Alang sa mga Ginikanan

Pagdangop ngadto sa Dios ug ngadto sa Atong Mga Pamilya

Litrato gikan sa Getty Images

Minahal nga mga Ginikanan,

Makadawat kita sa tabang sa Dios aron makalahutay sa mga pagsulay ug malisod nga mga panahon sa atong mga kinabuhi. Kini nga isyu makatabang kaninyo sa pagtudlo sa inyong mga anak kon sa unsang paagi ang Ginoo makaluwas kanato sama sa Iyang gibuhat ngadto niadtong kinsa nagpuyo sa mga panahon sa Daang Tugon. Magamit usab ninyo ang mga ideya sa ubos aron sa pagtabang kaninyo sa pagsugod og mga panaghisotan mahitungod sa mga paagi sa paghusay og mga panagbangi sa atong mga pamilya.

Mga Panaghisgotan sa Ebanghelyo

Kalisdanan ug mga Kasakit

Basaha ang artikulo ni Elder Christofferson sa pahina 6 mahitungod sa kalisdanan. Sa unsang mga paagi, uban sa tabang sa Langitnong Amahan, nga kita makatugot sa kalisdanan nga molunsay kanato kay sa mobuntog kanato? Sa unsang paagi kita makapangalagad niadtong nakasinati mismo og personal nga mga kalisdanan?

Paglahutay latas sa mga Pagsulay

Basaha ang artikulo ni Elder Johnson sa pahina 44 mahitungod ni Jose sa Ehipto. Dapita ang inyong mga anak sa pag-drama-drama sa istorya gamit ang mga igsusul-ob [costumes] ug mga butang nga gunitan [props]. Dayon hisgoti, sama sa gipasabot ni Elder Johnson, kon sa unsang paagi ang Dios nag-uban kang Jose latas sa maayong mga panahon ug sa dili. Sa unsang paagi ninyo nakita ang impluwensiya sa Dios sa inyong kinabuhi atol sa inyong mga pagsulay?

Paghusay sa mga Panagbangi

Basaha ang artikulo mahitungod sa paghusay og panagbangi sa pahina 26. Sa unsang paagi nga ang mga istorya gikan sa mga kasulatan makatudlo kanato mahitungod unsaon sa paghusay og mga panagbangi sa atong mga pamilya? Unsa ang atong mabuhat isip mga indibidwal aron mahimong mas maayo nga mga tigpasiugda og kalinaw?

Suporta sa Dali, Sunod Kanako

Aron sa pagsuporta sa inyong sinemana nga pagtuon sa pamilya sa Dali, Sunod Kanako niini nga bulan, tan-awa ang pahina 48 alang sa lista sa mga pagkasusama tali ni Jose sa Ehipto ug ni Jesukristo.

Kalingawan sa Pamilya sa Dali, Sunod Kanako

Mga Kolor sa Emosyon

Exodo 3:7

Ang Ginoo mipasabot kang Moises nga nakita Niya ang mga kalisdanan sa mga anak sa Israel, nakadungog sa ilang mga pag-ampo, ug nasayod sa ilang mga kasub-anan (tan-awa sa Exodo 3:7).

1. Sangoni ang matag tawo og emosyon base sa naglabaw nga kolor sa ilang gisul-ob:

   • Dalag = malipayon

   • Asul = magul-anon

   • Pula = nasuko

   • Lunhaw = kalma

   • Kahil = nahadlok

   • Uban pa = naglibog o nasurprisa

2. Ang matag tawo magpaambit og piho nga kasinatian sa dihang nabati nila kana nga emosyon.

3. Makasulti ba kita kon unsa ang gibati sa mga tawo pinaagi lamang sa ilang panagway o sa unsay ilang gisul-ob?

4. Kinsa ang nakakita sa tanan natong emosyon, lakip sa atong mga kasakit ug mga kagul-anan, bisan kon ang uban mahimong dili makakita?

5. Pangita og mga kasulatan nga nagpakita kon sa unsang paagi si Jesukristo nakaila ug nakasabot kanato.

Panaghisgotan: Unsa ang pipila ka pagsulay nga atong naagian? Sa unsang paagi kita makahibalo nga ang Ginoo nakakita kanato latas niadto nga mga panahon?

Gisumiter ni Mitzi Schoneman

Naghulat alang sa mga Panalangin

Genesis 6–11; Moises 8

Ang Genesis ug Exodus naglangkob og daghang saad gikan sa Ginoo, uban sa mga istorya sa mga tawo nga mapailobong naghulat niadto nga mga saad. Si Jacob naghulat nga makakita sa panalangin nga mahimong dako nga nasod. Si Jose naghulat sa Ginoo nga motabang kaniya nga mapagawas sa bilanggoan. Ang mga anak sa Israel naghulat nga mahimong gawasnon gikan sa pagmando sa Ehipto.

1. Pagpili og usa ka tawo nga mahimong lider ug pabaroga ang uban sa pikas nga habig sa lawak.

2. Kon ipataas sa lider ang kamot, ang tanan molakang paingon ngadto kaniya. Kon ipaubos sa lider ang kamot, ang tanan mohunong. Kon masakpan ang usa ka tawo nga naglakang sa dihang gipaubos ang kamot sa lider, kana nga tawo kinahanglang mobalik sa sinugdanan.

3. Ang unang tawo nga makaabot sa lider mao ang mahimong lider alang sa sunod nga dula.

Panaghisgotan: Basaha og dungan ang Mormon 8:22. Samtang basahon ninyo ang Genesis ug ang mosunod nga mga libro sa Daang Tugon karong tuiga, hatagi og espesyal nga pagtagad ang tanang saad sa Ginoo ug kanus-a kini matuman. Nganong importante nga makaila sa mga saad sa Ginoo sa atong kaugalingong mga kinabuhi ug mosalig sa Ginoo samtang maghulat kita niadto nga mga saad?

Gisumiter ni Brenda Slade

Gikan sa Alang sa Kalig-on sa mga Kabatan-onan nga Magasin

Pagdawat sa Tabang sa Dios

Si Presidente Eyring migamit sa mga ehemplo ni Jose ug Moises aron sa pagpakita kon sa unsang paagi ang Manluluwas makahupay kanato, bisan unsa pa ang atong mga pagsulay.

Pag-atubang sa mga Pagsulay

Ang ehemplo ni Jose sa Ehipto nagpakita kanato kon sa unsang paagi kita makapili nga magbaton og hugot nga pagtuo sa Dios bisan unsa pa nga matang sa pagsulay ang atong giatubang.

Pagsulbad og Panagbingkil

Kini nga artikulo naghatag og tulo ka sugyot alang sa pagwala og panagbingkil nga mahimong motumaw sa atong mga pamilya.

Gikan sa Higala nga Magasin

Tabang sa Pagtuon sa Panimalay

Pangita og mga ideya alang sa home evening, usa ka gihulagway nga istorya sa kasulatan, ug dugang nga mga tabang sa pagtuon aron sa pagtudlo sa inyong mga anak og mga baroganan nga may kalabotan ngadto sa Dali, Sunod Kanako.

Mangandam alang sa Komperensiya

Pangita og mga kalihokan nga mabuhat sa inyong mga anak samtang magtan-aw sila sa kinatibuk-ang komperensiya sunod bulan.

Maayo nga Ipaambit

Gamita ang istorya nga gihulagway ug ang kalihokan sa pahina 44 aron sa pagtabang sa inyong gagmay nga mga anak nga makakat-on nga mopaambit sa uban.

Mga Kard sa Daang Tugon

Pagkolekta og duha ka bag-o nga mga kard nga nagpakita og mga bayani sa kasulatan gikan sa Daang Tugon.

Gugma sa Panimalay

Gamita ang pahina karong bulana sa “Unsay anaa sa Inyong Hunahuna?” diha sa seksiyon sa Alang sa Mas Magulang nga mga Bata aron sa pagtabang sa inyong mga anak nga makat-on sa paghusay og panagbangi ug mas magkasinabtanay.