Mga Sukaranan sa Ebanghelyo

Pagserbisyo diha sa mga Calling sa Simbahan

Ang mga lider sa Simbahan mohangyo sa mga miyembro sa pagserbisyo sa piho nga mga buluhaton nga gitawag isip mga “calling.” Ang mga calling maghatag sa mga miyembro og mga oportunidad sa pagserbisyo sa uban ug masuod ngadto sa Dios.

Litrato pinaagi David Bowen Newton

Sa dihang kita moserbisyo sa atong mga calling, kita motabang sa pagtuman sa buhat sa Dios. Kita magtudlo sa uban mahitungod sa Langitnong Amahan ug ni Jesukristo ug motabang kanila nga mas masuod ngadto Kanila. Kita makadawat usab og mga panalangin samtang kita matinud-anong moserbisyo.

Pagdawat og mga Calling

Kadtong kinsa nagserbisyo sa Simbahan gitawag sa Dios. Ang mga lider sa Simbahan mag-ampo aron madasig nga masayod kon si kinsa ang moserbisyo sa matag calling. Ang usa ka lider dayon mohangyo sa usa ka miyembro sa pagserbisyo ug mopasabot sa mga katungdanan sa calling. Kadaghanan sa mga calling, ang mga miyembro gipaluyohan diha sa miting sa Simbahan. Ang mga miyembro sa ward o branch motanyag sa pagpaluyo nga boto. Nagpasabot kini nga sila andam sa pagsuporta sa tawo nga gitawag. Ang miyembro mahatagan dayon og usa ka panalangin pinaagi sa usa ka naghupot sa pagkapari. Kini gitawag og pag-set apart. Ang miyembro mahatagan og awtoridad sa paglihok diha sa calling ug sa ubang mga panalangin sa pagtabang kaniya sa pagserbisyo.

Mga Bishop

Ang bishop mao ang lider sa ward. (Sa branch, ang usa ka presidente sa branch sama sa usa ka bishop.) Ang presidente sa stake morekomendar og usa ka takos nga naghupot sa pagkapari nga matawag isip bishop. Ang Unang Kapangulohan moaprobar sa calling. Ang bishop paluyohan dayon ug i-set apart sa pagserbisyo. Siya makadawat usab og mga yawe sa pagkapari nga nagpasabot nga siya adunay awtoridad sa paggiya sa ward. Isip bishop, siya moserbisyo ug mangulo sa tanang mga miyembro sa ward.

Mga Kapangulohan

Ang mga kurom sa Pagkapari ug sa Relief Society, Young Women, Primary, ug sa organisasyon sa Sunday School gigiyahan sa mga kapangulohan, kasagaran usa ka presidente ug duha ka mga magtatambag. Ang mga kapangulohan sa Elders korum tawagon ug i-set apart sa kapangulohan sa stake. Ang bishopric mohangyo sa mga miyembro sa pagserbisyo diha sa uban nga mga kapangulohan sa ward ug mo-set-apart kanila. Ang tanang mga lider moserbisyo sa mga miyembro sa ilang mga korum o mga organisasyon. Sila mangalagad sa mga panginahanglan sa mga miyembro ug motabang kanila nga mobati sa gugma sa Dios.

Uban pang mga Calling

Ang ubang mga calling sa Simbahan naglakip sa pagtudlo, pagtabang sa musika, paghimo og mga rekord, pagplano og mga kalihokan alang sa mga kabatan-onan o sa kabataan, ug pagserbisyo sa ubang mga paagi. Matag calling sa Simbahan importante ug maghatag sa mga miyembro og kahigayonan sa pagserbisyo sa uban ug sa pagserbisyo sa Dios. Samtang kita magtinabangay sa pagtuman sa atong mga calling, kita naglig-on sa uban ug motabang sa Simbahan sa pagtubo.

Gikan sa mga Kasulatan

Ang mga calling sa pagserbisyo sa Simbahan naggikan sa Dios (tan-awa sa Mga Artikulo sa Hugot nga Pagtuo 1:5).

Kita gitawag ug gi-set apart sa dili pa kita moserbisyo sa usa ka calling (tan-awa sa Doktrina ug mga Pakigsaad 42:11).

Samtang kita moserbisyo sa atong mga calling, kita nagtabang sa pagtukod sa Simbahan (tan-awa sa Doktrina ug mga Pakigsaad 84:109–10).

Pagkat-on Unsaon sa Pagbuhat ang Inyong Calling

Ang pagbaton og calling usa ka dakong oportunidad sa pagserbisyo sa uban. Ang matag calling adunay kaugalingong gitakda nga mga katungdanan, busa importante ang pagkat-on niini samtang kamo magsugod sa pagserbisyo. Ania ang pipila ka mga kapanguhaan aron makatabang kaninyo:

• Makig-istorya sa lider kinsa mihatag kaninyo sa calling. Pangutana kon unsa nga pagbansay ang inyong madawat.

• Pangitaa ang imong calling diha sa Kinatibuk-ang Tamdanan nga Basahon, sa Simbahan nga anaa sa ChurchofJesusChrist.org. Kini adunay mga kapitulo sa Relief Society, korum sa mga elder, Primary, ug uban pa.

• Usab sa ChurchofJesusChrist.org, i-klik ang “Callings” ubos sa Serve sa ulohang menu. Mohatag kini og impormasyon kalabot sa imong calling.

• Pag-ampo alang sa inspirasyon ug pagtuon sa mga kasulatan ug sa mga pakigpulong sa kinatibuk-ang komperensiya inubanan sa paghunahuna sa inyong mga calling. Ang Langitnong Amahan mopanalangin kaninyo sa pagserbisyo og maayo sa Iyang mga anak.