Lagonaina o le Alofa o le Atua e ala i le Salamo

Taofia le igoa

Sa ou aoaoina o le salamo o se meaalofa moni o le alofa mai lo tatou Tama Faalelagi ma le Faaola.

Ina ua 15 ou tausaga, sa ou le faia ni faaiuga sili ona lelei. Sa ou feoeoea’i’ ma se vaega o tagata sese, ma sa tele ina siomia au e le tele o faaosoosoga—o nisi o ia faaosoosoga sa ou faananau i ai. I le taimi muamua sa le taua a‘u faaiuga, ae na iu lava ina ou i ai i se nofoaga sa pogisa tele. Sa ou nanaina le tele o mea sa ou faia mai lo‘u aiga, ma sa ou lagonaina le tuuatoatasi. Sa ou le mautinoa po o fea e liliu i ai. Sa ou talitonu moni lava e le alofa le Atua ia te a’u.

I se tasi aso na faapitoa ai lava le faigata, sa faafuasei ona ou maua se manatu e tatau ona ou amata faitauina le Tusi a Mamona. Sa ou faitauina muamua, ae le o se manao moni e aoao mai i ona savali. I itulau uma sa ou lagonaina le mafanafana i lo‘u loto a o ou mauaina upumoni mai le Faaola o ta’u mai ia te a‘u e mafai ona ou suia i Lana fesoasoani. Sa ou lagonaina e pei sa ou manao e “usu le pese o le alofa togiola” (Alema 5:26)).

Ina ua uma ona suesue i le Tusi a Mamona ma ana savali e faatotonugalemu ia Keriso, sa mafai ona ou maua le lototele sa ou manaomia e faamatala atu ai a‘u filifiliga i lo’u tina. A o ma toe foi mai i le fale mai le fale pasi i se tasi aso, sa ou talanoa atu ia te ia ma ta’u atu ia te ia nisi o faaiuga le lelei sa ou faia. Sa ou faamoemoe o le a ita o ia, ae sa le’i ita o ia. Na te le’i faamasinoina foi a’u. Nai lo lena, sa ia faailoa mai le tele o lona alofa ia te a’u, ma e ala i lona alofa, sa ou lagonaina ai foi le alofa o le Atua mo le taimi muamua i lo‘u olaga.

A o faaauau pea ona ou tatalo ma faitau tusitusiga paia, sa ou toe maua le lototele e talanoa ai i lo‘u epikopo ma amata le faagasologa o le salamo. A o o’u fesili atu ia te ia pe mafai ona ma feiloai, sa ia valaaulia a‘u i totonu o lona ofisa, ma sa ma amata i se tatalo. Ina ua uma ona ma talanoa, sa amata ona ou tagi i se auala ou te le’i tagi ai muamua. Sa ou faasoa atu a’u mea sese uma ia te ia, ma sa ou lagonaina moni lava le alofa o le Tama Faalelagi ma Iesu Keriso i le siieseina o le maasiasi ma le mamafa o le avega sa ou tauaveina mai o‘u tauau.

O lo‘u epikopo sa na o le agaalofa, na mafua ai ona ou toe lagonaina le alofa o le Tama Faalelagi ma Iesu Keriso. Sa ia aoaoina a’u o le faagasologa o le salamo o le ala lea e faapaiaina ai ma, faatasi ai ma lena mea, e faamagaloina ai a tatou mea sese. I lena taimi, sa ou iloa ai o le salamo o se meaalofa moni lava o le alofa mai lo tatou Tama Faalelagi ma le Faaola. Ou te mafaufau pea lava i le tele o lo La alolofa ia te a‘u ona o le mau o loo i le Mataupu Faavae ma Feagaiga 19 lea ua fetalai ai le Faaola, “Aua faauta, o A’u, o le Atua, na mafatia i nei mea mo tagata uma, ina ia latou le mafatia pe afai latou te salamo” (fuaiupu 16).

Ou te faafetai ona o Iesu Keriso ma Lana Togiola, ua tatou maua ai le avanoa e faaleleia atili ai ma avea ma tagata sili atu. Ua ou iloa le upumoni e faapea, e mafai ona suia o tatou loto pe a i ai ni o tatou faamoemoega faamaoni ma iloa e alolofa le Tama Faalelagi ma Iesu Keriso ia i tatou.

O le salamo o se meaalofa moni o le alofa mai lo tatou Tama Faalelagi ma le Faaola. O faamanuiaga ua ou maua mai lenei aafiaga ma le tele o isi e sili atu nai lo le mea na ou mafaufauina, ma “sa faatumulia lo‘u agaga i le olioli sa sili atu ona tele e pei o lo’u tiga!” (Alema 36:20). O le lagonaina o le mana faamalolo o le Faaola i lo‘u olaga ua faamanatu mai ai ia te a’u le loloto o le alofagia o tatou ma i taimi uma.