O Leo o le Au Paia o Aso e Gata Ai
Aua tou te matatau
Sa ou alaga le leoa, “Pe na e sau moni ea i lenei lalolagi i le silia ma le 2,000 tausaga talu ai o se pepe meamea ua leai se faamoemoe?”
Sa matou faatasi ma lo‘u aiga i le fale o se uo o loo aai i le afiafi i le Po o le Kerisimasi ina ua ou maua se valaau mai le tina o se tasi o a’u ma‘i. Sa mafatia lana tama tama e 19 tausaga le matua i se faigamalaga umi ma le faigata ma le lukimia lea na aofia ai le tele o faafitauli mai le faama‘i ma ona togafitiga.
Mulimuli ane, ina ua mavae se isi taamilosaga le manuia o togafitiga faigata, sa tonu ia te ia e tetee atu i nisi togafitiga ma toe foi atu i le fale. Sa filemu o ia i le iloaina e le o toe mamao ae oti o ia.
I lena afiafi, ina ua suia lana manava ma sa maualuga lona fiva, sa valaau atu lona tina mo se taavale a le falemai. Ina ua latou taunuu i le potu o faalavelave faafuasei i le falemai, sa ia valaau mai ia te au.
“Ou te le iloa le mea e fai!” na ia tagi mai ai.
Sa lei faamoemoe fomai e ola lana tama tama i ni nai itula na sosoo ai. Sa ma talanoa e uiga i auala e faatumauina ai lona toafimalie, ma sa ou fai atu ia te ia sa ou i ai iina mo le aiga.
Sa faauma la‘u taumafataga o le afiafi, ma sa amata e tamaiti lo latou faataitaia o le Soifua Mai o Iesu. A o amata ona faitau le matou uo faaleaiga mai le Luka mataupu 2, sa toe tatagi foi la‘u telefoni ma ou laa atu i fafo.
Ua leai la‘u ma’i. I loimata, sa ou ta‘u atu ai i le aiga le taua tele o lo la atalii ia te au. Sa ou faailoa atu lo‘u ita i le kanesa a o ou laitiiti ma sa ou moomoo maimau pe ana mafai ona ou faia nisi mea se tele mo ia.
Ina ua uma ona solo ese o‘u loimata, sa ou toe alu atu i totonu o le fale o le ma uo. Sa faafoliga lo‘u atalii ulumatua ia Iosefa, o loo tu i autafa o le faatanoa vao, ma sa faalogo ma le naunautai lo’u atalii laitiiti, o se leoleo mamoe, i le agelu o tautino mai:
“Aua tou te matatau: aua faauta, ou te au mai ia te outou le tala lelei e olioli tele. …
“Aua o le aso nei ua fanau ai i le aai o Tavita, lo outou Faaola, o le Alii ia o Keriso” (Luka 2:11).
I lena taimi, sa ou tagi le leoa atu ai, “O E i ai moni ea iina? Pe na E sau moni lava i lenei lalolagi i le silia ma le 2,000 tausaga talu ai o se pepe meamea e leai se faamoemoe? Pe na e tauaveina moni o matou tiga ma puapuaga o ituaiga eseese uma?”
A o ou vaavaai atu i tamaitio faamamaluina ma le lotomaualalo ma le migao lo tatou Faaola, sa ou faalogo i le tali: “Ioe, ua ou i ai iinei. Sa ou sau ma faatoilaloina. ‘Ua ou taina lou faatusa i ou alofilima’” (tagai Isaia 49:16).
E leai se tasi o i tatou e le oo i ai le tiga, faanoanoa, ma le lototiga. Ae i na taimi, e mafai ona sii ae i tatou i upu a le agelu: “Aua tou te matatau” (Luka 2:10). Ma e mafai ona faʻamalosia i tatou i le fetalaiga a le Alii: “E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33).
Talu mai lena taimi, ua i ai i le Vaeluaga o le Kerisimasi se uiga fou mo au. Ua faamanatu mai ia te au la‘u ma‘i, lona aiga, ma le mafanafana o le iloaina e ala i le taulaga a le Faaola, o le a tatou manumalo foi i le lalolagi.