O Se Filifiliga Taua

Saunia e Irene Soderquist Larsen

E alala le tusitala i Idaho, ISA.

Sa tonu ia i ma‘ua ma te tata toalua. O le ma auala lea e aumaia ai le olioli i le lalolagi.

photo of Irene and Alice playing a piano duet

I se tasi aso i le tolu tausaga talu ai, ina ua 87 o‘u tausaga, sa ou i ai i se gaoioiga faaagafesootai. Sa i ai iina se fafine sa taina le piano; sa ia tata e pei o au. Ina ua ou fesili atu i lona igoa, sa ou iloa ai o Alice Bodily, le tina o lou epikopo. Sa 90 ona tausaga i lena taimi.

Sa ou fesili i lo‘u epikopo pe manatu o ia o le a manao lona tina e tata taitoalua. Sa ia fesili atu ia te ia, ma sa ia fai mai o le a fiafia i ai o ia. O le tolu tausaga talu ai, sa amata ai ona ma ta piano i taeao uma o Aso Lulu mo le itula e tasi mo lo maua lava fiafia.

Sa ma agai i luma mai le faigofie o pese taitoalua a tamaiti i ni pese ta taitoalua sa masani ona ma taina ma lou tina. Ae o le mea sa sili ona ma fiafia i ai o le taina toalua lea o viiga paia a le Ekalesia. O viiga e lua ma te fiafia i ai “O le Talosaga Muamua a Iosefa Samita” (Viiga, nu. 14) ma le “A i ai i le Aiga le Alofa” (Viiga, nu. 181).

O le tata i Aso Lulu uma ma le faataitai i isi taimi, sa iu ona lelei atu le ma tata ma faagaeetia ai le ma fanau i se konaseti laitiiti. Sa fai mai lo‘u epikopo e manao o ia ma te tata i le sauniga faamanatuga, o lea sa ma aoaoina ai le “O Le Agaga o le Atua” (Viiga, nu. 2). O se luitau moni lena mo i ma’ua, ae sa ma galulue ai mo ni nai masina ma faateia ai i maua lava ma le ma fanau ma atonu foi o tagata o le ma uarota. A o lei oo mai le KOVITI-19, sa ma taina lenei viiga i uarota e lima ama fanau.

E tele viiga matagofie ua ma fiafia nei e ta, e pei o le “Mulimuli Mai ia te A‘u” (Viiga, nu. 62), “Come, Thou Fount of Every Blessing” (e le o i aii le tusipese o lo o faaaogaina i le taimi nei, ae e faigofie ona maua), ma le “Tofia e Auauna”(Viiga, nu. 156). O nisi taimi o le sailia o se musika e taina e tagata e toalua o lona uiga o le fesili atu mo se fesoasoani, ae o se tagata o le aiga, uso o auaunaga, po o se taitai musika a le uarota e masani lava ona fiafia e fesoasoani mai.

Sa ma mauaina foi se faaputuga o pese Kerisimasi ma saunia se polokalama e 40-minute e faasoaina atu i se fale mo e e moomia le fesoasoani i le tausiga ia Tesema. Sa faatasi mai se isi tagata musika ma taina le sailofoni ma se seti o logo e faaopoopo ai ni mea eseese i la ma faafiafiaga.

E ala i ma musika, i ma vaitausaga o le 90 ma le 93, ma te lagona ai o loo ma aumaia “Le Lalolagi ia Fiafia” (Viiga, nu. 113) e le gata i le Kerisimasi ae faapea foi i le tausaga atoa. Sa ma ta faatasi e le aunoa i le taimi nei mo le tolu tausaga. O le filifili e tata faatasi o se faaiuga autu lea mo i ma‘ua uma!

Auaunaga mai Tagata Matutua

O auala nei na maua e nisi o tagata matutua o le Ekalesia e faamanuia ai i latou o siomia i latou:

I ni nai tausaga ua mavae, sa lolomiina ai e Wayne Lewis, o Uosigitone, ISA, lana tala o le olaga. Sa ia tuuina atu ni kopi i lana fanau uma ma fanau a fanau. “E lei faia lenei mea mo le manuia o soo se tasi ae o lo‘u aiga, e uunaia ai i latou e tusitusi e uiga i o latou aafiaga o le olaga,” o lana tala lea. E lei leva lava, ae mafatia Wayne i le pe o le tino, ona sosoo ai lea ma le isi. “Ina ua uma, sa iloa e lo‘u faufautua o le tusiaina o tala e uiga i lo’u olaga o le fesoasoani moni lea e faaitiitia ai atuatuvalega na oo mai ona o manuaga o le faiai, o lea sa faaauau ai pea ona ou tusitusi e uiga i lo‘u olaga.” I le taimi nei ua 88 tausaga le matua, ua faaopoopo mai Wayne, “Ou te uunaia tagata uma e tusi o latou tala o le olaga. Faatino nei loa, ma faaaoga soo se mamanu e te manatu o le a faitauina e i latou e te alofa i ai.
Ina ua aafia le faletua o Wayne, o Maria, i se galuega faatino e lagolagoina e le Ekalesia, na te lei moemiti lava i le 15 tausaga mulimuli ane o loo ia faia pea ni palanikeke mo le falemai i le lotoifale. O Maria ua 84 nei ona tausaga, ma o masina taitasi na te tuuina atu ai ni fusi o palanikeke laiti mo pepe fou ma palanikeke mo tamaiti, o ia palanikeke taitasi “e faia ma le alofa mo i latou o e manaomia i latou.”
Ua faatuina e Susan Barstow, 74, o Minnesota, ISA, se faataitaiga o le auauna atu e ala i le lalagaina o totini lima ma totini ma tuu ese atu. “Latou te tuuina atu i tagata le mafanafana ma le fiafia,” o lana tala lea. E auauna atu foi o ia o se taitai o auaunaga alofa a le Aualofa a lana uarota. “O se valaauga maoae mo au,” na ia fai mai ai, “ona e mafai ona ou auauna atu i tagata pe a latou manaomia le fesoasoani ma fesoasoani i isi ia faia foi faapea.”