“Ang Ginoo Nag-uban ni Jose,” Liahona, Mar. 2022.
Dali, Sunod Kanako
Ang Ginoo Nag-uban ni Jose
Samtang kita nagsinati sa mga maayo ug dili maayo sa kinabuhi, makakat-on kita og daghan gikan sa ehemplo sa karaan nga propeta nga si Jose.
Si Jose Nagpasabot sa mga Damgo sa Paraon, ni Jean Adrien Guignet, Musée des Beaux-Arts, Rouen, France / Bridgeman Images
Pipila ka tuig ang milabay, ang among pamilya nalipay kaayo sa dihang among nahibaloan nga ang akong asawa, si Terri, nagsabak sa among ikaupat nga anak. Apan, pipila ka bulan sa iyang pagmabdos, among nahibaloan nga si Terri adunay usa ka potensiyal sa peligrosong medikal nga kahimtang. Ang labing luwas nga opsiyon alang kaniya mao ang ipa-admit siya ngadto sa ospital, diin mahatagan siya og makanunayon nga pag-atiman. Nagpabilin siya sa ospital sa kondisyon nga maghigda lang aron mapadayon ang iyang pagmabdos kutob sa mahimo.
Nahimo kining makapawala og kadasig ug lisod nga panahon alang sa among pamilya, ilabi na alang ni Terri. Gibati kaayo niya ang pag-inusara. Ug ako nakabaton og hagit sa pag-amuma sa tulo ka bata samtang nanginabuhi ug nagserbisyo isip usa ka bishop. Ang kinabuhi ingon og nagkayamukat ug lisod.
Sa iyang pag-inusara, si Terri nakakaplag og kahupay diha sa mga pulong sa matahom nga himno:
Ikaw kanunayng gikinahanglan.
Unsaon pagbuntog ang dautan?
Kinsay makagiya sama nimo?
Sa dag-[o]m hayag, Dios, ko!1
Ang Ginoo Nag-uban Kanato
Sa kataposan, gikinahanglan ang dinalian pag-opera aron mapagawas ang among anak nga lalaki si Jace. Apan ang inahan ug ang anak nga lalaki luwas nga giatiman tungod kay si Terri anaa naman sa ospital. Mibati kami nga ang Ginoo nanalipod sa among kinabuhi.
Nasayo sa pagkatawo si Jace og upat ka semana ug gibutang diha sa intensive care unit sa bag-ong natawo. Miuli kami nga wala nadala ang among masuso. Atol sa misunod nga bulan, gihimo namo ang inadlaw-adlaw nga pagbiyahe ngadto sa ospital. Ang kinabuhi ingon og miliyok sa kinalisoran nga dapit.
Hinoon, kami nakasaksi na usab sa impluwensiya sa Ginoo. Miuswag si Jace diin mahimo na namo na siya nga madala sa pagpauli, usa ka maayo kaayong panahon sa among kinabuhi samtang nahiusa kami isip pamilya.
Dayon among nahibaloan nga si Jace adunay sagittal synostosis, usa ka kondisyon diin ang bukog sa bagol-bagol [skull] sayo ra nga nagtapot. Ang resulta mao nga ang ulo sa masuso dili motubo. Ang bugtong paagi sa pagtambal mao ang pagtangtang sa dakong bahin sa bagol-bagol ni Jace pinaagi sa pag-opera sa dihang siya nag-edad og tulo pa lang ka bulan. Milahutay kami niining hagit pinaagi sa pag-ampo ug sa mga panalangin sa pagkapari. Usab among nakita ang impluwensiya sa Ginoo diha sa among kinabuhi. Ang mga pag-ampo gitubag. Ang mga panalangin natuman. Ang pag-opera malampuson. Miabot na usab sa maayong panahon ang kinabuhi.
Pagkalisod tagna-on! Apan ang Ginoo nagtudlo kanamo og daghang leksiyon latas niini nga panaw. Kami nasayod nga Siya naga-uban kanamo.
Si Jose Nakabaton ug Maayo ug Lisod nga mga Panahon
Joseph Sold into Egypt [Si Jose Gibaligya ngadto sa Ehipto], ni William Brassey Hole, mga Imahe sa © Look And Learn / Bridgeman
Samtang magtuon kita sa kinabuhi ni Jose sa Daang Tugon, atong masuta nga ang iyang kinabuhi, usab, mao ang usa ka panaw gikan sa maayo ngadto sa dili maayo ug balik ngadto sa maayo nga kinabuhi. Ug kita nakakat-on nga ang Ginoo kanunayng nag-uban kaniya, latas sa maayo ug dili maayo.
Ang kupo nga gihatag ni Jacob kang Jose usa ka maanindot nga simbolo sa gugma ni Jacob alang kang Jose. Apan nagsilbi usab kini isip makapalagot nga pahinumdom ngadto sa mga igsoong lalaki ni Jose sa relasyon tali ni Jose ug sa iyang amahan.
Sa dihang ang mga igsoong lalaki miadto sa pagpakaon sa mga panon sa ilang amahan, si Jacob mihangyo ni Jose sa pag-adto sa pagsusi kanila. Si Jose miadto sumala sa gisugo. Hinoon, makita nga siya nasaag. Busa ang Ginoo mipadala og usa ka tawo aron mohatag ni Jose og direksiyon aron mapalgan ang iyang mga igsoong lalaki (tan-awa sa Genesis 37:15–17).
Sa dihang nagkonsabo ang mga igsoong lalaki ni Jose sa pagpatay kaniya, kini ingon og labaw pa sa sulagma nga ang usa ka panon sa mga biyahero nga milabay padulong sa Ehipto. Imbis patyon si Jose, o biyaan siya aron mamatay sa lungag, ang iyang mga igsoong lalaki mibaligya kaniya ngadto sa panon sa mga biyahero. (Tan-awa sa Genesis 37:25-28.)
Ang giya sa Ginoo makita pag-usab sa dihang ang panon nga mga biyahero mibaligya ni Jose ngadto ni Potifar, usa ka kapitan sa guwardiya sa Paraon. Bisan isip usa ka sulugoon, si Jose mihimo sa matag kasinatian ngadto sa butang nga maayo. Si Potifar mihimo ni Jose nga tigdumala sa iyang panimalay. Siya misalig sa tanan nga anaa kaniya ngadto sa mga kamot ni Jose. (Tan-awa sa Genesis 39:4.) Si Jose adunay panaw gikan sa dili maayo ngadto sa usa ka maayong dapit. Siya karon nagtagamtam sa mga oportunidad ug mga pribiliheyo sa balay ni Potifar.
Hinoon, kini nga maayo nga panahon wala nagdugay. Sa dihang si Jose miikyas sa dili tukma nga mga pagpahimulos sa asawa ni Potifar, siya miakusar ni Jose sa pagka-imoral. Bisan og ang iyang akusasyon dili tinuod, si Jose dali ra unta nga mapatay. Dalaygon kini nga, imbis mamatay, nabilanggo ra siya. Ang impluwensiya sa Ginoo mitagana pag-usab ni Jose.
Dalaygon nga Hugot nga Pagtuo
Kon kamo ang tawo nga sa dili makataronganong paagi gibalhog sa prisohan, unsa ang inyong buhaton? Kon adunay tawo nga gipahamtangan sa pagkawalay kadasig ug kapaitan, kini mao si Jose. Ang kalit nga pag-usab sa gikan sa maayo ngadto sa dili maayo tingali dali ra nga nakapahunahuna kaniya nga, “Unsa may silbi sa pagpaningkamot sa pagserbisyo sa Dios? Ang tanan Niyang gibuhat mao ang pagsilot kanako.” Apan si Jose wala mibati og kapait o mibasol sa Ginoo, ug siya wala moundang. Ang iyang dalaygon nga hugot nga pagtuo wala napakyas.
Ug bisan sa malisod nga mga panahon sa pagkabilanggo, ang Ginoo wala mobiya kang Jose. Una, ang Ginoo mihatag og usa ka oportunidad alang kang Jose sa paghubad sa mga damgo sa tigtagay sa bino ug panadero (tan-awa sa Genesis 40). Dayon, pipila ka tuig ang milabay, sa dihang kana misangpot ngadto sa oportunidad sa paghubad sa damgo sa Paraon, si Jose miila nga ang abilidad sa paghimo sa ingon naggikan sa Dios (tan-awa sa Genesis 41:16). Dili lang gipahiuli ni Paraon si Jose, apan, usab “[gi]himong gobernador [si] Jose sa tibuok Ehipto” (Genesis 41:43). Human si Jose miantos ug nanglimbasog sulod sa katuigan, ang Dios mihimo ni Jose ngadto sa usa ka impluwensiyal nga tawo sa yuta, ikaduha lang sa Paraon—laing maayong panahon sa kinabuhi ni Jose.
Ang Dios Mituyo Niini alang sa Atong Kaayohan
Si Jose sa kataposan nakahimamat sa iyang mga igsoong lalaki pag-usab, kadtong kinsa miplano batok kaniya ug mibaligya kaniya ngadto sa pagkaulipon. Nahimo unta siya nga dili maayo. Gibasol unta niya sila tungod sa “makapungot nga pagkadili makiangayon” nga ilang gipahamtang diha kaniya.2
Apan si Jose nakaamgo nga ang maayo ug dili maayong kasinatian sa iyang kinabuhi gidumala sa Ginoo. Ang iyang pamahayag ngadto sa iyang igsoong mga lalaki nakahatag og panglantaw ngadto niana nga pagsabot:
“Ang daotan ninyong laraw batok kanako gihimo sa Dios nga kaayohan aron maluwas ang kinabuhi sa daghang tawo sama sa nahitabo karon.
“Busa ayaw kamo kahadlok.Atimanon ko kamo ug ang inyong kabataan. Ug siya mihupay kanila, ug namulong sa mabinationg paagi ngadto kanila” (Genesis 50:20–21).
Samtang kita nagsinati sa mga maayo ug dili maayo sa kinabuhi, unsa nga pagkatalagsaon nga pagpahinumdom, nga ang Dios mituyo niini alang sa atong kaayohan. Ang Ginoo mipasabot sa samang baroganan ngadto sa usa ka Jose sa ulahing mga adlaw:
“Kon ikaw gitawag sa pag-antos taliwala sa mga kalisdanan; …
“Kon ikaw gipasanginlan sa tanan nga matang sa bakak nga mga pamasangil; kon ang imong mga kaaway mosulong kanimo; kon sila mopahilayo kanimo gikan sa kapunongan sa imong amahan ug inahan … ug ikaw maguroy ngadto sa bilanggoan, …
“… Ikaw masay[o]d, akong anak, nga kining tanan nga mga butang makahatag kanimo og kasinatian, ug alang sa imong kaayohan” (Doktrina ug mga Pakigsaad 122:5–7).
Dihay Kanunay nga Kalisdanan
Sa dihang si Terri ug ako misagubang latas sa among mga hagit, kami nakakaplag og kahupay diha sa pamahayag gikan sa usa ka propeta sa Dios:
“Ako gusto nga kamo masayod nga kaniadto pa anaa ang mga kalisdanan sa mortal nga kinabuhi, ug sa kanunay maana kini. Apan nasayod sa unsay atong nahibaloan, ug sa pagpakabuhi sumala sa angay natong pakabuhian, wala gayoy dapit, walay rason, alang sa pagkahanap sa panglantaw ug pagkawala sa pagla[o]m. …
“… Nanghinaot ko nga di mo magtuo nga ang tanang kalisdanan sa kalib[o]tan nahitabo ra sa inyong panahon, o ang mga butang dili sama kagrabe kay sa karon, o dili na gy[o]d kini momaayo pa. Akong ipaniguro nga kaniadto mas lis[o]d ang mga butang nga dili maayo ug kini padayon nga magkaanam og kamaayo. Magpadayon kini—ilabi na kon kita magpakabuhi ug mohigugma sa ebanghelyo ni Jesukristo ug hatagan kini og higayon nga mopanalangin sa atong mga kinabuhi.”3
Gikan sa istorya ni Jose ug sa dili maayong mga paghitabo sa kalibotan ug libot kanato, sayon ra nga makita ang dili maayo nga mga butang nga mahitabo ngadto sa maayo nga mga tawo. Ang matarong nga pagpakabuhi wala nagpasabot nga atong likayan ang mga hagit ug kasub-anan sa atong mga kinabuhi. Hinoon, sa ingon ang Ginoo nag-uban kang Jose sa iyang kalisdanan, Siya maga-uban kanato. Ang mga pagsulay dili malikayan nga moabot. Apan kon kita moagi niini uban sa determinasyon sa pagpaminaw Kaniya, ang Ginoo mogiya ug modasig kanato, sama lang sa iyang gibuhat ni Jose.