“Mobiya Ba Ako?,” Liahona, Mar. 2022.
Mga Tingog sa mga Santos sa Ulahing mga Adlaw: Kababayen-an nga may Hugot nga Pagtuo
Mobiya Ba Ako?
Human nga nasilo ako atol sa usa ka kalihokan sa Relief Society, ako adunay desisyon nga kinahanglan nga himoon.
Giposingan sa modelo
Wala madugay human ako mipasakop sa Simbahan, nagtiaw-tiaw ang usa ka lider sa Relief Society mahitungod sa kataw-anan nga mga sitwasyon. Kalit lang misugod siya sa pagtiaw-tiaw mahitungod kanako sa atubangan sa tanan. Mibati ako nga dili komportable ug gitugotan ang akong kaugalingon nga masilo.
Ang akong unang hunahuna mao ang dili mobalik sa ward. Giablihan nako ang akong mga kasulatan, naningkamot nga makakaplag og kahupayan. Samtang nagbasa ko, naagian nako ang usa ka bersikulo diin nangutana si Jesus niadtong mga nasilo sa Iyang mga pagtulun-an, “Mobiya ba usab kamo?” (Juan 6:67).
Dihadiha dayon, mitubag ko sa akong hunahuna, “Dili, dili ako mobiya!”
Gitawagan nako ang presidente sa Relief Society, kinsa mirekomendar nga akong tawagan ang sister nga nagtiaw-tiaw mahitungod kanako. Gitawagan nako siya ug gipahayag ang akong mga pagbati. Kami mihukom nga nindot ang pasiaw apan kinahanglan dili kita magtiaw-tiaw mahitungod sa usa ka tawo nga wala nato mailhi diha sa atubangan sa usa ka grupo sa mga tawo. Naghisgot usab kami mahitungod sa pagkahimong sensitibo sa bag-ong mga miyembro sa ward.
Mipadayon ako sa pagtambong niana nga ward samtang nagpuyo ako niana nga siyudad. Nakabaton ako og daghang nindot nga mga kasinatian pagkahuman sa akong pagkakabig ngadto sa ebanghelyo.
Sa akong personal nga panaw sa pagbuntog sa mga kasilo, nakaplagan nako kining makatabang nga mga pulong gikan sa atong mga lider sa Simbahan:
“Kon ang usa ka tawo para nato mosulti o mobuhat og makapasilo nga butang, ang atong unang obligasyon mao ang pagbalibad nga masilo ug dayon isulti kini sa pribado, matinuoron, ug direkta sa mao nga tawo.”1
“Mosaad ako kaninyo, samtang kamo mopili nga dili masilo … , inyong mabati ang gugma ug pagtugot [sa Manluluwas].”2
Mapasalamaton ako nga mipili ako nga dili mobiya sa Simbahan tungod sa usa ka dili sensitibo nga komento. Ug mapasalamaton ako nga mahimong usa ka miyembro sa gipahiuli nga Simbahan, diin ako nakadawat og kusog nga mahimong matinud-anon ug magpadayon diha sa dalan sa pagkadisipulo. Nagpasalamat ako sa tambag sa mga propeta ug apostoles, nga nagtudlo kanato kon unsaon sa pagpakigdait sa atong mga kaigsoonan sa ebanghelyo.
Makapadayon ako nga mahimong matinud-anon ug mopili nga dili masilo. Makatutok ako sa akong kaugalingon nga mga paningkamot nga mahimong Kristohanon ug mobati sa gugma ug pag-uyon sa Manluluwas.
Mobiya ba ako? Dili. Ako adunay pagpamatuod nga kini mao ang gipahiuli nga Simbahan ni Jesukristo sa yuta karon ug nga aduna kini sa “mga pulong nga naghatag ug kinabuhing walay kataposan” (Juan 6:68).