O Leo o le Au Paia o Aso e Gata Ai
Faamolemole Aua Nei Taofia le Pepese
I se pasi e tumu i tagata ma le pisapisao, sa matou maua ai se auala e molimau atu ai e uiga i le Faaola.
Ata na pueina e Rob Crandall/Alamy Stock Photo
Sa faatoa tuua lava e i matou o faifeautalai e toafa le fale o se ulugalii faamisiona ma matou talotalo atu i se pasi e toe ave i matou i la matou eria.
Sa matou taufaaofiofi atu i se motu o tagata o loo tutu ma uumau le pa uamea i luga ae o o matou ulu. O le tutu ai, sa lei pine ae matou faalagolago atu o matou tino i luga o pasese o loo saofafai e faaavanoa se avanoa mo isi pasese e faaofiofi mai ai.
Sa nofo se tamaitai e le matua tele i lalo ifo o au, sa tumu ona vae i ato ma pusa o faatauga. Sa tau mai e ona mata pogisa ua lelava o ia, ma sa faaalia i ona foliga lona le fiafia i le nofo ai i totonu o se pasi ua tumu e agai atu i le ea piipii, vevela o Panama.
I le moeiini ai o o‘u mata, sa ou mafaufau ai e mafai ona ou sogisogi i meaai Saina sa saunia e lo’u tina ma tuafafine mo le taumafataga o le Afiafi o le Kerisimasi. Sa ou mafaufau foi e mafai ona ou faalogo i musika o le Kerisimasi na taina e Tina i taimi uma. O na mafaufauga faamafanafana sa lei pine ae fufulueseina le vevela ma le susu o le ea, ma sa amata ona ou hamuina se pese Kerisimasi. Sa faamāmāina le lanu o mata o le fafine o loo i lalo ifo o a’u. Sa ou maua le lototele ma amata ona usuina se viiga o le Kerisimasi ia te au lava i le faaSipaniolo. Sa faatasi mai ai Elder Glazier, ona ma fifilemu lea.
“Faamolemole, aua le taofia,” o le tala lea a le fafine, o ona mata ua melotagi.
O le tilotilo atu i a‘u soa, sa ou aumaia ai i fafo la’u tusipese.
“Uso e ma tuafafine,” sa ou valaau atu ai i le talisuaga o le pasi. A o toso mai foi e a‘u soa a latou tusipese, sa ou faaopoopo atu i ai, “Matou te fia usuina ni pese Kerisimasi e faasoa atu ai le agaga o le Kerisimasi ia te outou—o se savali laitiiti mai faifeautalai O Le Ekalesia a Iesu Keriso o le Au Paia o Aso e Gata Ai.”
Sa matou usuina viiga uma o le Kerisimasi i le tusipese faaSipaniolo. Sa le o i matou o se aufaipese faalelagi, ae o le mana o musika ma upu e uiga i le soifua mai o le Faaola na pai atu i loto. O le fiafia i le auauna atu i le misiona i le taimi o le Kerisimasi na faatumulia ai i matou o faifeautalai e toafa i le filemu, olioli, ma le malamalama.
Sa matou usuina seia oo ina matou taunuu i le mea matou te nonofo ai. Sa alaga mai le fafine o loo nofo i lalo ifo o a’u ma fai mai, “Faafetai lava, tagata pese o le Kerisimasi!”
Ina ua uma ona matou laa ese mai le pasi, sa matou talotalo faatofa atu i le taavale tumu. Sa patipati le pasese a o aluese atu le pasi, ma matou feaei atu i se maupuepue i le po mafanafana. Ou te toe tepa lava i tua i lena po ma le agaga faafetai mo le tamaitai na tuuina mai ia i matou se avanoa e molimau atu ai i le Faaola e ala i pese.