Kam̧wilaļļo̧k Oktakļo̧k Ad n̄an Jisōs Kraist
Jeje ko rekwojarjar im jeļāļo̧kjeņ eo ad kōn Anij ej menin letok ko—menin letok ko me ekka ad kōjekdo̧o̧ni. Jen m̧ōņōņō kōn kōjeraam̧m̧an kein.
Kom̧m̧ool tata, Elder Nielson, kōn ennaan eo am̧ eaiboojoj. Jej aikuji men ņe.”
Ro jeiū im jatu jitōnbōro, Būreejtōn Russel M. Nelson ekar katakin kōj m̧oktaļo̧k, im ij kout, “N̄an kōm̧m̧ane jabdewōt men bwen em̧m̧an eaikuj kijejeto. Erom̧ juon rikaļoor em̧ool an Jisōs Kraist ejjeļo̧k oktak ej bar aikuj kijejeto. Kōļapļo̧k tōmak eo am̧ im lōke E ebōk kijejeto.” Ilubwiljin elmakot ko me ekar letok n̄an kōj n̄an kōļapļo̧k tōmak eo ad ilo Jisōs Kraist ej bwe bwe jej kōmaat ad ilo ekkatak jeje ko rekwojarjar n̄an em̧m̧anļo̧k meļeļe kōn mijen eo an im jerbal in karejar eo an Kraist. (Lale “Christ Is Risen; Faith in Him Will Move Mountains,” Liahona, May 2021, 103.)
Jej ekkatak jān Bok in Mormon ke jeje ko jekwojarjar kar ļap an aorōk ippān baam̧le eo an Liai—Eļap ijo me Nipai im ļōmaron̄ jein rekar ro̧o̧lļo̧k n̄an Jerusalem n̄an bōk pileij brass ko (lale 1 Nipai 3–4).
Jeje ko rekwojarjar rej kwaļo̧k ankilan Anij n̄an kōj ejjeļo̧k oktak an kar Liaona eo kar kōm̧m̧an n̄an Nipai im jemān. Ālkin an būlo̧ke lippen eo an, Nipai ekar aikuj in jeļā ia eo ej aikuj etal n̄an bōk m̧ōn̄ā. Eo jemān, Liai, ekar lale Liaona eo im lo men ko me raar jeje ie. Nipai ekar lo bwe pā ko raar jerbal ekkar n̄an tōmak, tiljek, im wāween tōl eo leļo̧k n̄an er. Ekar bar lo jeje ko me raar kapidodoik riiti im eo ekar leļo̧k n̄an er meļeļe ikkijien iaļ ko an Irooj. Ekar jeļā bwe Irooj ej būktok men ko reļļap kōn men ko reddik. Ekar pokake ikkijien tōl ko kar litok ilo Liaona eo. Ekar walōn̄ļo̧k ilo toļ eo im bōk m̧ōn̄ā n̄an baam̧le eo an, ro raar kanooj in en̄taan jān an jabwe ippāer. (Lale 1 Nipai 16:23–31.)
Ekar āinwōt n̄an n̄a bwe Nipai ekar juon rijikuuļ kar wujlepļo̧k n̄an jeje ko rekwojarjar. Jej riiti bwe Nipai ekar lan̄lōn̄ ilo jeje ko rekwojarjar, kejekļo̧kjeņ kaki ilo būruōn, im jei n̄an er ekkatak im menin jeraam̧m̧an an ajri ro nejin (lale 2 Nipai 4:15–16).
Būreejtōn Russell M. Nelson ekar ba:
“N̄e jej ‘bun̄ m̧aanļo̧k, kwōjkwōj ioon naan an Kraist, im niknik n̄an jem̧ļo̧kin … [jenaaj] bōk mour indeeo’ [2 Nipai 31:20].
“N̄an kwojkwoj ej meļeļein eļapļo̧k jān edjon̄. N̄an kwojkwoj ej meļeļe in m̧ōņōņō kōn nemān. Jej nemake jeje ko rekwojarjar kōn ekkatak kaki ilo juon m̧wil in laudin̄din̄ ilo loi im tiljek ilo pokake. N̄e jej kwojkwoj ioon naan ko an Kraist, rej jeje ‘ilo būruemi tebōļ kanniōk ko’ [2 Korint 3:3]. Rej erom juon m̧ōttan eaorōk an lukkuun piktokid” (“Living by Scriptural Guidance,” Liahona, Jan. 2001, 21).
Ta jet Iaan Men ko me Jenaaj Kōņaan Kōm̧m̧ani Eļan̄n̄e Jetōb ko Ad rej Lo̧udin̄din̄ ilo Jeje ko Rekwojarjar?
Kōnaan eo ad n̄an m̧ōttan aiintok eo an Israel ilo rejet ko jim̧or an rōn̄ōl eo enaaj ļapļo̧k. Enaaj erom kōkā im ejjeļo̧k lōmān kōj n̄an karuwaineneik baam̧le eo ad im ro m̧ōttad n̄an ron̄jake mijenede ro. Jenaaj erreo, im enaaj wōt juon ad peba in mālim in deļo̧n̄ tampeļ n̄an ad maron̄ etal n̄an tampeļ emakijkij in wōt an maron̄. Jenaaj jerbal n̄an pukōt, kōppopo, im liļo̧k āt ko etan rūtto ro ad n̄an tampeļ. Jenaaj tiljek ilo kōjparok raan in Jabōt, etal n̄an jar aolep Jabōt n̄an bar kōkāāl bujen ko ad ippān Irooj ilo ad bōk ko̧nad ilo erreo ilo bōk kwojkwoj eo. Jenaaj ņamejļan n̄an pād wōt ioon iaļ in bujen eo, mour kōn aolep naan ko me rej diwōjtok jān lo̧n̄in Anij (lale Katak im Bujen Ko 84:44).
Ta Meļeļe in n̄an Kwe n̄an Lo̧udin̄din̄ ilo Men ko an Irooj?
Lo̧udin̄din̄ ilo jeje ko rekwojarjar eļapļo̧k jān kwōle im maro kōn jeļāļo̧kjeņ eo. Nipai ekar en̄jake eļap lan̄lōn̄ ilo tōrāān an mour. Ijo wōt ke, ekar barāinwōt ioon men ko reppen im būrom̧ōj (lale 2 Nipai 4:12–13). “Mekarta,” ekar ba, “Ijieļā ilo wōn iaar lōke” (2 Nipai 4:19). Ilo ad ekkatak jeje ko rekwojarjar, enaaj em̧m̧anļo̧k ad meļeļe karōk in lo̧mo̧o̧r eo an Anij im mour ijo eutiej tata, im jenaaj lōke ilo kallim̧ur ko me Ekar kōm̧m̧ani n̄an kōj ilo jeje ko rekwojarjar, barāinwōt ilo kallim̧ur ko im kōjeraam̧m̧an ko an rikanaan ro raan kein.
Juon ālkin raelep, lio pāleō im n̄a kar kūrļo̧k kōm̧ro n̄an juon im̧ōn m̧ōtta. Ļaddik eo nejier jijlimjuon iiō dettan, David, ejjan̄in kar ron̄ bwebwenato eo kōn David im Goliath ilo Baibōļ, im ekar kōnaan ron̄ kake. Ke ij jino bwebwenato n̄an e, mour eo an David ekar im̧we e, kōn tōmak eo an im ilo etan Anij eo RiIsrael, kar kakineejej im m̧an Riphilistine eo kōn juon buwat im juon dekā, ilo an ejjeļo̧k an jāje ilo pein (lale 1 Samuel 17).
Kalimjōk eō kōn māj killep ko mejān, ekar kajjitōk ippān kōn dim “Wōn in Anij?” Ikar kōmeļeļeik e bwe Anij ej Jemedwōj Ilan̄ im bwe jej ekkatak kōn E ilo jeje ko rekwojarjar.
Innām ekar kajjitōk ippa, “Ta ko jeje ko rekwojarjar?” Ikar ba n̄an e bwe jeje rekwojarjar ej naan ko an Anij im ilo er jemarōn lo bwebwenato ko raibojooj me remarōn jipān e em̧m̧an ļo̧k an m̧eļeļe kōn wōn in Anij. Ikar kajjitōk iippān jinen n̄an kōjerbal Baibōļ eo me ewōr an ilo m̧weo im bwe en jab kōtļo̧k an David ilo̧k in kiki ilo an jab riiti aolepān bwebwenato n̄an e. Ekar lo̧udin̄idn̄ ilo an kar ron̄jake. Jeje ko rekwojarjar im jelāļo̧kjōn kein ad kōn Anij ej menin jolet ko—menin jolet ko me ekka ad kajekdooni. Jen m̧ōņōņō kōn kōjeraam̧m̧an kein.
Ke ikar jerbale juon mijen āinwōt juon likao, ikar lale bwe kōn katakin kōn jeje ko rekwojarjar eo am, mour ko an elōn̄ armej ro raar oktak. Ikar jino kile kajoor eo ilo er im ekōjkan aer maron̄ ukōt mour ko ad. Kajjojo armej ro kōm kar katakin kōn gospel eo kōjepļaaktok rekar kajjojo armej ro ejej uwaer kōn aikuj ko aer roktak jān doon. Jeje ko rekwojarjar—aaet, kanaan ko kar je jān rikanaan ro rekwojarjar—kar bōktok er n̄an juon tōmak ilo Irooj im n̄an ukweļo̧k im ukōt mour ko aer.
Jeje ko rekwojarjar rekar kobrak er kōn lan̄lōn̄ ilo aer bōk im̧we, tōl, im kaenōm̧m̧an, kōkajoorļo̧k, im uwaak ko n̄an aikuj ko aer. Elōn̄ iaer raar kāālet n̄an kōm̧m̧ani oktak ko ilo mour ko aer im jino kōjparok kien ko an Anij.
Nipai ej rōjan̄ kōj bwe jen lo̧udin̄din̄ ilo naan ko an Kraist, kōnke naan ko an Kraist renaaj jiron̄ kōj aolep men ko jej aikuj kōm̧m̧ani (lale 2 Nipai 32:3).
Ij karuwaineneik kōm n̄an kōm̧m̧ane juon karōk n̄an indeeo n̄an ekaktak jeje ko rekwojarjar. Itok, Ļoor Eō ej juon kein jipan̄ em̧m̧an me ewōr ippād n̄an katakin im ekkatak gospel eo, kam̧wilaļļo̧k oktakļo̧k eo ad n̄an Jisōs Kraist, im jipan̄ kōj n̄an erom āinwōt E. N̄e jej ekkatak gospel eo, jejjab wōt pukōt meļeļe ko rekāāl; ijello̧kin jej pukōt n̄an erom juon “men in kōm̧anm̧an ekāāl” (2 Korint 5:17).
Jetōb Kwojarjar eo ej tōl kōj n̄an m̧ool eo im kam̧ool n̄an kōj kōn m̧ool eo (lale Jon 16:13). Ej kōmeramļo̧k kōļmenļo̧kjeņ ko ad im kōkāāl meļeļe eo ad, im un̄ur būruōd kōn revelesōn an Anij, jipan̄ eo n̄an aolep m̧ool. Jetōb Kwojarjar eo ej karreoik būruwōd. E ej im̧we ilo kōj ikdeelel eo n̄an mour ekkar n̄an m̧ool eo im ej unoojdikdik n̄an kōj wāween ko n̄an kōm̧m̧ane aindein. “Jetōb Kwōjarjar eo … enaaj katakin kōj men otemjej” (Jon 14:26).
Kōnono kōn naan ko Eaar kwaļo̧k n̄an Rikanaan Josep Smith, Rilo̧mo̧o̧r eo ad ekar ba:
Naan kein rej jab jān elōn̄ armej ak jān juon armej, ak jān N̄a; …
“Bwe ej Ainikiō eo ej kōnono [naan kein] n̄an kom̧, bwe rej liwōj jān Jetōb eo Aō n̄an kom̧ … ;
“Kōn menin, kom̧ maron̄ kam̧ool bwe kom̧ ar ron̄ Ainikiō, im jeļā naan ko Aō” (Katak im Bujen Ko 18:34–36).
Jej aikuj pukot jemjerā eo an Jetōb Kwojarjar. Kōttōbar in ej aikuj tōl jokāālet ko ad im tōl ļōmņak ko im jerbal ko ad. Jej aikuj pukōt aolep men ko me rej kilaaktok kareel eo an Jetōb im joļok aolep men ko me rej kōjeerļo̧k jāņ kareel in.
Ij km̧ool bwe Jisōs Kraist ej Nejin Jemedwōj Ilan̄ Jitōnbōro. Ij iakwe aō Rilo̧mo̧o̧r. Ij kam̧m̧oolol kōn jeje ko rekwojarjar An im kōn rikanaan ro An rej mour. Būreejtōn Nelson ej An rikanaan. Ilo etan Jisōs Kraist, amen.