Ang Dios Makatabang Kanato sa Malisod nga mga Panahon

Ug magamit nato ang unsay atong makuha gikan sa atong mga pagsulay aron sa pagtabang sa uban.

babaye nga naglingkod ug nagtan-aw sa pagsalop sa adlaw sa lawod

Si Marcela Endrek, usa ka lumad sa Córdoba, Argentina, nasakit ug naguol. Kini nakapawala kaniya og kadasig. Taliwala sa pagbati nga wala nay paglaom, nakadungog siya og pakigpulong sa komperensiya nga namulong bahin sa pag-ampo. Direktang miabot ang hunahuna ngadto sa iyang kasingkasing nga matinguhaon nga mag-ampo mahitungod sa iyang mga kahasol.

Misugod siya nga makanunayong nag-ampo alang sa alibyo. Ang pag-ampo naghatag kaniya og kalinaw ug kahupayan bisan og wala miarang-arang ang iyang panglawas. Sa pagkatinuod, migrabe ang iyang kondisyon hangtod nga dili na siya makatrabaho. Karon aduna na siyay dugang nga kaugtas nga dili makabayad sa medikal nga mga galastohan.

Tungod kay gikinahanglan, misugod siya sa pagsusi kon unsaon niya nga makasugakod sa laing paagi sa iyang mga problema sa panglawas. Naaghat siya nga tutokan ang pag-usab sa pipila ka naandan sa kinan-an ug nasorpresa kon unsa ka dako ang natabang niini. Ang iyang pagkaayo talagsaon kaayo nga misugod siya sa komprehensibong pagtuon sa nutrisyon.

Sa wala madugay, nahimamat niya ang usa ka batan-ong babaye nga ginganlan og Evelyn nga anaa sa parehong kondisyon sama sa kondisyon ni Marcela kaniadto—nasakit, naguol, ug desperado alang sa mga tubag. Nakita ni Marcela ang iyang kaugalingon diha sa iyang bag-o nga higala. Gipaambit niya ang pipila sa unsay iyang nakat-onan mahitungod sa mga pagpili sa pagkaon ug nutrisyon. Gipaambit usab niya kang Evelyn ang iyang saksi sa gahom sa pag-ampo. Gidapit niya si Evelyn nga mag-ampo aron mabati usab niya ang gugma sa Dios ug masayod nga Siya nagpakabana kaniya.

Pipila ka adlaw ang milabay, mahinamon si Marcela nga makakita pag-usab kang Evelyn. Tataw na ang usa ka kausaban sa pisikal ug espirituwal. Gipahibalo siya ni Evelyn nga nausab ang iyang kinabuhi ug nga nabati niya ang gugma sa Dios alang kaniya.

Gikan sa iyang mga pagsulay ug mga hagit, si Marcela nakabaton og kapuangod ug impormasyon nga iyang gikinahanglan aron makatabang sa uban.

Naluwas Aron Kita Makaluwas

Si Jose nga nag-apod-apod og lugas atol sa tinggutom sa Ehipto

Ang istorya ni Jose sa Ehipto usa ka laing ehemplo sa unsay mahimong mahitabo kon determinado kita nga mosalig sa Dios atol sa atong mga pagsulay: dili lang nga Siya makaluwas kanato, apan Siya makapahiluna kanato aron sa paggamit sa atong kasinatian aron sa pagtabang sa uban (tan-awa sa Genesis 37–45).

Determinado si Jose nga mosalig sa Dios ug motuman sa Iyang mga sugo bisan pa man sa pagluib, pagkanawad-an, ug pagkabilanggo. Tungod sa hugot nga pagtuo ni Jose ug sa iyang kaandam sa paglahutay sa iyang mga pagsulay nga inubanan sa pailob ug walay kaligutgot, “nag-uban kang Jose ang Ginoo” (Genesis 39:21) ug mibutang kaniya sa usa ka posisyon aron makapanalangin og daghan (tan-awa sa Genesis 45:5–8).

Mga Baroganan nga Hunahunaon

Samtang hunahunaon ninyo ang inyong mga kahigayonan nga mangalagad ngadto sa uban, hunahunaa kini nga mga baroganan nga gihulagway sa mga istorya:

Ang atong mga hagit mahimong mga panalangin. Kon kita “[m]ag-ampo sa kanunay, ug [m]agmatuohon” samtang masinati nato ang atong mga pagsulay, ang Langitnong Amahan mohimo niini alang sa atong kaayohan (tan-awa sa Doktrina ug mga Pakigsaad 90:24; tan-awa usab sa Mga Taga-Roma 8:28).
Ang atong mga hagit makaandam kanato. Kon mahimo kitang maaghop sa atong mga pagsulay, ang Dios mahimong mogamit sa atong mga kasinatian aron sa pagtudlo kanato ug pag-usab kanato (tan-awa sa Doktrina ug mga Pakigsaad 112:13).
Ang atong mga hagit mamahimong mga oportunidad sa pagpangalagad. Kon kita andam nga mosalig Kaniya, ang Langitnong Amahan mobutang kanato sa mga posisyon sa paggamit sa unsay atong nakat-onan sa atong kaugalingon nga mga kasinatian aron sa pagtabang sa uban (tan-awa sa Mosiah 24:13–14).

Unsa ang Atong Mabuhat?

Pag-ampo aron mahibalo kon sa unsang paagi ang inyong mga kasinatian makatabang kaninyo sa pagpanalangin niadtong inyong pangalagaran. Dayon tabang.