Auala Tatou te Faapotopoto ai Isaraelu i Aso Nei
Ua faasoa mai e nisi peteriaka o le siteki o latou manatu ma malamalamaaga tulaga ese i le tauao le faapotopotoina o Isaraelu.
I aso anamua, sa osia ai e le Alii se feagaiga ma Aperaamo o ana fanau o le a avea ma nuu filifilia (tagai Kenese 12:1–2). Ina ua fouvale fanau a Aperaamo, o ituaiga e sefululua o Isaraelu, sa faasalaina i latou e le Alii, ave faatagataotaua e Asuria ma Papelonia, ma iu ai ina faataapeapeina i atunuu uma (tagai Levitiko 26:33). Ae, sa finagalo le Alii e faamanuia i latou.
Ua valoia e perofeta anamua ma aso nei e faapea o Isaraelu, le nuu o le feagaiga a le Alii, o le a toe faapotopotoina faatasi. O le asō, ua ia i tatou le tiutetauave paia e fesoasoani ai e aumai Isaraelu ua faataapeapeina i totonu o le lafu a le Alii. E faatatau i lenei galuega taua, ua aoao mai Peresitene Russell M. Nelson: “Pe a tatou talanoa e uiga i le faapotopotoina o Isaraelu i itu uma e lua o le veli, o le mea moni o loo tatou faasino atu i le galuega faafaifeautalai, malumalu, ma talafaasolopito o aiga. O loo tatou faasino atu foi i le fausiaina o le faatuatua ma le molimau i loto o i latou o loo tatou ola faatasi, galulue, ma auauna i ai.”1
I le avea ai ma tagata o ituaiga o Isaraelu, ua tuuina mai ia i tatou ni tiutetauave patino ma faamanuiaga. O faamanuiaga faapeteriaka ua faailoa mai ai ia i tatou lo tatou gafa i le aiga o Isaraelu ma faapea ona avea ai ma o tatou tiutetauave patino e faapotopoto Isaraelu. Talu ai e musuia peteriaka e faailoa mai ia i tatou lena gafa, o lea sa matou talosagaina ai ni nai peteriaka e faasoa mai o latou manatu ma malamalamaaga tulaga ese i le taua o le faapotopotoina o Isaraelu.
Taumatau: ata na pueina e Craig Alan Shelley
O Lo Tatou Gafa
O tagata uma—e oo lava ia i latou e le tupuga mai ia Aperaamo—ua avea ma se vaega o le aiga o Isaraelu a o latou osia feagaiga ma le Atua. Na aoao mai Peresitene Russell M. Nelson: “O nisi o i tatou o suli moni o Aperaamo; o isi ua faapotopotoina mai i lona aiga e ala i le vaetamaina. E le faailogaina e le Alii se tagata. … Ua tuuina mai e Lana Ekalesia ia faamanuiaga faapeteriaka ina ia tuuina atu ai i tagata taitoatasi e mauaina se vaaiga mamao mo lona lumanai, faapea ai foi ma se sootaga ma aso ua tuanai, e oo lava foi i se folafolaga o lona tupuaga.”2
“Ina ia faia la tatou vaega i le faapotopotoina o ituaiga o Isaraelu, e tatau ona tatou malamalama muamua i le mea e tatau ona tatou faia,” na saunoa ai Brother Keith Stapleton, o se peteriaka i Georgia, ISA. “Pe a folafola atu le gafa o se tagata i lo latou faamanuiaga faapeteriaka, e tatau ona latou suesue i faamanuiaga ma tiutetauave o ituaiga o Isaraelu.”
O le toatele o tagata o le Ekalesia i aso nei o se vaega o le ituaiga o Efaraima po o Manase. O e na tupuga mai i nei alii sa tofia e faapotopoto isaraelu ua faataapeapeina, pe “suatia ai nuu uma” (Teuteronome 33:17).
Ae po o le a lava le ituaiga tatou te auai ai, ua tofu i tatou ma se matafaioi taua e faia i le faapotopotoina. “Pe a tatou malamalama tatou te o mai i se tasi o ituaiga na muai vaaia e perofeta anamua e o ma faapotopoto Isaraelu, tatou te maua ai se lagona o le faamoemoega,” o le saunoaga lea a Brother Barre Burgon, o se peteriaka i Iuta, ISA.
E ala i le iloaina ma le malamalama i lo tatou gafa, ua tatou iloa ai ma malamalama i lo tatou tiutetauave o le feagaiga e fesoasoani i le faapotopotoina o Isaraelu. “Manatua na poloaiina e le Alii ia Liae e aua nei alu i le nuu folafolaina e aunoa ma le aumaia muamua o tusitusiga paia ia na talanoa e uiga i ona tuaa,” na saunoa ai Brother Vyacheslav Protopopov,o se peteriaka mai Moscow, Rusia.“E finagalo le Alii ina ia iloa e Lona nuu po o ai i latou.”
O Auala E Mafai Ona Tatou Faapotopotoina Ai Isaraelu
E tele auala e auai ai i le faapotopotoina o Isaraelu, lea na faamatalaina e Peresitene Nelson o “le galuegaaupito sili ona taua i le lalolagi.”3 O lenei galuega e le tatau ona lofituina. O le mea moni, o se aafiaga ofoofogia le avea ai ma se vaega. Sa faamalamalama maie Brother Calixto Muruchi,o se peteriaka mai le Matagaluega a La Paz, Polivia, e faapea ona o le alofa o le Atua ua Ia “tuuina mai ai ia i tatou le avanoa e avea ai ma meafaigaluega i Ona aao ina ia mafai ai e Ona atalii ma afafine uma ona iloa le talalelei toefuataiina a Iesu Keriso ma ina ia tatou maua uma le avanoa e toe foi atu ai i Lona afioaga ma fai mo tatou tofi le ola e faavavau.”
E faapefea la ona tatou faapotopotoina o Isaraelu? E tele ni mea e mafai e i tatou taitoatasi ona fai e auai ai i lenei galuega tele.
Galuega Faafaifeautalai
I le taua o le galuega faafaifeautalai, na saunoa ai Brother Wayne Allgaier, o se peteriaka i Maryland, ISA, “Ua naunau lo tatou Tama oi le Lagi e faamanuia Ana fanau uma. O taumafaiga e toe faapotopoto mai i latou i Lana lafu, latou te maua ai nei faamanuiaga.
“O loo matou aumaia i tagata le avanoa mo le faaeaga e faavavau,” o le faaopoopo mai lea a Brother Burgon. “O le faamoemoega atoa lena o lenei olaga i le lalolagi. … O le avanoa moni lava lenei mo le Tama Faalelagi e toe faafoi mai ai le toatele o Ana fanau.”
E masani ona uunaia i tatoue perofeta ma aposetolo ina ia avea le galuega faafaifeautalai o se vaega “masani ma faalenatura”o o tatou olaga i aso taitasi.4 E pei ona faamalamalama mai e Elder Neil L. Andersen o le Korama a Aposetolo e Toasefululua, e le manaomia ona e lagonaina le “tausalaina e uiga i soo se le lavae te manatu o loo ia te oe i le faasoaina atu o le talalelei.” Nai lo lena, e mafai ona e “tatalo … ‘ia tu o se [molimau] a le Atua’ [Mosaea18:9]” ma “ia tatalaina lo outou faatuatua ia Keriso.”5
A o tatou tatalo mo avanoa “e saili ai i latou o e naunau e faamuamua le Atua i o latou olaga,”6 o le a taialaina i tatou ia iloa le auala e faasoa atu ai le malamalama o le talalelei ia i latou o siomia i tatou.
Ata o le Malumalu o Nuku’alofa i Toga na pueina e James Babcock
Galuega o le Malumalu ma le Talafaasolopito o Aiga
O le faapotopotoina o Isaraleu o loo tupu i itu uma e lua o le veli. Ua matauina e Brother Allgaier se faatelevaveina o le faapotopotoina o Isaraelu e ala i talafaasolopito o aiga ma galuega faalemalumalu: “Ua tatou faalogo o saunoa atili Peresitene Nelson e uiga i le faapotopotoina o Isaraelu e le na o le galuega faafaifeautalai ae o itu uma e lua o le veli. E toatele atu tagata i le isi itu o le veli nai lo o loo i ai iinei i le lalolagi o loo faatalitali mo nei sauniga taua ina ia faia. O na tagata e tutusa lava le taua ma tagata o loo ola i aso nei o loo manaomia le talalelei i o latou olaga i le lalolagi.
Na aoao mai Peresitene Nelson, “Soo se taimi tatou te faia ai soo se mea e fesoasoani ai i soo se tasi—po o le fea lava itu o le veli—i le osia ma le tausia o feagaiga ma le Atua, ua tatou fesoasoani i le faapotopotoina o Isaraelu.”7
Faamalosia o Siona
Faatasi ai ma le galuega faafaifeautalai, malumalu, ma talafaasolopito o aiga, na aoao mai ai Peresitene Nelson e faapea o le faapotopotoina o Isaraelu e “[faasino] foi i le fausiaina o le faatuatua ma le molimau i loto o i latou o loo tatou nonofo faatasi, galulue, ma auauna atu i ai.”8
O lona uiga e tatau ona tatou fausia lo tatou lava faatuatua faapea foi ma le lagolagosua ma le faamalolosia o isi. “E tatau ona tatou faatofuina atoatoa i le talalelei,” na saunoa ai Brother Lovelock, o se peteriaka mai Kuiniselani, Ausetalia. “Afai tatou te faia lena mea, o loo tatou fesoasoani i le faapotopotoina o Isaraelu.” Pe a faatofuina i tatou i le talalelei, e mafai ona tatou faamalolosia isi a o tatou auauna atu, faataunuu o tatou valaauga, ma lagolago o tatou aiga.
Aufaatasi i le Faalapotopotoga
“O le a tupu le faapotopotoina pe tatou te fesoasoani i ai pe leai,” o le tala lea a Brother Allgaier. “O le galuega a le Alii, ma o le a Ia faamautinoa ua uma. Mo i latou e sili atu ona malolosi i ai, o le a tele atu faamanuiaga e sasaa mai i luga o o latou ulu.
A o tatou saili e aoao atu le talalelei, tausia ni aiga amiotonu, faalautele o tatou valaauga, ma auauna atu ia i latou o siomia i tatou, o loo tatou fesoasoani e faapotopoto Isaraelu. Fai mai Brother Burgon, “O loo i ai se lagona o le faanatinati i le perofeta, Korama a Aposetolo e Toasefululua, ma isi i le taitaiga a le Ekalesia ua oo i le taimi e laa ai i luga. Ua oo i le taimi e saunia ai i tatou lava ma saunia isi mo le faaeaga e faavavau.
“I nai tausaga ua mavae atu nei,” na saunoa ai Uso Lovelock, “o tupulaga talavou ua o mai e maua o latou faamanuiaga faapeteriaka o ni agaga matagofie ma malolosi. E leai sou masalosalo o nisi o fanau sili ona pele ma tamalii a le Atua ua savavali faatasi ma i tatou i le taimi nei, ma o loo latou sauniuni mo le Afio Mai Faalua o lo tatou Faaola, o Iesu Keriso, ma fesoasoani i lenei galuega maoae o le faapotopotoina o Isaraelu.”
O loo tupu nei le faapotopotoina o Isaraelu, ma sa valoia e le Alii o le a avea ma se mea mamalu e tupu (tagai Ieremia 16:14–15). Ua saunoa mai Peresitene Nelson: “Pe a tatou iloa o i tatou o fanau o le feagaiga, ua tatou iloa ai pe o ai i tatou ma mea ua faamoemoeina e le Atua mai ia i tatou. Ua tusia Lana tulafono i o tatou loto. O Ia o lo tatou Atua ma o i tatou o Lona nuu.”9 I le avea ai ma fanau a tama Aperaamo, ua nafa i tatou ma le valaauliaina o isi e faapotopoto i totonu o le lafu e ala i galuega faafaifeautalai, malumalu, ma talafaasolopito o aiga. O le faia o lena mea, tatou te saunia lelei ai i tatou lava mo le ola e faavavau.