Iakwe an Anij; Mennin Kam̧ōņōņō tata n̄an Jetōb
Iakwe eo an Anij jejjab loe ilo jekjek ko in mour ko ad, bōtaab ilo An pād ilo mour ko ad.
Ro jeiū im jatū, kojeļā ke ewi likieo in an Anij, Jemed Ilan̄, iakwe kwe? Em̧ōj ke am̧ en̄jake iakwe eo An ilo tum̧wilaļ in mour eo am̧?
N̄e kojeļā im meļeļe jon̄an likieo in iakwe eo n̄an eok āinwōt juon ajri nejin Anij, ej ukōt aolep men. Ej ukōt wāween am̧ en̄jake kōn kwe make n̄e kwoj kōm̧m̧an bōd. Ej ukōt wāween am̧ en̄jake n̄e men ko reppen rej waļo̧k. Ej ukōt wāween am̧ kalimjōk kien ko an Anij. Ej ukōt wāween am kalimjōk ro jet im jon̄an eo ippām n̄an kōm̧m̧an oktak.
Elder Jeffrey R. Holland ekar katakin: “Kien eo eļap m̧oktata an aolep indeeo ej n̄an iakwe Anij kōn aolepān ad bōro, maron̄, ļōmņak, im kajoor—en̄in ej kien eo eļap m̧oktata. Ak m̧ool eo eļap m̧oktata kōn indeeo ej bwe Irooj ej iakwe kōj kōn aolepān An bōro, maron̄, ļōmņak, im kajoor.”1
Ekōjkan an kajjojo iaad jeļā ilo tum̧wilaļ in mour ko ad m̧ool eo kōn mour indeeo?
Rikanaan Nipai kar kwaļo̧k n̄an e ilo juon visōn menin kam̧ool eo ekajoortata kōn iakwe eo an Anij. Ilo an kalimjōkļo̧k wōjke in mour eo, Nipai ekar kajjitōk n̄an jeļā meļeļein. Ilo uwaake, juon enjeļ ekar kwaļo̧k n̄an Nipai juon jikin, juon m̧am̧a, im juon nin̄nin̄. Ilo an Nipai kalimjōkļo̧k jikin eo Nazaret im Meri eo jinen ewānōk, ej jibwe nin̄nin̄ Jisōs ilo pein, enjeļ eo ekar ba, Lo Lam an Anij, aaet, em̧ool eo Nejin Jemād Indeeo!”2
Ilo iien eo ekwojarjar, Nipai ekar meļeļe bwe ilo ļotak eo an Rilo̧mo̧o̧r, Anij ekar kwaļo̧k iakwe eo An erreo im wāppen. Iakwe eo an Anij, Nipai ekar kam̧ool, “eo kajeeded e ijoko ilo būruōn ro nejin armej.”3
Jemaron̄ pijaikļo̧k iakwe eo an Anij āinwōt juon meram ej romaak jān wōjke in mour eo, romaakļo̧k n̄an aolepān laļ in n̄an būruwōn ajri ro nejin armej. Meram eo an Anij im iakwe eo an rej leļo̧k mour n̄an aolep kōm̧anm̧an ko An.4
Jet iien jej bōd ilo ad ļōmņak bwe jemaron̄ wōt en̄jake iakwe eo an Anij ālikin ad ļoor aen in depdep eo im bōk leen wōjke eo. Iakwe eo an Anij, ijoke, ejjab ro wōt rej itok n̄an wōjke eo rej bōke ak ej lukkuun kajoor eo me ej kipel kōj n̄an kappukōt wōjke eo.
“Kōn menin, e in elukkuun ļap kōttōpare jān men ko otemjej” Nipai ekar katakin, im enjeļ eo ekar ba, “Aaet, im mennin kam̧ōņōņō tata n̄an jetōb.”5
Ron̄oul iiō ko remootļo̧k, juon eo ejitōnbōro uwaan baam̧le e ekar eļļo̧k jān Kabun̄ in. Ekar būjin an kajjitōk ko rejjan̄in kar uwaak. Kōrā eo ippān, juon rioktak tok, ekar pād wōt im m̧ool ilo tōmak eo an. Rekar kate er jerbal n̄an dāpij m̧are eo aer ilo jekjek ko reoktak rekar wallōn̄tak.
Iiō eo ļo̧k ekar jeik jilu kajjitōk ko kōn Kabun̄ in me rekar pen n̄an an erre im ekar jilkinļo̧k n̄an ruo ripālele ro im ekar m̧ōttā ippān ium̧win elōn̄ iiō ko. Ekar kūr er n̄an kejokļo̧kijeņ kōn kajjitōk ko im itok n̄an iien kōjota eo n̄an kwaļo̧k ļōmņak ko aer kaki.
Ālikin lotok eo an ro m̧ōttan, ekar etal n̄an ruum̧ eo im jino jerbale juon būrajeek. Kōm̧m̧ao eo joteen eo im iakwe eo ro m̧ōttan rekar kwaļo̧k n̄an e ekar itok n̄an im̧aantata kōlmenļo̧kijeņ eo an. Tokāļik ekar jeje bwe kar kipel e n̄an kabōjrak jerbal eo an. Ekar ba: “Juon meram emeram ekar kobrak jetōb eo aō. … Ekar wōr aō iminene kōn en̄jake in jeļāļo̧kijeņ in, bōtaab ilo jekjek in ekar wōnm̧aaņļo̧k wōt ilo an kajoorļo̧k jān kar m̧okta im ekar jako ium̧win jet minit ko. Ikar jijet im kōlmenļo̧kijeņ kōn en̄jake eo, eo ikar kiiō meļeļe kake āinwōt juon kwaļo̧k in iakwe eo an Anij n̄an eō. Ikar en̄jake im̧we jān jetōb me ekar ba in maron̄ jepļaak n̄an jikin jar im kwaļo̧k iakwe in an Anij ilo ta eo ij kōm̧m̧an ijo.”
Innem tokālik ekar ļōmņak kōn kajjitōk ko an. En̄jake eo ekar bōke ekar bwe Anij ej kautiej kajjitōk ko an im bwe ilo an jab bōk uwaak ko relikieo im meļeļe ejjab aikuj kabōjrak e jān an wōnm̧aanļo̧k wōt.6 Ej aikuj kwaļo̧k iakwe eo an Anij ippān aolep ilo an wōnm̧naaļo̧k wōt im kappukot. Ilo an kar mour kōn im̧we eo, ekar en̄jake an iookļo̧k Josep Smith, eo ekar ba ālikin Visiōn eo an M̧oktata, “Jetōb eo aō ekar obrak kōn iakwe, im ilo elōn̄ raan ko ikar m̧ōņōņō kōn lan̄lōn̄ eļap.”7
Menin kabwilōn̄lōn̄, jet allōn̄ ko rekadu tokālik, in uwaan baam̧le in ekar bōk ejja kūr eo wōt ekar dāpiji iiō ko m̧oktaļo̧k. M̧oktata in an kar bōk kūr eo, ekar kōm̧m̧an eddo ko an āinwōt juon membōr eo eļap koņaan ilo Kabun̄ in. Kiiō kajjitōk eo n̄an e ekar jab “Ekōjkan aō maron̄ kakūrm̧ool kūr in?” bōtaab ekar “Ekōjkan aō maron̄ kwaļo̧k iakwe eo an Anij ilo jerbal ko aō?” Kōn bun̄tōn in ekāāl, ekar en̄jake eļap lan̄lōn̄, meļeļein, im un eo ilo aolepān jekjek ko ilo kūr eo an.
Ro jeiū im jatū, ekōjkan ad maron̄ bōk kajoor in oktak ilo iakwe eo an Anij? Rikanaan Mormon eaar karuwaineneik kōj n̄an “jar n̄an Jemād kōn aolep kajoor in bōro, bwe kom̧in maron̄ obrak kōn iakwe eo An, eo Eaar leļo̧k ioon aolep ro rej rikaļoor ro an rem̧ool an Nejin, Jisōs Kraist.”8 Mormon ekar jab wōt karuwaineneik kōj n̄an jar bwe jen maron̄ obrak kōn iakwe eo an Anij n̄an ro jet ak n̄an jar bwe jen maron̄ jeļā kōn iakwe eo erreo an Anij n̄an kōj make.9
Ilo ad bōk iakwe eo An, jej loe eļapļo̧k lan̄lōn̄ ilo ad kate kōj n̄an iakwe im jerbal āinwōt An kar kōm̧mane, erom̧ “rikaļoor ro an rem̧ool an Nejin, Jisōs Kraist.”10
Iakwe eo an Anij ejjab lo ilo jekjek ko in mour ko ad, bōtaab ilo An pād ilo mour ko ad. Jejļā kōn iakwe eo An n̄e jej bōk kajoor ilōn̄inļo̧k kajoor eo ad make im n̄e Jetōb eo An ej boktok jokne, kaenōm̧m̧an, im iaļ. Jet iien emaron̄ naaj pen n̄an en̄jake iakwe eo An. Jemaron̄ jar n̄an kōpeļļo̧k mejed n̄an lo Pein ilo mour ko ad im n̄an lo iakwe eo An ilo aibojooj in kōm̧anm̧an ko An.
Ilo ad kejokļo̧kijeņ kōn mour eo an Rilo̧mo̧o̧r im en̄taan indeeo eo An, jemaron̄ jino meļeļe kōn iakwe eo An n̄an kōj. Jenaaj al ilo kautiej naan ko an Eliza R. Snow: “Kraist ear wujlep mour eo An: Ear erom katok eo.”11 Ettā eo an Jisōs ilo an kar en̄taan n̄an kōj ej kōkajoor jetōb ko ad, kōpeļļo̧k būruōd n̄an kappukot jeorļo̧k bōd ilo Pein im kobrak kōj kōn juon ikdeleel n̄an mour āinwōt An kar mour.12
Būreejtōn Russell M. Nelson ekar je, “Ilo ad kōļapļo̧k ad ikdeelel n̄an erom̧ n̄an kōm̧m̧an bwe mour ko ad ren āinwōt E, enaaj ļapļo̧k im erreeo iakwe eo ad indeeo.”13
Kar keidi ļaddik eo nejim: “Ke ekar 11 aō iiō, n̄a im ro m̧ōtta kōm ekar kālet n̄an kitileekek jān rūkaki eo amim im joļo̧k jimettan in awa eo m̧oktata ilo kūlaaj in Būraimere. Āliktata ke kōm ekar tōpar, kōm ekar bwilōn̄, ke rūkaki eo amim ekar karuwaineneik kōm. Innem ekar jar juon jar eo em̧ool ilo an jar ekar kwaļo̧k an kam̧m̧oolol Irooj bwe kōm ekar kālet n̄an etal n̄an kūlaaj raan eo kōn anemkwōj eo am make. Ijjab maron̄ kemeemej ta eo katak eo ekar ak etan rikaki eo amim, ak kiiō, jet 30 iiō ko tokāļik, kar un̄ur būruwō n̄an kiiō jān iakwe eo erreo ekar kwaļo̧k n̄an n̄a raan eo.”
Ļalem iiō ko remootļo̧k, ikar katak jān juon waanjon̄ak in iakwe indeeo ke ikar etal n̄an Būraimere ilo ward eo ilo Russia. Ikar loe juon sister etiljek ej būkwelōlō ilo m̧aan ruo ajri ro im kwaļo̧k an kam̧ool n̄an er bwe men̄e eļan̄n̄e kar erro wōt ro rej mour ilo laļ in, Jisōs enkar baj wōt en̄taan im mej kōn er wōt.
Ij kwaļo̧k aō kam̧ool bwe ad Irooj im Rilo̧mo̧o̧r ekar mej kōn kajjojo iaad. Ekar juon kwaļo̧k in iakwe eo An indeeo n̄an kōj im n̄an Jemān.
“Ij jeļā bwe aō dri Pinmuur ej mour. Jantōj in ej etok ainemōn! … Ej mour n̄ōn kōjerammōn [kōj].”14
Jen kōpeļļo̧k būruōd n̄an bōk iakwe eo erreo me epād ippān Anij n̄an kōj im kwaļo̧k iakwe eo An ilo aolep kōm̧m̧an ko ad im ro jej erom̧. Ilo āt eo ekwojarjar etan Jisōs Kraist, amen.