ENNAAN AN RITŌL AN ERIA

Lōke Doulul eo an Elder ro im Būreejtōnji eo an Doulul eo an Kōrā ro

Elder Kazuhiko Yamashita

President, Pacific Area Presidency

Men̄e ilo iien ajeded eo an nan̄inmej in COVID-19, eddōk ļo̧k eo an Kabun̄ eo an Jisōs Kraist im Armej ro Rekwojarjar ilo Raan ko Āliktata ekar wōnm̧m̧anļo̧k wōt. Kōn iakwe eo an Irooj n̄an kōj, Ej tōl kōj jān rikanaan eo ad ej mour rainin, Būreejtōn Russell M. Nelson.

Katak ko im pedped in katak ko an gospel in rejjab oktak bōtaab em̧ōj aō lo elōn men ko em̧ōj aer oktak me emarōn bōktok menin kōjeram̧m̧an ko ilo Kabun̄ in im ilo m̧weo. Juon iaan oktak ko āliktata ekar kōm̧m̧an ej bwe doulul eo an elder ro im Doulul eo an Būreejtōnji eo an Kōrā ro rej aikuj bōk eļap ilo jerbal in lo̧mo̧o̧r.

Ekkar jān kōjeļļā eo ilo raan eo 6 Oktoba stake im ward ritōl ro, eddo ko an juon membōr ej jerbal in mijinede, im tampeḷ im menmenbwij an baam̧le ilo ward ko, eddo kein rej an Būreejtōnji eo an Doulul eo an elder ro im Doulul eo an Kōrā ro. Būreejtōnji rein rej aikuj bar lukkuun lale im jerbal in jipan̄ ippān doon im kea n̄an ro ri aikuj.¹

Eļap an aiboojoj oktak in! Eļap aō kam̧m̧olool kōn oktak in.

Ta meļeļein oktak aiboojoj in? Jān baj n̄a, ej meļeļein bwe Būreejtōnji eo an doulul eo an elder ro im kōrā ro remarōn jipan̄ kameraik ļo̧k eddo ko an bisop ro ilo aer wōnmmanļo̧k ilo aer kōm̧m̧ane jerbal in mijinede, im tampeḷ im menmenbwij an baam̧le, im kajjojo aikuj ko an armej.

Ilo an bisop eo oņaak e jāān in jipan̄ eo im kōjerbal joortak in jitlo̧k ko ilo ward eo, Būreejtōnji eo an doulul eo an elder ro im kōrā ro rej aikuj jerbal ippān baamļe ko n̄an katakin kōn pedped ko an un̄n̄are peim make, im n̄an kōnono ippān rūtto ro kōn men ko rej waļo̧k ilo jikin jerbal, bajet, ak apan̄ ko ikōtaan juon baamļe.

Bisop ro rej aikuj kōḷmenḷọkjeṇ n̄an kōkajoorļo̧k jodikdik—diktak in ritōl ro ilju im jekļaj—n̄an pād wōt ilo iaļan bujen in.

Aolep membōr ro rej aikuj in meļeļe kōn oktak in eaiboojoj. Ak ta eo membōr ro remarōn kōm̧m̧ane?

Jerbal ippān Būreejtōnji eo an doulul eo an elder ro im kōrā ro.

Jen ļoor pedped ko kōn iakwe eo eaiboojoj, tilmaake im kūr ro jet n̄an ļoor Jisōs Kraist. Kōm̧m̧an bwe jen jerbal ippān mijinede ro. Kōm̧m̧an bwe en kāāl mālim ko ad n̄an deļon̄e tampeḷ, im kappukōt etan ro jibūd im jim̧m̧ad im bōk ļo̧k n̄an tampeḷ. Kōm̧m̧an bwe jen kajjitōk jipan̄ kōn tampeļ im menmenbwij ko ad.

Lōke Būreejtōnji ro an doulul eo an elder ro im kōrā ro.

N̄e jej ioon men ko reppen ilo jikin jerbal, jāān, baamļe ko, ajri ro ak apan̄ ko ilo m̧are eo, jej aikuj jibadōkļo̧k Būreejtōnji ro an Doulul eo an Elder ro im Kōrā ro im kajjitōk jipān ko aer. Remarōn letok im̧we, tōl im kapilōk kōj ilo ad kappukot im̧we jān jeje ko rekwojarjar, Bok in Bōk Meļeļe Eļap an Kabūn in im ilo ad jar aolep raan.

Sister Jean B. Bingham, Būreejtōn eo eutiej an Doulul eo an Kōrā, ekar katakin: “Ijeļo̧kin ad ijjino ippān bisop, membōr ro rej aikuj ekkatak bwe ren ijjino ippān būreejtōnji ro an Doulul eo an Kōrā ro im doulul eo an elder ro.”²

Kōm̧m̧ane jerbal in karejar eo ilo m̧ooļ.

Ekkar n̄an Bok in Bōk Meļeļe Eļap an Kabun̄ in, jerbal in karejar ej meļeļein jerbal n̄an ro jet āinwōt Rilo̧mo̧o̧r (lale Matu 20:26–28). E ekar iakwe, katakin, jar kōn, kaeņōm̧m̧an, kōjeram̧m̧an ro rūtūrin (lale Jerbal ko 10:38). Āinwōt ro rikaļooran Jisōs Kraist, jej kappukōt n̄an jerbal in karejar n̄an ro nejin Anij.

Irooj ekōņaan bwe aolep membōr ro ilo Kabun̄ in An ren bōk kain kea rot in. Kōn unin, rikabwijer priesthood ro em̧ōj jitōn̄ er āinwōt rikarejar m̧aan n̄an kajjojo em̧. Rikarejar kōrā ro kar jitōn̄ er n̄an loļo̧k kajjojo kōrā ro rerūtto. Ijjitōn̄ kein rej jipan̄ membōr ro an Kabun̄ in bwe jen keememej im kea kōn er (lale Moronai 6:4).

Jerbal in karejar ej wāween eo eaorōk ilo ad kōjparok kien ko n̄an iakwe Anij im n̄an iakwe ro rūtūrir (lale Matu 22:36–40). Ej barāinwōt juon wāween n̄an jipan̄ kadedeikļo̧k jerbal in lo̧mo̧o̧r im mour eo eaibojooj ijo eutiejtata.

Būreejtōnji eo an Doulul eo an elder ro im kōrā ro rej jipan̄ rikarejar m̧aan im rikarejar kōrā ro ekkatak wāween jerbal in karejar n̄an ro jet. Rej barāinwōt leļo̧k im̧we, tōl, im rie. Rej bar marōn kōm̧m̧ane intōrpiu ko ikkijeen jerbal in karejar³, kweiļo̧k/jar ko ilo jabōt, im ilo bwebwenato ko ad make.⁴

Būratōr im Sister ro, jen niknik in kōm̧m̧ane jerbal in karejar eo ad, ainwōt an kar Rilo̧mo̧or kōm̧m̧ane.

Lōke bratōr im sister ro rej kōm̧m̧ane jerbal in karejar.

Elder Paul B. Pieper, Jiljilimjuonn̄oul eo Ritōl eo Eutiej ekar kapilōk kōj: “Jej aikuj in lōke rikarejar m̧aan im rikarejar kōrā ro me em̧ōj kūr er im jitōn̄ er jān Anij n̄an jipan̄ kōj. Jej aikuj in tōmak bwe en̄in ej ḷain eo m̧oktata ej tōpar kōj jinointata n̄an jipan̄ kōj. Jej aikuj kōjerbali.

“Remaron̄ jim̧or kōļapļo̧k ilo ejja wāween eo wōt ainwōt an bisop ro maron̄ jipan̄ kōtōprak aikuj ko an membōr ro. Kwojjab aikuj etal n̄an bisop eo n̄an bōk kajoor in an priesthood eo an”⁵

Ilo ad jipan̄ doon āinwōt rikarejar m̧aan im rikarejar kōrā ro, jemaron̄ ejaake aelōn̄ in kiin̄ eo an Anij ilo eria eo ad.

Wōnm̧aanļo̧k wōt im kōm̧m̧ani kijejeto ko ilo m̧ōko me Kabun̄ in ej rie.

Āinwōt kajjojo armej im baamļe, jej aikuj wōnm̧aanļo̧k wōt im kōm̧m̧an ekkatak ko ilo m̧ōko me rej pedped ioon gospel eo. Ilo ad kōm̧m̧ane ekkatak ko ad ilo m̧ōko, tōmak eo ad ilo Jisōs Kraist im ad naan in kam̧ool enaaj kajoorļo̧k.

Ij kwaļo̧k aō naan in kam̧ool bwe Jemedwōj Ilan̄ ej mour im Nejin eo ejitōnbōro Jisōs Kraist rej iakwe kōj im rejeļā wōn kōj. Rej tōl kōj jān rikanaan eo ad emour rainin, Būreejtōn Russell M. Nelson. Eļap aō kam̧m̧oolol kōn tōl kein an rekabwilōn̄lōn̄ im an mour in rikaļoor. Jen lōke im rejtake būreejtōnji eo an Doulul eo an elder ro im Kōrā ro im jerbal ippāer. Ilo ad kōm̧m̧ane menin, bisop im bisoprik ro ad renaaj lukkuun meļo̧k n̄an aer jipan̄ kōkajoor jodikdik ro ilo kabun̄ in an Jisōs Kraist.

Ilo et eo etan Jisōs Kraist, amen.