Ang Presidente sa Relief Society nga si Toshiko Yanagida

litrato ni Toshiko Yanagida — Si Sister Yanagida, gipakita dinhi sa edad nga 18, mao ang unang presidente sa Relief Society sa Japan.

Ang Nagoya nga mga Santos mipahigayon sa ilang unang miting sa Sunday School niadtong Enero 1950. Aron sa pagdani og dugang nga mga tawo, si Toshiko ug ang mga misyonaryo mibutang og mga pahinumdom diha sa usa ka lokal nga pamantalaan. Pagkasunod Dominggo, 150 ka tawo ang mipakita diha sa hawanan sa pagpanudlo. Ang mga miting sa Santos sa Ulahing mga Adlaw kasagaran nakadani og mga pundok sa Japan human sa gubat tungod kay daghang tawo ang nangita og paglaom og katuyoan human sa kasakit nga ilang nasinati.¹ Apan alang sa kadaghanan, temporaryo ra ang interes alang sa Simbahan, ilabi na dihang ang nasod mas nahimong lig-on sa ekonomikanhong paagi. Samtang nagkagamay ang mga tawo nga mibati og panginahanglan nga mosalig sa hugot nga pagtuo, mikunhod ang pagtambong sa mga miting.²

Sa ilang bahin, si Toshiko ug ang iyang bana, si Tokichi, nanglimbasog sa mga aspeto sa pagkahimong Santos sa Ulahing mga Adlaw—ilabi na sa pagbayad og ikapulo. Dili kaayo dako og kita si Tokichi, ug usahay naghunahuna sila kon sila adunay igo aron makabayad sa paniudto sa eskwelahan sa ilang anak nga lalaki. Naglaom usab sila nga makapalit og balay.

gambalay sa Japan nga adunay karatula sa Simbahan sa atubangan niini

Human sa usa ka miting sa Simbahan, gipangutana ni Toshiko ang usa ka misyonaryo mahitungod sa ikapulo. “Kabos kaayo ang mga Hapon karon human sa gubat,” miingon siya. “Lisod kaayo ang ikapulo alang kanamo. Kinahanglan ba namong mobayad?”³

Mitubag ang elder nga ang Dios misugo sa tanan sa pagbayad og ikapulo, ug namulong siya bahin sa mga panalangin sa pagtuman sa baroganan. Maduhaduhaon si Toshiko—ug nasuko og gamay. “Inamerikano kini nga panghunahuna,” gisultihan niya ang iyang kaugalingon.

Ang ubang mga misyonaryo miawhag kaniya nga magbaton og hugot nga pagtuo. Usa ka sister nga misyonaryo misaad kang Toshiko nga ang pagbayad og ikapulo makatabang sa ilang pamilya nga makakab-ot sa ilang tumong nga makapanag-iya og ilang kaugalingon nga panimalay. Gusto nga mahimong masulundon, si Toshiko ug Tokichi mihukom sa pagbayad sa ilang ikapulo ug mosalig nga moabot ang mga panalangin.⁴

Sa ingon niini nga panahon, ang mga sister nga misyonaryo misugod sa pagpahigayon og dili pormal nga mga miting sa Relief Society diha sa ilang apartment alang kang Toshiko ug sa ubang kababayen-an diha sa dapit. Mipaambit sila og mga mensahe sa ebanghelyo, mihisgot og praktikal nga mga pamaagi sa pag-atiman sa ilang mga panimalay, ug nagkat-on sa pagluto og barato nga mga pagkaon. Sama sa mga Relief Society sa ubang mga bahin sa kalibotan, mipahigayon sila og mga tabo, diin namaligya sila og tsokolate ug ubang mga butang aron makatigom og kwarta alang sa ilang mga kalihokan. Mga usa ka tuig human ang Nagoya nga mga Santos misugod sa pagpahigayon og mga miting, usa ka Relief Society ang pormal nga giorganisar, uban ni Toshiko isip presidente.⁵

Siya ug si Tokichi misugod usab sa pagkakita og mga panalangin nga miabot gumikan sa pagbayad og ikapulo. Mipalit sila og barato nga lote diha sa siyudad ug naghimo og mga blueprint alang sa usa ka balay. Mi-apply dayon sila og loan alang sa panimalay pinaagi sa usa ka bag-o nga programa sa gobyerno, ug sa dihang nakadawat sila og pagtugot nga magtukod, misugod sila sa pagtrabaho sa pundasyon.

Hanoy ra ang proseso hangtod nga nakabantay ang usa ka inspektor sa gambalay [building] nga ang ilang lote dili maabtan sa mga bombero. “Kini nga yuta dili angay nga tukoran og balay,” siya misulti kanila. “Dili kamo mahimong mopadayon pa sa pagtukod.”

Dili segurado kon unsay buhaton, nakig-istorya si Toshiko ug Tokichi sa mga misyonaryo. “Magpuasa ug mag-ampo kaming unom alang kaninyo,” miingon ang usa ka elder kanila. “Buhata usab kini ninyo.”

Sa misunod nga duha ka adlaw, ang mga Yanagida nagpuasa ug nag-ampo uban sa mga misyonaryo. Laing inspektor ang miabot dayon aron sa pagsuta pag-usab sa ilang lote. Aduna siyay reputasyon sa pagkaestrikto, ug sa sinugdanan gihatagan niya ang mga Yanagida og gamayng paglaom nga makapasar sa inspeksiyon. Apan samtang gitan-aw niya ang lote, nakamatikod siya og solusyon. Sa usa ka emerhensiya, ang mga bombero yanong makaabot sa luna pinaagi sa pagtangtang sa usa ka duol nga koral. Ang mga Yanagida mahimong makatukod sa ilang balay sa kataposan.

usa ka inspektor sa gambalay [building] uban ni Brother ug Sister Yanagida

“Tingali kamong duha adunay maayo kaayo nga gibuhat kaniadto,” ang inspektor miingon kanila. “Sa akong daghang katuigan wala gayod ako nahimong ingon ka matinabangon.”

Hilabihang nalipay si Toshiko ug Tokichi. Nagpuasa sila ug nag-ampo ug mibayad sa ilang ikapulo. Ug sama sa gisaad sa sister nga misyonaryo, sila makabaton sa ilang kaugalingon nga panimalay.⁶