Auala na Ou Aoao ai e Auauna Atu ma le Alofa

Saunia e Larry Jespersen

E alala le tusitala i Misuri, ISA.

O le auauna atu e faamanuiaina ai i latou tatou te auauna atu i ai, ae afai tatou te auauna atu ma le uiga faaalia talafeagai, o le a faamanuiaina foi i tatou.

Ina ua ou auai i Le Ekalesia a Iesu Keriso o le Au Paia o Aso e Gata Ai i le 35 o o’u tausaga, o se tasi o le tele o mea sa vave ona ou aoaoina o le manaomia lea ona ou naunau e auauna atu i isi. Pe o le fesoasoani i se tasi e siitia ese, ofo atu le moaina o le vao, faia lipea, po o le saunia o felauaiga, sa ou taumafai i le tele e mafai ai e tali atu i talosaga mo auaunaga mai la‘u korama pe mai tagata taitoatasi.

Sa ou lagonaina sa ou auauna atu i se auala lelei. Peitai, i le toe mafaufau i ai, ua ou iloa ai sa ou auauna atu ona o se lagona o le tiute ae le ona o se lagona o le alofa mo i latou o e sa manaomia le fesoasoani. Ou te le’i vaai moni lava i la‘u auaunaga o se taumafai e avea ma aao o le Alii.¹

Ina ua ou siitia atu i Misuri tutotonu, ISA, sa ou maua le avanoa e auauna atu ai i se ulugalii e matutua atu. Sa manaomia e lo la fale laitiiti tuai le tele o lipea, e aofia ai lona taualuga tutulu. Peitai, sa mafatia le ulugalii i luitau ogaoga o le soifua maloloina lea na taofia ai i la’ua mai le faia o galuega faaletino.

I se aso vevela ia Iulai, sa ma o ai ma la‘u uo lelei o Dallas Martin i luga o le taualuga ma faapipii ni maa atofale fou. Sa ma vevela ma sisina le afu. Na faafuasei lava, ona taofi le tuituiga fao a Dallas, tu i luga, ma tilotilo mai ia te a’u.

“O e iloaina le faamanuiaina o ta’ua i le avea ai ma tagata e i luga iinei ma faia lenei galuega ae le o tagata i totonu o e e le mafaia?” na ia fesili ai.

O lana fesili na taia ai a’u e pei o se uila matautia. O se taimi moni lava na suia ai le olaga. O la‘u vaaiga atoa lava i le auauna atu sa i ai se uiga fou. Sa ou iloaina le faamanuiaina tele o a’u i le mafai ona ou faia o mea uma e mafai ona ou faia.

I lena taimi, sa ou lagonaina sa le na ona ma fesoasoani ma Dallas ona o se lagona o le tiute ae sa fesoasoani i se lagona o le lotofaafetai. Ua faamanuiaina i ma’ua e le Alii i le tomai e avea moni ai ma Ona aao. Faatasi ai ma lena malamalama, sa faigofie mo a’u le lagonaina o le alofa mo i latou sa ma fesoasoani i ai.

Talu mai lena aso, soo se taimi lava ou te fesoasoani ai i se galuega auauna atu, pe soo se taimi lava e manaomia ai e se tasi se fesoasoani e mafai ona ou tuuina atu, ou te taumafai lava e faatumauina lena vaaiga i le mafaufau. Ou te le’i faamanuiaina lava i taimi uma, ae o lena vaaiga sa avea ma se faamanuiaga tele i lo’u olaga. Ua fesoasoani moni lava ia te a’u e tausisia ai se uiga lelei e uiga i le auauna atu.

Pe a i ai ni o‘u faafitauli po o ni luitau, ou te taumafai e mafaufau i tagata o loo feagai ma tofotofoga sili atu ona ogaoga nai lo a’u. Ona ou faailoa atu lea o lo‘u faafetai i le Alii mo faamanuiaga uma ua Ia tuuina mai ia te a’u.

Afai tatou te tuuina la tatou auaunaga i le vaaiga talafeagai, e manaomia ai se uiga fou. E lua faamatalaga e uiga i auaunaga a Peresitene Gordon B. Hinckley (1910–2008) e tulaga ese ia te a’u.

‘O le vailaau e sili ona aoga mo le ma’i o le faanoanoa o le tagata mo ia lava, o le faagalo o i tatou lava i le auauna atu i isi.”²
‘O le vaifofo silii ua ou iloa mo le popole o le galue. O le fofo sili lava mo le vaivai o le lu’i ia fesoasoani atu i se tasi o sili atu le lelava. O se tasi o mea malie o le olaga o lenei: O ia o lē e auauna atu e toetoe lava o taimi uma e sili atu ona manuia nai lo ia o lē o loo auauna atu i ai.”³

O le a moni lena mea pe afai tatou te taulimaina le auaunaga i isi ma le uiga faaalia talafeagai. Afai tatou te taumafai moni e fesoasoani ona tatou te lagonaina le alofa mo o tatou uso ma tuafafine, ma ona tatou te mananao ma le faamaoni e avea ma aao o le Alii, o la tatou auaunaga o le a faamanuiaina ai i tatou e le gata i lenei olaga ae faapea foi i le olaga a sau.