“Apaau o le Faatuatua,” Liahona, Tes. 2021.
E Na‘o le Faatekinolosi: Atatosi o le Faatuatua
Apaau o le Faatuatua
Sa ou manao ia taunuu le moomooga a la‘u tama ma vaaia i ona foliga le olioli sa ou matuai manaomia mo a‘u lava ia.
Atapue mai le Getty Images
“O se lelefua enaena e tu i lo‘u lima,” na ee ai la’u tama e tolu tausaga le matua ma le fiafia. O lana tali o se tali mamā i la‘u fesili soona lafo, “O le a se mea e te manao ai mo le Kerisimasi?”
Sa ou taumemu atu “Sei tatou vaai” a o le‘i faamoeina o ia, ma fiafia i taimi e seāseā maua ou te faaaluina faatasi ma ia. Sa tele ina ou le i ai iina i le tele o taimi.
O ee e le mapu o lona tuafafine, sa mafatia i le manava, sa faaauau pea ona toso atu ai a‘u i totonu o le lua uliuli o le atuatuvale o se tina failele. Ou te lagona le pei o se ipu saina ua nutimomoia ua faapipii faatasi i se mea faapipii—maai, gaui, ma ua tau le gafatia. Ou te le manao i o‘u lagona oona e faaleagaina le fiafia o la‘u tama mo le vaitau.
Ou te lagonaina le mamafa o lana tali i o‘u tauau. Sa tu i lona lima se lelefua enaena a o ma faia se savaliga o aso taitasi i le ea manaia o le amataga o le tautotogo. Sa ia talanoa e uiga i ai mo ni vaiaso. O le faatumutumuga lava lea o lona olaga puupuu.
Sa ou manao ia taunuu lona moomooga ma vaaia i ona foliga se olioli sa ou matuai manaomia mo a‘u lava. Ou te moe ma tatalo mo le filemu ma le toomaga, ma le lagona o le a faigata lenei Kerisimasi mo i ma‘ua uma.
O le taeao na sosoo ai, na matou feala a‘e ai i se aso matagofie—e atoatoa mo la matou savaliga sopo faaletausaga o le Aso e Sosoo ma le Kerisimasi. Ua saunia la‘u tama ma le tele o le malosi nai lo le mea sa masani ai, ma talanoa e uiga i le taimi ma le auala o le a taunuu mai ai lana lelefua.
“Ua fai si malulu tele,” na ou fai atu ai a o o‘u sipiina lona ofumafanafana ma toso ifo se pulou i luga o lona ulu. “Atonu o le a nonofo pea lelefua i le mafanafana o o latou fale.”
“E le [faapena] la‘u lelefua,” na ia ata ai, ma le le masuia.
Ua ou tuuina la‘u tama teine i le nofoa pepe ma fai se tatalo le leoa: “Faamolemole aua le faatagaina o ia e matua le fiafia lava.”
A o ma savavali, e vaavaai i tua ma luma lo‘u tama i totonu o laau, ma naunau atili i laa taitasi. Ua luluina e le matagi malulu laulaau. E taamilo o ia a o latou pauu atu i lalo o le togavao, lea e tatū ai i luga ma se pa‘o tele o ona seevae mamafa. Ia te ia, ua tumu le lalolagi i maneta, tau lava o le faatalitali mo lona manao ia taunuu. Ae ou te le o vaai i ni lelefua.
Ua matou latalata i le faaiuga o le auala. A o amata ona ou valaau atu ia te ia i le fale, sa ou faalogoina lana ata fiafia. Ou te faliu atu e vaai ia te ia i tafatafa o se laau o faalālā i luga lona tamatamailima a‘o siva faataamilo ia te ia se lelefua enaena laitiiti. Faatasi ai ma sina tamai pa‘i, na la feiloai ai, ma ua ataata o ia. Ua ma feva’aia’i, ma ou lagonaina le mafanafana ua ufitia ai a‘u, ma le maofa i le vavega itiiti lea faatoa ou molimauina.
Ua patipati o‘u lima i le faamalo ma le faafetai. Sa faafofoga mai le Atua. O le mamafa o lo‘u faanoanoa ua faamāmāina, ma ua molimau mai le Agaga o loo Ia silafia a’u. Sa ia faafofogaina a‘u tatalo faatauanau mo le malosi ma le toomaga i le taimi o le vaivai o po ma aso faanoanoa.
E oo lava i mea laiti, e pei o le mauaina o se lelefua i se aso o Tesema, e faamaonia ai o loo leoleoina e le Tama Faalelagi lo‘u aiga—e faamanatu mai ai ia te a‘u o loo tutupu pea vavega pe a tatou maua le faatuatua o se tamaitiiti.