O Leo o le Au Paia o Aso e Gata Ai
Fatu Nonuinitia o le Kerisimasi
O le meaalofa a la‘u uo i se isi tagata nofomau i le nofoaga autu mo i latou e moomia le fesoasoani mo le latou tausiga na faamanatu mai ai ia te au o le olioli moni e maua i le alofa faaKeriso.
Ina ua amata la‘u sifi ma amata ona laulau taumafataga, sa ulufale mai se tasi o tagata e sili ona ou fiafia i ai, o Stan (e le o lona igoa moni), i le potu ai. Sa ou faigaluega i se nofoaga autu mo i latou e moomia le fesoasoani mo le latou tausiga ma sa faaaluina le tele o itula e asiasi ai i lenei tamalii lelei. O ia o se tusitala lauiloa ma sa avea muamua ma polofesa o le sa auauna atu o se peresitene o le misiona, peteriaka o le siteki, ma se fai faamauga i le malumalu.
Sa ou faamoemoe a o ou faaaluina le taimi faatasi ma ia, o le a ou maua ai nisi o ona uiga faaleagaga ma uiga lelei. Sa faagaeetia pea lava pea au i lona lotomaualalo ma le manao faamaoni e auauna atu i isi. E lei leva ona maliu lona faletua mo le 63 tausaga, ma e ui sa ia faanoanoa moni lava, ae sa mafai ona ia maua le olioli a o ia sailia ni auala e lagona ai e isi le alofagia ma le lagolelei.
Faatasi ai ma le sasao o le faamai pipisi o le KOVITI-19, o le 2020 sa sili ona faigata mo lo matou lotoifale o e moomia le fesoasoani mo lo latou tausiga. Ae o le oo mai o le vaitau o le Kerisimasi na aumaia ai le faamoemoe faafouina mo le lumanai.
I lena afiafi, sa saofafai ai Stan ma se isi tamaloa i le laulau sa ou auauna atu ai. Ina ua uma le taumafataga a lena alii, sa ia fai mai ia te au mo ni meaai mama e toe ave i lona potu. Sa ou alu atu i meaai mama, ae paga lea, sa le i maua le mea sa ia manao ai. Ina ua ou toe foi atu i lana laulau ma tau atu ia te ia, sa le fiafia o ia. Sa ou ofoina atu ni meaai mama e sui ai, ae sa ia teena ma le faaaloalo.
O Stan, i le faalogo mai i le ma talanoaga, sa tulai a‘e mai lona nofoa. Faatasi ai ma lana tootoo savali, sa ia agai lemu atu ai i lalo i le faletele. Sa ia toe foi mai i ni nai minute mulimuli ane ma nisi o ana lava meaai mama e sili ona fiafia i ai—o fatu nonuinitia e kava i sukalati. Sa ia ofoina atu i le tamaloa, faafetai atu ia te ia mo lana faatasi ai ma ia, ma toe foi atu i lona potu.
A o ou mafaufau e uiga i la‘u uo o feagai ma le maliu o lona toalua ma lo matou nuu o loo feagai ma le faanofoesea o le KOVITI-19, sa taia a’u i upu a le Faaola. Na Ia fetalai mai, “Aua ai se fia faasaogalemuina lona ola, e maumau ai ia te ia; a o le faamaumau lona ola ona o a’u ma le tala lelei, e faasaoina e ia” (Mareko 8:35).
Sa maua e Stan le olioli a o faaauau pea ona ia auauna atu. Ou te manatua lo‘u mafaufau, “E moni, o le tagata lenei o le Atua.”
O le a ou manatua pea le taua o lenei aafiaga ia te au. Sa fesoasoani ia te au e faatu ai se sini o le olaga atoa ia avea ma se soo tuuto o Iesu Keriso, e pei o Stan. Sa ia faaali mai ia te au o le olioli moni e maua i le tuuina atu pea lava pea o mea laiti, e pei o fatu nonuinitia o le Kerisimasi.