Kerisimasi ma le Faapotopotoina o Isaraelu

O le Kerisimasi e faamanatu mai ai ia i tatou le alofa atoatoa ma tumau o le Tama Faalelagi. E leai se meaalofa e mafai ona tutusa ma le taulaga paia na tuuina mai e le Atua e laveai ai Lana fanau: Lona Alo Pele e Toatasi, o Iesu Keriso. Mai le Faaola e oo mai ai “mea lelei uma” (Moronae7:22), e aofia ai le avanoa e faaalu ai le faavavau faatasi ma tagata tatou te alolofa i ai i le faataunuuina o le fuafuaga sili o le fiafia a le Tama Faalelagi.

O le a se mea e mafai ona tatou faia e faaali atu ai le faafetai i le Tama Faalelagi mo nei meaalofa maoae? O le mea e tasi e mafai ona tatou faia o le fesoasoani ia te Ia e faataunuu Lana galuega. Sa fetalai atu le Alii ia Mose, “Aua faauta, o la’u galuega ma lo’u mamalu lenei—ia aumaia le tino ola pea ma le ola faavavau o le tagata” (Mose 1:39). Ma ua valaaulia i tatou e fesoasoani atu.

E masani ona saunoa mai Peresitene Russell M. Nelson e faapea o le faapotopotoina o Isaraelu o le galuega aupito sili lea ona taua o loo faia i le lalolagi i aso nei. Ma sa ia faamalamalama mai, “Pe a tatou tautatala e uiga i le faapotopotoina o Isaraelu i itu uma e lua o le veli, ua tatou faasino … i le galuega faafaifeautalai, malumalu, ma talafaasolopito o aiga” (“Ia Manumalo le Atua,” Liahona, Nov. 2020, 92).

A o outou mafaufau loloto i le uiga moni o lenei vaitau faapitoa, ou te valaaulia outou e faitau le “Talafaasolopito o Aiga, Malumalu, ma le Galuega Faafaifeautalai: Paaga Mamana i le Faapotopotoina o Isaraelu” (itulau 12). Ona mafaufau lea po o le a se mea e mafai ona e faia e fesoasoani ai e toe aumai fanau faapelepele a lo tatou Tama ia te Ia.

Manuia le Kerisimasi!

Mike Judson

Matagaluega o Talafaasolopito o Aiga