāļo̧k jān ruo iiō ko! Rej kijenmej wōt im kōttar kōn tōmak eo eļap jeļā kake kōm kake. Ak ilo tōre in, kom̧in jab leln̄o̧n̄ n̄e jet iaer ro rej jerbal ilo ward ko im stake ko ami eļapļo̧k aer āinwōt n̄a—ļōļļap im iuwaņ. Jej kam̧m̧oolol kōn mijenede ro aolep jikin kōn kijejeto in jerbal ko aer, men̄e aitokļo̧k ak kaduļo̧k jān ke rekar kōtmene kōn nan̄inmej in ajedeed.
Juon Jabōt ke ikar juon tikōn, ikar pād ilo lokatok eo kōn juon tūre in dān leto letak kwojkwoj eo ke juon kōrā ekar deļo̧n̄ e tok m̧ōnjar eo. Ikar jipadōkļļo̧k im leļo̧k n̄an e tūre eo. Ekar kōm̧ajiljil bōran, ettōn̄ dikdik, im bōke juon kap in dān. Ekar rūm̧ijtok n̄an an bōk bilawe eo. Jidik iien ālikin iien in, home teacher eo aō, Ned Brimley, ekar katakin n̄a bwe elōn̄ wāween ko im kōjeram̧m̧an ko an gospel in an Jisōs Kraist rej litok ilo elaajrak eo ekoņ.
Tokālik ilo wiik eo, Ned im kōmpānien eo an rekar itok n̄an m̧weo im̧ōm kōn juon katak epen meļo̧kļo̧k e. Ned ekar kakeememej kōm bwe ekar wōr juon koņ kōn wāween an Irooj kar kōm̧anm̧an laļ in. Irooj ekar lukkuun kōjparok an kōmeļeļeik n̄an Moses koņ eo ilo wāween An kar kōm̧anm̧an laļ in. M̧oktata, E ekar jinoe ilo an kōjenolo̧k meram jān marok, innem dān jān āne em̧orā. Ekar leļo̧k mour n̄an menin eddōk im menin mour ko m̧okta jān an kwaļo̧k n̄an laļ in menin kōm̧anm̧an eo an eļaptata ej kab m̧ōj kōm̧anm̧an e; armej, jinoe ippān Adam im Iv.
“Im Anij ear kōm̧anm̧an armej ilo nememein wōt E, ilo wāween Anij ear kōm̧anm̧an e; m̧aan im kōrā Ear kōm̧anm̧an er. …
“Im Anij ear lo men otemjej Ear kōṃanṃani, im lo, re kanooj eṃṃan” (Jenesis 1:27, 31).
Irooj ekar bun̄ buruōn. Im E ekar kakkije ilo raan eo kein kajiljilimjuōn.
Elaajrak eo ekoņ ilo wāween an kar laļin kōm̧anm̧an ejjab letok wōt n̄an kōj jidikin ta eo earōktata ippān Anij ak ej barāinwōt etke im n̄an wōn Ekar kōm̧anm̧an laļ in n̄an.
Ned Brimley ekar kajem̧ļo̧k katak eo an eim̧we kōn juon ennaan ekadu: “Vai, m̧weo Im̧ōn Anij ej juon m̧ōn koņ. Ej kōtmene bwe kwon mour kōn koņ. Ilo elaajrak eo ejim̧we. Ekōņaan bwe kwon mijen m̧okta jān am̧ m̧are.” N̄an kiiō, ritōl ro ilo Kabun̄ in rej katakin bwe “Irooj ej kōtmene kajjojo likao ro rōkeke n̄an kappopo n̄an jerbal. … Jiron̄ ro … me rekōņaan jerbal rej aikuj bar pojak” (Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 24.0, ChurchofJesusChrist.org). Brother Brimley ekar wōnm̧aanļo̧k wōt: “Irooj ekōņaan bwe kwon m̧are m̧okta jān an wōr nejūm̧ ajri ro. Im E ekōņaan bwe kwon wōnm̧aanļo̧k wōt im kōļapļo̧k tōļōn ko am̧ ilo am̧ kappukot jeļāļo̧kjeņ. Eļan̄n̄e kwoj kālet n̄an mour mour eo am̧ ilo elaajrak, kwonaaj lo an mour in ļapļo̧k an pen im pok.
Brother Brimley ekar barāinwōt katakin kōj bwe kōn katok in pinmuur eo An, Rilo̧mo̧o̧r ej jipan̄ kōj kōjepļaaktok koņ eo n̄an mour ko ad repok ak jān elaajrak eo ejjab koņ jān kālet ko rebōd ad make ak an ro jet.
Jān iien eo m̧aantak, ewōr aō kōņaan ilo “elaajrak ekoņ.” Em̧ōj aō ejaake juon m̧wil in kappukot jon̄ak ko relaajrak ilo mour in im ilo gospel in.
Elder David A. Bednar ekar katakin pedped in katak in: “Ilo am̧ ekkatak, katak, im mour kōn gospel eo an Jisōs Kraist, emakijkij an elaajrak itok ilo kōmeļeļe. Ļōmņak, n̄an waanjon̄ak, katak ko jej ekkatak kōn men ko raorōktata ilo jetōb jān koņ in iien ko reļļap me rej bōk jikin ilo an tarlep in gospel eo an Rilo̧mo̧o̧r kar jepļaatok ilo raan kein āliktata.”
Elder Bednar ekar kōllaajrake Visiōn eo M̧oktata im waļo̧ktok eo an Moronai jinountata n̄an Josep Smith ilo an m̧oktata katakin ļadik eo ej rikanaan, piktokin im m̧wilin Anij, tokālik eddo eo an Bok in Mormon im Elijah renaaj bōk jikier ilo aiintok Israel ilo jait ko jim̧ōr in ran̄ōl eo ilo epepen in āliktata.
Elder Bednar ekar kajjem̧ļo̧k: “Elaajrak in eim̧we ej juon kōmeļeļe kōn men ko an jetōb im men eo aorōktata ippān Anij” (“The Hearts of the Children Shall Turn,” Liahona, Nov. 2011, 24).
Juon ekkatak ikar kōm̧m̧ane ej bwe “elaajrak ekoņ“ ej juon wāween eo epidodo, ejim̧we, im ejjejōt n̄an an Irooj katakin kōj, ajri ro Nejin, pedped in katak ko rem̧ool.
Jekar itok n̄an laļ in n̄an ekkatak im bōk en̄jake ko jeban kar bōk ilo bar juon wāween. Eddōkļo̧k eo ad ejenolo̧k n̄an kajjojo iaad im m̧ōttan eo aurōk ilo karōk eo an Jemedwōj Ilan̄. Eddōkļo̧k eo ad ilo ānbwin im ilo jetōb ej ijinoe ilo jon̄ak ko im eddōkļo̧k jidik jidik ilo ad bōk en̄jaake ko relaajrak.
Alma ej kwaļo̧k juon katak ekajoor kōn tōmak—bōk jān waanjon̄ak eo kōn juon ine, eo, eļan̄n̄e, kōjparoke im naajdik ilo jim̧we, enaaj eddōkļo̧k jān juon ine edik n̄an juon wōjke eo ededelo̧k an eddōk, erūtto jon̄an ej kalle leen ko rekaijōljōl (lale Alma 32:28–43). Katak eo in bwe tōmak eo am̧ enaaj eddōkļo̧k ilo am̧ kōm̧m̧an jikin im kaddōke ine eo—ak naan eo an Anij—ilo būruomi. Tōmak eo am̧ enaaj ļapļo̧k ilo an naan ko an Anij jinoe “ļapļo̧k ilo buruōm̧” (eoon 28). Bwe ej “juļ, im eo̧n̄, im jino in eddek” (eoon 30) ej jim̧ōr juon men jej loe im juon kōmeļeļe. Ej barāinwōt elaajrak.
Irooj ej katakin kōj kajjojo ekkar n̄an maron̄ eo ad n̄an ekkatak im wāween ad ekkatak. Eddōkļo̧k eo ad ej pedped wōt ioon ikdeleel eo ad, ad kōņaan jeļā, jon̄an tōmak eo ad, im ad meļeļe.
Kar katakin Nipai kōn ta eo Josep Smith enkar ekkatak ilo Kirtland, Ohio, ilōn̄inļo̧k 2,300 iiō ko tokālik: “Bwe lo, āindein Irooj Anij ej ba: Inaaj leļo̧k n̄an ro nejin armej lain im bar lain, naan in kain̄i im bar naan in kain̄i, ijin jidik im ijjuweo jidik; im em̧ōņōņō ro rej eo̧ron̄ naan in kain̄i ko Aō, im wūjleptok lo̧jiln̄ier n̄an Aō kōkapilōklōk, bwe renaaj jeļā mālōtlōt.” (2 Nipai 28:30).
Bwe jej ekkatak, “ļain im ļain, naan in kain̄i im bar naan in kain̄i, ijin jidik im ijjuweo jidik” ej bar juon alen elaajrak.
Ļōmņak kōn kōmeļeļe kein ijin ilaļ em̧ōj ad ron̄ kaki ilo eiten aolepen mour ko ad: “M̧okta men ko m̧okta” ak “Naajidik er milik m̧okta jān jālele.” Ak bar “Jej aikuj etetal m̧okta jān ad ettōr”? Kajjojo iaan wāween kōnono kein rej kōmeļeļeik juon men eo me ej elaajrak.
Kabwilōn̄lōn̄ ko rej jerbal ekkar n̄an juon elaajrak ekoņ. Kabwilōn̄lōn̄ ko rej bōk jikin eļan̄n̄e jej m̧okta kōjerbal tōmak. Tōmak ej kwaļo̧k kabwilōn̄lōn̄.
Likao ro rej barāinwōt ekkapit n̄an opij ko an Priesthood eo an Aaron ilo elaajrak, ekkar n̄an iiō eo an juon eo ej ekkapit: tikōn, rūkaki, innem pris.
Kain̄i ko in mour indeeo im mour eo ekwojarjar indeeo rej bar elaajrak. Jej peptaij m̧okta jān ad bōk menin letok eo an Jetōb Kwojarjar. Kain̄i ko an Tampeļ rej ejjeļo̧k oktak elaajrak. Em̧ool āinwōt an eo m̧ōtta Ned Brimley katakin eō ilo māletlet, kwojkwoj eo ej elaajrak—ej ijjinoe ippān pilawe eo, innem tokālik dān eo.
“Im ke raar m̧ōn̄ā, Jisōs ar bōk pilawā im ruje, im kōjeraam̧m̧an e, im leļo̧k n̄an ro rikaļooran, im ba, Bōke, m̧ōn̄ā; en̄in ej ānbwinū.
“Im Eaar bōk kap eo, im ke em̧ōj An leļo̧k kam̧m̧oolol, Eaar leļo̧k e n̄an er; im raar aolep idaak jān e;
“Bwe men in daō da in kallim̧ur, eo e to̧o̧r ļo̧k kōn elōn̄ n̄an juurļo̧k jero̧wiwi ko” (Matu 26:26–28).
Ilo Jerusalem im Amedka, Rilo̧mo̧o̧r ekar kōm̧mane kwojkwoj eo ilo ejja koņ in wōt.
“Lo, m̧weo Im̧ō ej juon im̧ōn koņ, Irooj Anij ej ba, im jab juon im̧ōn pok“ (Katak im Bujen Ko 132:8).
Ukweļo̧k ej elaajrak. Ej ijjinoe kōn tōmak ilo Jisōs Kraist, men̄e kōn jidik wōt. Tōmak aikuj wōr ettā, eo ej juon men aurōk in “bōro erūp im jetōb ettā” (2 Nipai 2:7).
M̧ool, pedped in katak ko m̧oktata ilo gospel in rej elaajrak. “Kōmij tōmak bwe pedped ko im kain̄i ko m̧oktata ilo Gospel eo rej: kein kajuōn, Tōmak ilo Irooj Jisōs Kraist; kein karuo, Ukweļo̧k; kein kajilu, Baptaij im tulo̧k bwe en karreoik kōj jān jerawiwi ko ad; kein kemen, Likit pā ko ioon bar n̄an bōk menin letok eo an Jetōb Kwojarjar” (Laajrak in Tōmak ko 1:4).
Kiin̄ Benjamin kar katakin armej ro doon m̧ool in aorōk: “Im lale bwe aolep men kein rej kōm̧m̧an ilo ļoļātāt im koņ; bwe e jab aikuj bwe juon armej en ettōr m̧ōkajļo̧k jān kajoor eo an. Im bar juon alen, emennin aikuj bwe en tiljek, bwe en maron̄ tōblaļ e wōņāān eo; kōn menin aolep men kein rej aikuj kōm̧m̧an ilo koņ” (Mosaia 4:27).
Jen mour mour ko ad kōn koņ im kappukot n̄an ļoor elaajrak eo Irooj em̧ōj an karōke n̄an kōj. Jenaaj jeram̧m̧an ilo ad kappukot im ļoor jon̄o̧k ko im elaajrak eo im Irooj ej katakin ta eo aurōktata n̄an E. Ilo āt eo ekwojarjar etan Jisōs Kraist, amen.