“Among mga Espiritu Nahiusa sa Awit,” Liahona, Mar. 2022.
Mga Tingog sa mga Santos sa Ulahing mga Adlaw: Kababayen-an nga may Hugot nga Pagtuo
Among mga Espiritu Nahiusa sa Awit
Ang babag sa pinulongan daling nawala tungod nasayod kami Kinsa ug unsa mahitungod ang among gikanta.
Samtang ang akong higala ug ako misakay sa dako nga eroplano sa Seoul, South Korea, gitimbaya namo ang tigulang nga Korean nga babaye nga naglingkod sa lingkoranan sa may agianan. Akong higala ug ako misuot dayon labay kaniya ngadto sa among kaugalingon nga mga lingkoranan, ang akong higala sa tunga-tunga nga lingkoranan ug ako sa may bentana.
Pipila ka minuto pa lang kaming milupad sa dihang nakadungog ko sa malumo nga mga tono sa usa ka himno. Nailhan nako kini isip “Gamhanan Ka,”1 nga pamilyar sa daghang Kristiyano nga mga tinuohan ug nga bag-ohay lang nakong nasag-ulo.
Mainampingon akong mitan-aw sa palibot aron mahibaloan diin naggikan ang tingog. Samtang akong gibuhat, akong nabantayan nga ang Korean nga babaye diha sa among laray naggunit og gamay nga libro sa mga himno—nga giimprinta sa Korean nga mga karakter—gikan sa iyang Protestante nga simbahan.
Dali akong nakig-ilis og lingkoranan sa akong higala ug malumong miapil sa pagkanta sa babaye, nga gikalipay namong duha. Dili siya makasulti og Iningles, ug ako dili usab makasulti o makabasa og Korean. Apan makabasa ako og musika.
Mao nga, samtang gipakli niya ang mga pahina sa iyang libro sa mga himno, akong tan-awon ang unang linya sa mga nota ug motando kon nakahibalo ako sa himno. Dayon mohagonghong ako og tono, ug magsugod kami sa pagpanganta, siya sa Korean ug ako sa Iningles. Kantahon niya ang tono, ug kantahon nako ang duyog.
Sa wala madugay miapil kanamo ang mga pasahero diha sa mga laray sa atubangan, luyo, ug kilid kanamo. Sa dakong bahin sa usa ka oras, ang among dihadiha nga koro mikanta og pipila ka komon nga Kristiyano nga mga himno gamit ang among lumad nga mga pinulongan. Ang babag sa pinulongan daling nawala pinaagi sa musika ug sa katinuod nga kami nasayod Kinsa ug unsa mahitungod ang among gikanta. Among mga espiritu nahiusa sa awit.
Sa wala pa midalit og panihapon ang mga flight attendant, ang among kataposan nga himno mao ang “Mahil[o]m nga Gabii”2—ug tunga-tunga pa lang kadto sa Oktubre.
Sukad niadto nga kasinatian, nakahunahuna ako kon unsa ka talagsaon kadto, apan maanindot, nga usa ka grupo sa mga estranghero mohiusa sa ilang mga tingog sa pagkanta og mga himno sakay sa usa ka dako nga eroplano nga naglupad ibabaw sa Pasipiko.
Kahilakon gihapon ko sa matag higayon nga ako mokanta sa “Gamhanan Ka” ug “Mahil[o]m nga Gabii.” Dili ako makakanta niadto nga mga himno nga dili makahunahuna niana nga Korean nga babaye ug sa gasa sa musika nga mitugot kanamo sa pagpaambit sa among komon nga hugot nga pagtuo sa atong Manluluwas, si Jesukristo.