“Ibutang Inyong Tibuok Kaugalingon,” Liahona, Mar. 2022.
Nagkatigulang nga Matinud-anon
Ibutang Inyong Tibuok Kaugalingon
Bisan kon kini nagpasabot nga kinahanglan ninyong “iyugyog inyong kaugalingon,” ang senior nga misyonaryo nga pagserbisyo magdala kaninyo og hingpit nga kalipay.
Litrato sa maayong kabubut-on sa tagsulat
Pipila ka bulan human ang akong bana ug ako mipauli gikan sa pagserbisyo og humanitarian nga misyon, misugod ako sa paghandom. Ngano mang mahinungdanon gihapon kaayo ang among misyon?
Kon hangyoon kami nga mamulong kabahin sa among mga kasinatian, sama kini sa usa ka busay sa kamaayo nga mobanlas kanako ug ang sulog modala kanako balik ngadto sa panahon ug sa mga kasinatian nga among gipakigbahin uban sa talagsaon nga mga tawo sa Laos.
Nakahinumdom ako sa usa ka kataw-anan nga awit nga sagad namong kantahon uban kanila. Gitawag kini og “The Hokey Pokey,” ug ang kataposan nga bersikulo naglakip sa pulongan, “Ibutang inyong tibuok kaugalingon, ug iyugyog inyong kaugalingon.” Sa dihang kantahon namo ang awit, ang mga tawo masadyaong moapil. Sila moyugyog ug mosayaw, ug dayon mamakpak sila sa ilang mga kamot sa kalipay.
Nagtuo ko nga kana nga awit naghulagway sa among mga pagbati mahitungod sa among misyon—gibutang namo ang among tibuok kaugalingon ngadto sa buhat sa Ginoo. Sa wala madugay nahibaloan namo kon unsa kami ka bulahan nga nakaapil sa Laotian nga kultura. Isip humanitarian nga mga misyonaryo, nakatabang kami kanila pinaagi sa pagtudlo og Iningles. Nagtabi, nanayaw, ug nagtuyok-tuyok kami sa among mga klase. Apan ang among nadawat isip bugti magantihon kaayo. Among nahibaloan nga kon unsa ka dako ang among paghigugma kanila, sila samang mihigugma usab kanamo.
Ang among misyon nahimong espesyal nga panahon sa among kinabuhi nga among matawag nga amoa gayod. Kini mihimong bililhon sa among kinabuhi human sa pagretiro. Migahin kami og tibuok kinabuhi nga nagpadako sa among mga anak, nanginabuhi, mipalit og panimalay, ug nagbuhat niadtong tanang butang nga ingon og importante kaayo niadtong mga higayona. Dayon miabot ang pagretiro ug ang pangutana, “Unsa may buhaton nato karon?”
Ang akong mensahe mao nga kon gusto kamo nga makakaplag og malungtaron nga kalipay, lakaw ug tabangi ang usa ka tawo nga imong matagboan sa agianan. Mao kana ang gigikanan sa tinuod nga kalipay—serbisyo. Ug ang katingalahan nga sorpresa mao nga samtang kamo naghatag, buhong usab kamo nga makakuha. Among nakaplagan nga daghan sa Laotian nga katawhan wala kaayoy materyal nga kabtangan. Apan adunahan sila sa hingpit nga kalipay sa pagpakabuhi, usa ka hingpit nga kalipay nga gawasnon nilang gipaambit kanamo. Gipalambo nila ang among abilidad nga magmaya.
Paghulagway pinaagi ni Carolyn Vibbert
Mao nga, ayaw kahadlok nga “ibutang inyong tibuok kaugalingon,” bisan kon kini nagpasabot nga kinahanglan ninyong “iyugyog inyong kaugalingon.” Kanta ug sayaw uban ang laing kultura ug kamo usab makakaplag nga ang usa ka busay sa kamaayo mobanlas kaninyo. Mao kana ang usa sa mga sekreto sa humanitarian nga misyonaryo nga paningkamot—pareho kamong mohatag ug makadawat. Kada adlaw akong nagpasalamat sa akong Langitnong Amahan nga napanalanginan kami nga mahimong kabahin nianang talagsaon nga kahigayonan, nga magsabwag sa espiritu sa ebanghelyo ngadto sa atong kaigsoonan didto sa Laos.
Ang tagsulat nagpuyo sa Utah, USA.