O Uluai Tamaitai o le Toefuataiga
Lototoa i Afi Faapolotiki a Uosigitone, DC
Sa faamanuiaina Emmeline B. Wells ma Zina Young Williams i le mautinoa a o la talanoaina se faafitauli e le masani ai ma taitai o le malo.
Ata na tusia e Toni Oka
Otamaitai e toalua na o ese mai le nofoaafi i le laumua o le Iunaite Setete o Uosigitone, DC, sa lelava ae sa naunau lava. Ina ua mavae aso e lima na malaga mai ai mai le Aai o Sate Leki, sa faamoemoe Emmeline B. Wells ma Zina Young Williams e faalautele le faamoemoe o tagata o le Ekalesia ae sa la iloa sa la feagai ma le tetee.
Ia Ianuari 1879 sa la auai ai i fonotaga a le atunuu e uiga i le aia tatau a tamaitai e palota ai ma tuuina atu talosaga i le Konekeresi a le IS, ma talosagaina ai le au faitulafono e toe aveese tulafono saua e faasaga i le Ekalesia.
“Ou te manao e faia mea uma i lo‘u malosi e fesoasoani ai e siitia le tulaga o o’u lava tagata, aemaise lava tamaitai,” na tusia ai e Emmeline i lana api talaaga.1 Mai le 1877 i le 1914, sa avea o ia ma faatonu o se lomiga mo tamaitai o le Ekalesia na faaigoaina o le Woman‘s Exponent, lea na ia lagolagoina ai galuega lelei i fale ma nuu.
O taitai o aia tatau o le filifiliga faalemalo o Elizabeth Cady Stanton ma Susan B. Anthony na “talia lelei” ia tamaitai e toalua mai Iuta.2 Sa la fesoasoani e tofia i la’ua i se komiti e avatu savali i le peresitene o le malo, o Rutherford B. Hayes.3
Sa talanoa atu ma le mautinoa Emmeline ia te ia, ma lipoti atu, “Ina ua uma ona matou tuuina atu ia te ia ni nai mea moni e faatatau i le tulaga o lenei nuu, ma o le a se taunuuga o ni fuataga ogaoga ma le matuia, sa ia faapea mai, na te lei mafaufauina muamua lava le mataupu i le malamalama sa matou tuuina atu.” Sa valaaulia e Peresitene Hayes lona faletua, o Lusi, e faalogologo i le la talosaga. “Sa matua faaosofja ai lava lona alofa faa-tamaitai.”4
Mo le isi lua vaiaso, na avatu ai e Emmeline ma Zina ni savali e fai ma sui o le Ekalesia ia i latou e tele lo latou faatosinaga i mataupu faaletulafono. Sa ta‘ua e Emmeline e faapea, sa “masani ona latou feiloai ma tagata o e sa faaalia le fiafia silisili i” la laua savali.5
E ui ina sa le‘i faamanuiaina i latou i le suia o manatu o tagata lautele i lena tausaga, mo le 17 tausaga, sa saunoa atu Emmeline ma ona uso o le Aualofa mo aia tatau a tamaitai ma tagata o le Ekalesia. O le mea e sili ai, i le 1896, na avea ai Iuta ma se setete, ma sa toefuatai mai ai le tele o aia tatau faalelotu ma faalemalo.