Digital Lamang: Mga Hulagway sa Hugot nga Pagtuo
Salig Kanako
Dihang gipaambit nako ang akong mga pangutana ug mga kabalaka ngadto sa akong amahan, may gisulti siya nga butang nga dili gyod nako makalimtan.
Litrato pinaagi ni Richard M. Romney
Sa gamay pa ko, mokuyog ko sa akong amahan ngadto sa among gamay nga uma, mohangyo nga motrabaho uban niya, ug naningkamot sa pagtabang niya sa iyang daghan nga proyekto. Ganahan ko nga mosakay sa iyang trak ug motabang niya sa pagkambiyo. Nakahinumdom ko niya nga mobasa og mga estorya ngari namong mga anak ug dad-on mi ngadto sa mga lingaw-lingaw nga sakay-sakay, mga pagpamasol, ug mga nakapahinam nga kamping. Ang pagsakay og mga kabayo uban ni Papa, ilabi na sa kabungtoran, kanunay nga usa ka espesyal nga panumdoman.
Human nga nakasugod ko og high school, nagsugod ko sa paghunahuna bahin sa mga butang nga gitudlo ngari nako mahitungod sa ebanghelyo. Ang mga butang nga gisulti sa akong mga higala mimugna og mga pangutana ug mga pagduhaduha sulod sa akong hunahuna.
Usa ka gabii nagbarog ko sa among sala nga naglantaw sa mga bitoon sa gawas gikan sa among dako nga bintana. Gabii na kaayo to, ug nagtuo ko nga ang tanan nangatulog na. Apan si Papa miabot sa akong kiliran, ug nagsugod mi sa pag-istorya.
Gisultihan nako siya sa akong mga pangutana ug mga kabalaka. Agig tubag, mipamatuod ang akong papa nga nasayod siya nga ang ebanghelyo tinuod. Naghisgot mi bahin sa kabalaka mahitungod “sa mga misteryo” ug unsa ka binoang kana. Miingon si Papa nga kinahahanglan ko nga mohimo sa akong kaugalingong mga paghukom ug nga lagmit magkinahanglan pa ko og panahon niini. Dayon siya misulti kanako og butang nga wala gayod nako kalimti. Miingon siya nga kon ako adunay mga pangutana o mga problema, makasalig ako sa iyang hugot nga pagtuo ug pagpamatuod.
Gihigugma nako ang akong papa ug nasayod nga siya dili gayod mopasaag o mosulti ngari nako og butang nga dili tinuod. Kon mibati siya og kasiguroan mahitungod sa unsay iyang gituohan, nasayod ko nga ako makasalig niya.
Busa, ako misalig.
Atol sa mga katuigan sa akong panarbaho, dihang nabantang ko sa daghang mga ideya, mga teyoriya, mga estilo sa kinabuhi, ug mga pagtuo nga naghagit kanako, gitan-aw nako ang akong papa ug misalig. Atol sa mga katuigan isip usa ka asawa ug inahan, samtang ang akong mga kasinatian misulay sa akong hugot nga pagtuo, gitan-aw nako ang akong papa ug misalig. Bisan gani karon, samtang maghunahuna ko sa kasamtangan nga kahimtang sa kalibotan, gitan-aw nako ang akong papa ug misalig.
Kanunay kong maghunahuna mahitungod niadto nga gabii dugay na ug sa akong pagpakigsulti uban ni Papa. Naghunahuna ko kon unsa kaha kalahi ang kinabuhi kon wala ang iyang kalma nga pagpaniguro ug makanunayon nga ehemplo.
Isip usa ka bata, wala ko magtinguha sa mga kinahanglanon sa kinabuhi. Ang matarong nakong mga ginikanan miatiman kanako. Apan sa tanan nga butang nga gihatag kanako sa akong mga ginikanan, ako labihan ka mapasalamaton sa mga hiyas nga ilang gitudlo kanako, sa lig-ong pundasyon sa ebanghelyo nga ilang gihatag kanako, ug sa yano, puno sa ehemplo nga kinabuhi nga ilang gipasunod.
Mapasalamaton sab ko nga si Papa didto aron ako makasalig—dili lang kausa apan sa kanunay. Siya kaniadto ug karon usa ka talagsaong ehemplo sa mga butang nga labing importante. Si papa ang akong bayani.