O Lesona e Tolu mai le Suesueina o le Mataupu Faavae ma Feagaiga
E mafai ona tatou aoao e uiga i le sootaga a le Alii ma i tatou a o tatou aoao i le ala na Ia galue ai Au Paia o Aso e Gata Ai i le taimi ua tuanai.
Luga ma le taumatau mamao: ata na tusia e Joshua Dennis; taumatau: Mamafa Faataumaoi o Itulau e 116, saunia e Kwani Povi Winder
O le suesueina o le Mataupu Faavae ma Feagaiga i lenei tausaga ua mafua ai ona ou mafaufau e uiga i le tele o auala ua ou iloa ai le Atua. O nisi taimi ou te lagonaina ai Lona faatasi mai i le taimi lava lena. E masani ona ou ofo i Lona latalata mai pe a ou faaaluina le taimi i le natura. Ma e mafai ona ou faasino atu i taimi na fetalai manino mai ai le Alii ia te au e ala i le Agaga.
O se tasi o vaega taua o la‘u sailiga ia iloa le Atua e aofia ai le toe tepa i tua i le taimi ua tuanai. Mo se faataitaiga, e masani ona mafai ona ou maua le uiga i o‘u tofotofoga pe a mavae sina taimi. Ou te manuia foi mai le suesueina o olaga o isi o e sa saili ia iloa le Atua. O o latou aafiaga e fesoasoani ou te onosai atili ai i a‘u taumafaiga ma iloa ma faatuatuaina a’u lava uunaiga faaleagaga. I se faapuupuuga, latou te fesoasoani ia te au ia malamalama atili i le ala e fegalegaleai ai le Alii ma Ana fanau.
Atonu o le mafuaaga lea na poloaiina ai e le Alii le Au Paia i le sauniga faavae a le Ekalesia, “Faauta, ia i ai se talafaamaumau e tausia i totonu o outou” (Mataupu Faavae ma Feagaiga 21:1). O le faamaumauga faasolopito o loo teuina e uluai tagata o le Ekalesia o se punavai mauoa mo le suesueina o le ala e galue ai le Atua ma i tatou. Ua ou iloa e faapitoa le aoga o le suesue i faaaliga i le talaaga faasolopito, e faaaoga ai punaoa i le vaega o le Toefuataiga ma le Talafaasolopito o le Ekalesia o le Potutusi o le Talalelei.
O lesona fesootai nei e tolu ua ou aoaoina mai le suesueina o le Mataupu Faavae ma Feagaiga ma le uluai talafaasolopito o le Ekalesia i lenei tausaga.
O Fesili e Muamua i Faaaliga
Na toetoe lava o faaaliga uma i le Mataupu Faavae ma Feagaiga na tuuina mai e tali ai fesili. E na o le tasi e foliga mai o se faalavefau faalelagi e lei mafaufauina (tagai Mataupu Faavae ma Feagaiga 27). O fesili na taitai atu ai i nei faaaliga sa uunaia e le suesueina o tusitusiga paia, o tofotofoga matuitui tiga, po o manatu faaleaganuu o le aso.1 Sa latou atagia mai ai le faatuatua, fiailoa, masalosaloga, ma popolega o le uluai Au Paia.
O le Mataupu Faavae ma Feagaiga 42 o se tali i fesili patino e lima e uiga i le ala e tatau ona faapotopoto ma lagolago ai e le Au Paia le tasi ma le isi.2 E taua tali a le Alii, e le gata mo a latou anotusi ae faapea foi mo mea ua latou tau mai ia i tatou e uiga i le ala e galue ai faaaliga. Sa saunia le Au Paia e ala i o latou tulaga ma o latou manatunatuga loloto. Sa latou fatuina ni fesili, o atu i le Atua, ma faatauaina moni lava Ana tali.
Mafaufau pe faapefea ona e tali atu i faamatalaga na tuuina atu ia te oe mai le matalalaga, e pei o se faasalalauga o se uepi e lei faamoemoeina mo ni seevae. Atonu e te fiafia i ai, ae atonu o lea e le amanaiaina. Peitai, pe a e manaomia ni seevae ma alu e saili mo se pea e fetaui ma ou manaoga ma ou vae, e te gauai lelei atu i meae te maua ma faia se faaiuga e faatino. E faapena foi ona faatatau lenei mea i lo tatou sailiga faaleagaga.
E Faamamaluina e le Alii Lo Tatou Faitalia
E taua a tatou filifiliga, e le gata i lo tatou lava tuputupu ae ae faapea foi i foliga o le galuega a le Alii i le lalolagi. O Ia o le taitai pese, ma o i tatou o tagata o le au faili. O a tatou taleni, talaaga, ma faaiuga e saofaga i le matagofie o musika. O Katelani, Ohaio, na tulai mai ma le lauiloa i le Ekalesia anamua i se vaega ona sa filifili uluai faifeautalai e malolo iina ma asiasi atu i uo a o agai atu i le fanua lea na valaauina i ai i latou. O a latou fesootaiga ma a latou filifiliga musuia e asiasi i Katelani sa taua i le toe faaalia mai o le Toefuataiga.
Ma e faatagaina e le Alii i tatou uma, e aofia ai ma Iosefa Samita, e faia ni mea sese. O i tatou o Ana fanau, ma e pei foi o soo se matua atamai, e tuuto mai o Ia i lo tatou tuputupu ae ma e finagalo ia tatou aoao e ala i aafiaga.
Na faatagaina e le Alii ia Iosefa Samita e tuuina atu uluai itulau e 116 o le faaliliuga o le Tusi a Mamona ia Matini Harisi e ui ina silafia e le Alii o le a leiloloa i latou. O lenei aafiaga sa tiga mo Iosefa, ae sa ia aoao ia avea ma se tausimea e sili atu ona faaeteete. Sa ia maua le faamagaloga ma sa “toe valaaulia i le galuega” (Mataupu Faavae ma Feagaiga 3:10).
E tuuto le Alii i lo tatou tuputupu ae ma e finagalo ia tatou aoao e ala i aafiaga.
O si Mea Itiiti Iʼi, ma si Mea Itiiti Iʼo
Sa lei tuuina atu e le Alii ia Iosefa Samita se tusitaulima atoa o faatonuga i le Vao Paia. O faaaliga o loo atagia mai ai se talanoaga faifai pea i le va o le Alii ma le Perofeta. O nisi taimi latou te tatalaina ai vaaiga i le faavavau. E masani lava, sa lava mo manaoga o le aso, ma na toe foi mai Iosefa mulimuli ane ma ni fesili faaopoopo.
O uluai faaaliga na poloaiina ai le Au Paia e faapotopoto ma fausia se aai o Siona i Misuri. Ina ua faate‘aeseina le Au Paia mai le eria, sa faatonuina e le Alii ia Iosefa Samita e taumafai e toe maua lo latou fanua, muamua i le Tolauapiga a Siona ma mulimuli ane e ala i le talosagaina o le malo mo se fesoasoani. Mulimuli ane, sa iloa ai e Iosefa o Siona sa sili atu le tele nai lo le aai e tasi. E mafai ona faaauau pea le faapotopotoina i isi nofoaga a o faatuina e le Au Paia ia siteki ma fausia malumalu.3
O tulaga e ola ai le Au Paia e matua tele le suiga i le aluga o taimi. Oka se faamanuiaga le i ai o faaaliga faifaipea e fesoasoani tatou te faatautaia ai manaoga o lo tatou lalolagi fesuisuiai! O aoaoga faavae autu o le talalelei e tumau, ae o le Toefuataiga faifai pea ua faamoemoe i le luitau o le suiga.