Iakwe eo an Anij
Jemedwōj Ilan̄ im ad Ripinmuur rekar kōjeraam̧m̧an kōj kōn kien ko, im ilo pokaki kien ko Aer, jej en̄jake iakwe eo aer elukkuun ewāppen im ļap.
Eļap an kabwilōn̄lōn̄ im wānōk iakwe eo an Jemedwōj Ilan̄.1 An iakwe, Ekar kōm̧anm̧an juon karōk, juon karōk in pinmuur im m̧ōņōņō n̄an letok n̄an kōj iien ko rem̧m̧an im lan̄lōn̄ me jej ikdeleel in būki, im ekoba aolep men ko me ewōr Ippān.2 N̄an bōk menin, Ekar m̧ōņōņō in letok n̄an kōj Nejin Jitōnbōro, Jisōs Kraist, bwe en ad Ripinmuur. “Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.”3 E ej juon Jemān eo erreo an iakwe—n̄an aolep laļ in, im n̄an kōj kajjojo.
Jisōs Kraist ej kwaļo̧k ilo jokkun wōt juon ejja iakwe in wōt an Jemen. Ke Jemedwōj Ilan̄ ekar kōm̧m̧ane karōk in m̧ōņōņō in, Ekar kūr n̄an juon bwe en jerbal āinwōt Rilo̧mo̧o̧r eo n̄an lo̧mo̧o̧ren kōj—juon karōk eo eaorōk. Jisōs ekar ba, “N̄a e, jilkinļo̧k eō.”4 Rilo̧mo̧o̧r “ej jab kōm̧m̧an jabdewōt eļan̄n̄e e jab n̄an jeraam̧m̧an eo an laļ; bwe E ej iakwe laļ, em̧ool jon̄an Eaar likūt mour eo An make bwe en maron̄ bōktok aolep armej n̄an e. Kōn menin, Ekar kakien ejeļo̧k juon Ej jab jiron̄ e bwe ren naj bōk An lo̧mo̧o̧r.”5
Iakwe in ekwojarjar ej aikuj letok eļap kaeņōm̧m̧an im lōke ilo ad jar n̄an Jemen ilo etan Kraist. Ejjeļo̧k juon iaer ej ruwam̧āijet n̄an Er. Jejjab aikuj āliklik in kūr n̄an Anij, men̄e jej en̄jake ad jab mour erreo. Jemaron̄ kōjatdikdik kōn tūriam̧o im em̧m̧an ko an Jisōs Kraist bwe ren ron̄.6 Ilo eļan̄n̄e jej pād ilo iakwe eo an Anij, edik ad pedped ilo aer kōtļo̧k bwe ro jet ren tōl kōj.
Iakwe eo an Anij Ejjab Jekpen Ņae Jerawiwi, Ijeļo̧kin Ej Letok Pinmuur
Kōn iakwe eo an Anij eļap, jet rej kōnono kake āinwōt “ejjeļo̧k jem̧ļo̧kinn,” im ilo ļōmņak ko aer, remaron̄ keirļo̧k ļōmņak in n̄an meļeļein bwe kōjeraam̧m̧an ko an Anij “ejjeļo̧k jem̧ļo̧kier,” im bwe lo̧mo̧o̧r ej “ejjeļo̧k jem̧ļo̧kin.” Rejjab. Jet reminene in ba, “Rilo̧mo̧o̧r ej iakwe eō āinwōt aō bar iakwe E,” im bwe menin em̧ool. Bwe ejjab maron̄ bōk jabdewōt iaad n̄an aelōn̄ in Kiin̄ eo An āinwōt bar kōj, “bwe ejjeļo̧k men ettoon emaron̄ jokwe ijo, ak jokwe ilo im̧aan Mejān.”7 Jerawiwi ko rej aikuj jako m̧okta.
Professor Hugh Nibley ekar je juon iien bwe aelōn̄ in kiin̄ eo an Anij ejjab maron̄ kadeļo̧n̄ jekdo̧o̧n n̄e jidik lipijinjin in jerawiwi: “Jorrāān in jerbal nana ko reddik ej meļeļein bwe laļ ko jet renaaj barāinwōt jorrāān ak jab pād n̄an indeeo. Jidik wōt bwōd ilo juon kapijuknen, doulul, kien, ak m̧wil enaaj kōm̧m̧an bwe en juon menin kauwōtata ilo ad jipadōk mour indeeo.”8 Kien ko an Anij “reppen”9 kōnke ilo aelōn̄ in kiin̄ eo An im armej ro ie remaron̄ dim wōt eļan̄n̄e rej niknik im jelm̧ae nana im kālet em̧m̧an, ilo ejjeļo̧k kalijōkļo̧k.10
Elder Jeffrey R. Holland ekar ba, “Jisōs ekar lukkuun meļeļe ta eo me elōn̄ iaad ilo mantin raan kein rej meļo̧kļo̧k: bwe ewōr juon oktak eaorōk ikōtaan kien eo n̄an jeorļo̧k jerawiwi (eo ewōr Ippān jon̄an eo ejjeļo̧k jem̧ļo̧kin n̄an kōm̧m̧ane) im kakkōļ ņae liajļōļ kake (eo Ejjan̄in kar kōm̧m̧ane juon kōttan).”11
Ijellokin ar jab wanōk, kōn menin, jej maron̄ kōjatdrikdrik n̄an bōk “juon āt im jutak,”12 juon jikin, ilo Kabun̄ eo An im ilo laļ eo an Selestial. Ālkin kalikkare bwe Ejjab maron̄ jekpen ņae ak kalimjōk n̄an jidik jerawiwi, Irooj ej kalikkar n̄an kōj:
“Mekarta, eo ej ukeļo̧k im kōjparoki kien ko an Irooj naaj jeorļo̧k an bōd.”13
“Aaet, im jon̄an emmakijkij in wōt an armej ro aō ukeļo̧k Inaaj jeorļo̧k aer bōd im bōd ko aer ņae Eō.”14
Ukweļok im jouj ekwojarjar rej ņa mejļan lōkapokpok ko:
“Im keememej barāinwōt naan ko Amulek eaar kōnono n̄an Ziezrom, ilo jikin kwelo̧k in Ammōnaia; bwe eaar ba n̄an e bwe em̧ool Irooj Enaaj itok im pinmuuri armej ro An, a bwe E jamin itok n̄an lo̧mo̧o̧ren er ilo jero̧wiwi ko aer, a n̄an lo̧mo̧o̧ren er jān jero̧wiwi ko aer.
“Im E ewōr an kajoor leļo̧k n̄an e jān Jemān n̄an lo̧mo̧o̧ren er jān jero̧wiwi ko aer kōnke ukeļo̧k; kōn menin Eaar jilkintok enjeļ ro An n̄an kwaļo̧k naan ko rem̧m̧an kōn jekjek ko an ukeļo̧k, eo ej bōktok kajoor in Ripinmuur eo, n̄an lo̧mo̧o̧r eo an.”15
Kōn jekjek ko an ukweļo̧k, Irooj emaron̄ letok tūriam̧o ilo an jab kakkure ekajet, im “Anij ej jab bōjrak an Anij.”16
Wāween ko ilo laļ, āinwōt am̧ jeļā, ej rijum̧ae Kraist, ak “jabdrewōt men ijjeļo̧kin Kraist.” Raan kein ad ej āinwōt bar bwebwenato ko ilo Bok in Mormon eo me armej ro rebun̄bun̄ rej kapo ro jet n̄an kōm̧m̧ani men ko renana, m̧ōņōņō kōn m̧ōm̧ an kanniōk, im katakin armej bwe aiin mweie ko an laļ ej unleplep in mour in. Tōmak ko aer ej kwaļo̧k ke “em̧m̧an kōm̧m̧an jidik jerawiwi”17 ak barāinwōt jerawiwi ko rellōn̄, ak ejjeļo̧k juon emaron̄ letok lo̧mo̧o̧r. Ej itok wōt ilo bōtōktōk in Lam̧ eo. Jarlepju eo me ej ba em̧m̧an tata “jabdewōt ijellokin Kraist” ak “jabdewot ijellokin ukweļok” remaron̄ letok ej tōmak eo ejjeļo̧k an pedped rej kwaļo̧k ke ejjeļo̧k jerawiwi, ak n̄e en kar wōr, bwe ejjeļo̧k kaje ko jān jerawiwi. Ijjab maron̄ lo aer bōk lōn̄tak tarpok in ilo iien Ekajet eo Āliktata.18
Jejjab aikuj kajjieon̄ men ko reppen n̄an kōkm̧anm̧an jerawiwi ko ad. Ilo bar juon wāween, jejjab kajjieon̄ men eo epen n̄an jeorļo̧k m̧ōttan jerawiwi ko ad kōn em̧m̧an eo ad make. Kabun̄ in ad ejjab juon kabun̄ in lo bōd an ro jet im ejjab kabun̄ an ro rewānōk, ej juon kabun̄ in pinmuur—pinmuur kōn Jisōs Kraist. Elan̄e jej lubwiljin ro rej ian̄aktok aer kōn bōd, kōn pinmuur eo ar dilaiki ion debwāāl,im “kōn dibetbet ko An jar maron̄ mour.”19
Jan̄nuwaad in Iakwe eo an Rikanaan ro Rej Kwaļo̧k Iakwe eo an Anij
Etō aō baj bwilōn̄ kōn, im barāinwōt en̄jake, jan̄nuwaad in iakwe eo an rikanaan eo an Anij ilo aer kakkōl ko aer ņae jerawiwi. Juon ikdeleel n̄an kalia rejjab kōketak kōj. Ikdeleel eo aer em̧ool ej kwaļo̧k iakwe eo an Anij; ilo m̧ool, e ej iakwe eo an Anij. Rej iakwe ro me rekar jilkinļo̧k er, ro me remaron̄ im ta ko me remaron̄ ainwōt. Āinwōt Irooj, rikarejaran Irooj rejjab kōņaan bwe jabdewōt armej en en̄taan kōn metak in jerawiwi im jokālet ko renana.20
Kar jilkinļo̧k Alma n̄an kwaļo̧k ennaan in ukweļo̧k im pinmuur n̄an juon armej ro eļap an mātōrtōr eo ekar kōņaan bwe en liakeļok, kakkure, im man ritomak rikūrijin ro, ekoba Alma. Em̧ool ekar iakwe er im jan̄nuwaad kōn lo̧mo̧o̧r eo Aer. Ālkin an kar kwaļok kōn pinmuur eo an Kraist n̄an in Ammonihah, Alma ar ba “Im kiiō, ro jeiū im jatū, Ij kōtmāne jān ijo em̧wilaļ tata ilo buruō, aaet, kōn eļap kijooror eo emetak, bwe kom̧in eo̧ron̄ naan ko aō, im juļo̧k jero̧wiwi ko ami, im jab aepedped kōn raan in ami ukeļo̧k; … bwe kom̧ in maron̄ jerkak ilo raan eo āliktata im deļo̧n̄ļo̧k ilo kakkije eo [Anij].”21
Ilo Naan an Būreejtōn Russell M. Nelson, “Ejejjet kōnke jej kea eļap kōn ajri ro nejin Anij bwe jej kajedeed m̧ool eo An.”22
Anij ej Iakwe Eok; Kwoj ke Iakwe E?
Iakwe eo an Jemen im Nejin ej kanemkwoj im ebar koba kōjatdikdik im kōtmene ko. Bar juon alen, kouti Būreejtōn Nelson, “Kien ko an Anij rej kajju waļo̧k jen iakwe eo An ejjeļo̧k jem̧ļo̧kin n̄an kōj im kōņaan eo An n̄an kōj ej n̄an erom̧ aolep men eo jemaron̄ in erom̧.”23
Kōnke Rej iakwe eok, Rej jab kōņaan likūt eok bwe kwon Atajinemjen “āinwōt bar kwe.” Kōnke Irooj ej iakwe eok im ekōņaan bwe kwōn lan̄lōn̄. Kōnke Rej iakwe eok, Rej kōņaan bwe kwon ukweļo̧k kōn en̄in ej iaļ eo n̄an bōk m̧ōņōņō. Ak ej am̧ kālet—Utiej eo Aer ej am̧ anemkwoj in kālet. Kwoj aikuj kālet n̄an iakwe Er, n̄an jerbal n̄an Er, n̄an kōjparok kien ko Aer. Innem Remaron̄ kōjeraam̧m̧an eok eļapļo̧k barāinwōt iakwe eok.
Kōtmene ko aer kōn pedped in katak ko ej bwe jej barāinwōt iakwe. “Eo e jab yokwe e jab jeļā Anij, bwe Anij yokwe.”24 Āinwōt an kar Jon jeje, “Ro Jitōnbōro, eļan̄n̄e āindein an Anij yokwe kōj, em̧m̧an jen barāinwōt yokwe doon.”25
Būreejtōn eo jinoin Eutiej an Būraimere Joy D. Jones ekar bar keememej ļo̧k ke ekar juon ripālele eo edik, e im ļeo pāleen kar kūr erro n̄an loļo̧k im jerbal in karejar n̄an juon baam̧le eo eto aer bar etal im jar ium̧win elōn̄ iiō ko. Ekar kajju alikkar ilo loļo̧k eo aer kein kajuon ke rekar jab karuwaineneik er. Im ālkin aō kar inepata kōnke elōn̄ kōttan aō kajjieon̄, im ālkin eļap jar ilo m̧ool im kejokļo̧kjeņ, Bratōr im Sister Jones rekar bōk juon uwaak n̄an kajjitōk in etke ilo jerbal in jipan̄ in aer ilo eoon in jān Katak im Bujen Ko: “Kwōn iakwe Irooj am Anij kōn aolepān būruōm̧, kōn aolepān am maron̄, ļōmņak, im kajoor; im ilo etan Jisōs Kraist kwōn jerbal n̄an e.26Sister Jones ekar ba:
Kom̧ro kar kile bwe kom̧ro kar lukkuun m̧ool ilo am̧ro kajjieon̄ jipan̄ baam̧le in im n̄an jipan̄ bisop eo am, ak kom̧ro kar kajjitōkin kom̧ro make eļan̄n̄e kōm kar lukkuun jipan̄ kōn iakwe eo an Irooj. …
“… Kōm̧ro kar jino reim̧aanļo̧k n̄an loļo̧k ko am̧ro ippān baam̧le in kōn wōt iakwe eo am̧ro n̄an Irooj [lale 1 Nipai 11:22]. Kōm̧ro kar kōm̧m̧an menin n̄an E. Ekar kōm̧m̧an bwe apan̄ in en jamin bar apan̄ n̄an jidik. Ālkin elōn̄ allōn̄ ko in am̧ro jutak ilo nabōj in kōjem eo, baam̧le eo ekar jino kadelo̧n̄ kom̧ro. Āliktata, kōm kar jar im kōnono ilo jouj kōn gospel eo ippān doon. Juon jem̧jerā eo ejjjeļo̧k jem̧ļo̧kin ekar ejaak. Kōm̧ro kar kabun̄ jar im iakwe E ilo am̧ro iakwe ro Nejin.”27
Ilo aō kile bwe iakwe eo an Anij n̄an kōj ewānōk, jemaron̄ kajjitōk, “Ewi jon̄an aō iakwe Anij? Emaron̄ ke pedped ioon iakwe eo aō āinwōt aō pedped ioon iakwe eo An?” Ejjab ke juon kōttōpar erreo n̄an mour bwe Anij en maron̄ iakwe kōj ejja wōt kōn likjab ko ad ak barāinwōt kōn ta wōn eo jej erom̧? O, bwe Emaron̄ ba kōn kwe im n̄a āinwōt an Hyrum Smith kar ba, n̄an waanjon̄ak, “N̄a, Irooj, Ij iakwe e kōnke m̧ool eo an būruōn.”28 Jen kemeemej jouj in katak in an Jon: “Bwe en̄in yokwe an Anij, bwe jen kōjparok kien ko An; im kien ko An rej jab eddo.”29
Ilo m̧ool, kien eo An rejjab menin kaburom̧ōjm̧ōj—ak ej oktan. Rej kōkaļļeiki iaļ in kōmour, m̧ōņōņō, aenōm̧m̧an, im lan̄lōn̄. Jemedwōj Ilan̄ im ad Ripinmuur rekar kōjeraam̧m̧an kōj, im ilo ad pokake kien ko, im ilo pokake kien ko Aer, jej en̄jake iakwe eo aer elukkuun wāppen im ļap.30
En̄in ej uwaak eo n̄an lōkapokpok ko ad me ejjeļo̧k jem̧ļo̧kier—iakwe eo an Anij. Ilo kar tōre ko rem̧m̧an ilo bwebwenato in Bok in Mormon ālkin mijen eo an Rilo̧mo̧o̧r, kar kwaļo̧k ke “ejjeļo̧k jum̧ae doon ilo āneo, kōnke iakwe eo an Anij eo eaar pād ilo būruōn armej ro.”31 Ilo ad kajjieon̄ jibadōk Zaion, jej keememej kallim̧ur in ilo Revelesōn: “E m̧ōņōņō ro rej kejbarok kien ko, bwe en ippāer maron̄ in itok n̄an wōjke in mour, im bwe ren deļo̧n̄ ilo kōjām ko ilo jikin kweilo̧k eo [ekwojarjar].”32
Ij kwaļo̧k aō kam̧ool kōn m̧ool eo ad Jemedwōj Ilan̄ im ad Ripinmuur, Jisōs Kraist, im kōn iakwe eo aer ejjab jem̧ļo̧k im ej n̄an indeeo. Ilo etan Jisōs Kraist, amen.