2021
O Se Faaaliga o le Lalolagi o Agaga
Tesema 2021

Na o le Faatekinolosi: Tala mai le Au Paia, Voluma 3

O Se Faaaliga o le Lalolagi o Agaga

O se vaega lenei mai le voluma 3 o le Au Paia: O Le Tala o le Ekalesia a Iesu Keriso i Aso e Gata Ai, lea o le a faalauiloa i le tautotogo o le 2022. O le tulaga mo lenei tala o le 1918, ina ua mavae le maliu faafuasei o le atalii o Peresitene Iosefa F. Samita o Ailama M. Samita mai se pito o le taufale [pito gaau] ua pa. I totonu o ni masina talu ona maliu Ailama, na maliu ai lona faletua, o Ida Bowman Samita, ina ua mavae le fanauina o se pepe.

atatosi o Iosefa F. Samita

Sa le’i vave ta’u atu e le aiga o Iosefa F. Samita ia te ia e uiga i le maliu o Ida, i le fefefe o le tala o le a nutimomoia ai o ia. Sa faasolo ina vaivai o ia talu mai le maliu o Ailama, ma sa seāseā ona faaali atu o ia i nofoaga faitele i le lima masina talu ai. Peitai, i le aso na sosoo ma le maliu o Ida, na aumai ai e tagata o le aiga lana tama tama faatoa fanau ia Iosefa, ma sa ia tagi a o ia faamanuia le pepe ma faaigoa ia te ia o Ailama. Ona ta’u atu lea e le aiga ia te ia e uiga ia Ida.

I le faateia o tagata uma, na talia ai ma le toafimalie e Iosefa le talafou.1 O le tele naua o mafatiaga ma tiga na oo mai i le lalolagi talu ai nei. Sa i ai i nusipepa o aso taitasi ni lipoti matautia e uiga i le taua. E faitau miliona fitafita ma tagatanuu na fasiotia, ma e faitau miliona isi sa mumutu ma manunua. I le amataga o lena taumafanafana, na taunuu atu ai fitafita mai Iuta i Europa ma molimauina le saua maoae o le taua.

O se faasologa tiga matautia o le faama’i oti na amata maimau ai ola i le lalolagi atoa, na faateteleina ai le tiga ma le loto tiga o le taua. Sa salalau atu le vairasi i se saoasaoa faapopoleina, ma sa na o ni nai aso na mamao ese ai Iuta mai le tapunia o ona faletifaga, lotu, ma isi nofoaga faitele i le faamoemoe e taofia ai le galu o faama‘i ma le oti.2

I le aso 3 o Oketopa, 1918, sa nofo ai Iosefa i lona potu, ma tomanatu i le Togiola a Iesu Keriso ma le togiolaina o le lalolagi. Sa ia tatalaina lana Feagaiga Fou i le 1 Peteru ma faitau e uiga i le Faaola o loo talai atu i agaga i le lalolagi o agaga. “O le mea lea na folafola atu ai le talalelei i e ua oti,” na ia faitauina, “ina ia faasalaina i latou i le tino i la tagata, a e ola ai i le agaga i la le Atua.”

A o ia mafaufau loloto i mau, sa lagona e le perofeta le agaga ua afio ifo i ona luga, ma tatalaina ona mata o le malamalama. Sa ia vaaia motu o tagata ua maliliu i le lalolagi o agaga. O tamaitai ma alii amiotonu o e na maliliu a o le’i oo i le galuega a le Faaola i le olaga nei, sa faatalitali ma le olioli mo Lona fanau mai iina e folafola atu lo latou faasaolotoina mai noataga o le oti.

Sa faaali atu le Faaola i le motu o tagata, ma sa olioli agaga amiotonu i lo latou togiolaina. Sa latou tootutuli i Ona luma, ma faailoa atu o Ia o lo latou Faaola ma le Laveai mai le oti ma filifili o seoli. Sa susulu o latou foliga a’o susulu mai le malamalama o le Alii o loo siomia ai i latou. Sa latou usuina viiga i Lona suafa.3

A o maofa Iosefa i le faaaliga, sa ia toe tomanatu i upu a Peteru. O le anoanoai o agaga le usitai sa sili mamao atu nai lo le anoanoai o agaga amiotonu. E mafai faapefea e le Faaola, i le taimi o Lana asiasiga puupuu i le lalolagi o agaga, ona folafola atu Lana talalelei ia i latou uma?4

Ona toe pupula ai lea o mata o Iosefa, ma sa ia malamalama e le‘i afio patino le Faaola i agaga lē usiusitai. Ae, sa ia faatulagaina agaga amiotonu, tofia avefeau ma tofia i latou e avatu le savali o le talalelei i agaga i le pogisa. I lenei auala, o tagata uma o e na maliliu i le solitulafono pe aunoa ma se malamalama i le upumoni e mafai ona aoao e uiga i le faatuatua i le Atua, salamo, papatisoga sui mo le faamagaloina o agasala, le meaalofa o le Agaga Paia, ma isi mataupu faavae taua uma o le talalelei.

O le vaai atu i le faapotopotoga tele o agaga amiotonu, na vaai ai Iosefa ia Atamu ma ona atalii o Apelu ma Setu. Sa ia vaaia Eva o tutu faatasi ma ona afafine faamaoni o e sa tapuai i le Atua i le gasologa o tausaga. Sa i ai foi iina Noa, Aperaamo, Isaako, Iakopo, ma Mose, faatasi ai ma Isaia, Esekielu, Tanielu, ma isi perofeta mai le Feagaiga Tuai ma le Tusi a Mamona. E faapena foi le perofeta o Malaki, lea na valoia faapea o le a sau Elia e toto folafolaga na faia i tamā i loto o fanau, e saunia ai le ala mo galuega o le malumalu ma le togiolaina o e ua maliliu i aso e gata ai.5

Sa vaai foi Iosefa F. Samita ia Iosefa Samita, Polika Iaga, Ioane Teila, Uilifoti Uitilafi, ma isi o e na faataatia le faavae o le Toefuataiga. Sa i ai faatasi ma i latou lona tama na maliu faamaturo, o Ailama Samita, o ona foliga na te le’i vaai i ai i le fitusefulu-fa tausaga. O i latou o nisi o agaga tamalii ma maoae o e na filifilia a o le’i oo mai le olaga faaletino ia o mai i aso e gata ai ma galulue mo le faaolataga o fanau uma a le Atua.

Ona iloa ai lea e le perofeta o toeaiina faamaoni o lenei tisipenisione o le a faaauau pea a latou galuega i le olaga a sau e ala i le talai atu o le talalelei i agaga o e sa i ai i le pouliuli ma i lalo o le nofo pologa i le agasala.

“O e ua oti ua salamo o le a togiolaina, e ala i le usiusitai i sauniga o le maota o le Atua,” na ia matauina ai, “ma a uma ona latou totogi o le sala o a latou solitulafono, ma faamamaina, o le a maua se taui e tusa ma a latou galuega, ona o i latou o suli o le olataga.”6

Ina ua tapunia le faaaliga vaaia, sa mafaufau loloto Iosefa i mea uma sa ia vaaia. O le taeao na sosoo ai, sa ia faateia ai le Au Paia e ala i le auai i le sauniga muamua o le konafesi aoao ia Oketopa e ui lava i le le lelei o lona soifua maloloina. I le naunau ai e talanoa atu i le potopotoga, sa ia tu atu ai ma le le malosi i le pulelaa, ma sa tetete lona tino tele mai le taumafaiga. “Ua silia ma le fitusefulu tausaga o avea a’u ma se tagata faigaluega i lenei galuega ma o outou tama ma augatama,” na ia saunoa ai, “ma ua tutusa lava le mausali o lo‘u loto ma outou i le asō e pei ona sa i ai.”7

O le leai o se malosiaga e tautala ai e uiga i lana faaaliga e aunoa ma le faatoilaloina e lagona, sa na ona ia pa’i atu lava i ai. “Ou te le’i nofo na o a’u i nei masina e lima,” na ia ta’u atu ai i le faapotopotoga. “Sa ou mafuta i le agaga o le tatalo, o aioiga, o le faatuatua ma le naunautaiga; ma sa faia ni a’u fesootaiga faifai pea ma le Agaga o le Alii.”

“O se sauniga fiafia i lenei taeao mo a’u,” o lana tala lea. “Ia faamanuia outou e le Atua.”8

Faamatalaga

  1. Whitney, Journal, Oct. 3, 1918; Heber J. Grant to Reed Smoot, Sept. 25, 1918; Heber J. Grant to George F. Richards, Sept. 27, 1918; Heber J. Grant to Richard W. Young, Oct. 1, 1918, Heber J. Grant Collection, CHL.

  2. Tate, “Great World of the Spirits of the Dead,” 5–40; Alford, “Calvin S. Smith,” 254–69; Madsen, Defender of the Faith, 301–14; Dehner, Influenza, 42–50; Brown, Influenza, 43–58; “Preparing Here for Spanish Influenza,” Salt Lake Tribune, Oct. 4, 1918, 20; “State Board of Health Issues Drastic Order,” Salt Lake Telegram, Oct. 9, 1918, 1. Autu: Faamai Oti o le Fulū i le 1918

  3. 1 Peteru 3:18–20; 4:6; Mataupu Faavae ma Feagaiga 138:1–24; Bennett, “Joseph F. Smith, World War I, and His Visions of the Dead,” 126.

  4. Mataupu Faavae ma Feagaiga 138:25–28.

  5. Mataupu Faavae ma Feagaiga 138:29–48; tagai foi Mataupu Faavae ma Feagaiga 110:13–15; ma le Malaki 4:5–6.

  6. Mataupu Faavae ma Feagaiga 138:49–59; tagai foi Aperaamo 3:22. Autu: Iosefa F. Samita; Faaaliga o le Togiolaina o e ua Maliliu

  7. “Prest. Joseph F. Smith Greets Thousands at Semi-annual Conference,” Deseret Evening News, Oct. 4, 1918, 1; Joseph F. Smith, in Eighty-Ninth Semi-annual Conference, 2; Wells, Diary, volume 44, Oct. 4, 1918.

  8. Joseph F. Smith, in Eighty-Ninth Semi-annual Conference, 2; Susa Young Gates to Elizabeth Claridge McCune, Nov. 14, 1918, Susa Young Gates Papers, CHL.