“Atong Bisitahon ang Templo,” Liahona, Mar. 2022.
Mga Tingog sa mga Santos sa Ulahing mga Adlaw: Kababayen-an nga may Hugot nga Pagtuo
Atong Bisitahon ang Templo
Sa dihang nag-ampo ako aron masayod kon unsaon nako sa pagtabang ang akong ugangan nga babaye, nakahunahuna ko sa templo.
Litrato sa Bogotá Colombia Temple ni Ivan Ortiz Ponce
Panahon sa COVID-19 nga pandemya, ang Bogotá Colombia Temple giserhan. Tungod kay ako dili na makatambong, dunay higayon nga maghunahuna ko nga misulod sa templo, naghandom sa pagserbisyo nga akong nahimo didto samtang usa pa ka temple worker.
Ang akong ugangan nga babaye nagmasakiton pag-ayo sa wala madugay human sa pagsugod sa COVID-19 nga pag-quarantine didto sa Colombia. Sa dihang nag-ampo ako aron masayod kon unsaon nako sa pagtabang kaniya, nakahunahuna ko sa templo.
Samtang naghunahuna ko mahitungod sa templo, Mibati ko nga naaghat sa Espiritu Santo sa pagpangutana sa akong ugangan nga babaye kon ganahan ba siyang mobisita sa “usa sa kinanindotan nga dapit sa yuta” uban kanako diha lang sa hunahuna.
Sa luyahon nga tingog, mitubag siya, “Oo.”
Naghunahuna kami sugod sa iyang panimalay sa Medellin, nagbiyahe ngadto sa akong panimalay sa Bogotá, ug dayon miabot sa templo. Naghunahuna kami nga misulod ug nagserbisyo sulod sa templo. Naghunahuna kami nga nagtupad sa paglingkod diha sa celestial nga lawak, militok og usa ka pag-ampo sa pagpasalamat sa Ginoo.
Pagkahuman, nangamuyo kami sa Langitnong Amahan nga ang akong ugangan nga babaye, sumala sa Iyang kabubut-on, unta maulian sa iyang kahimsog ug sa kataposan matugotan nga pisikal nga makabalik pag-adto sa templo. Usa kadto ka espesyal, espirituhanon nga kasinatian nga nakapalig-on ug nakapadasig kaniya.
Usa sa mga istorya mahitungod sa Manluluwas nga nakatandog gayod kanako nahitabo didto sa siyudad sa Capernaum. Kini nga istorya nagtudlo kanamo nga ang Ginoo makapanalangin ug moayo sa uban pinaagi sa tabang gikan sa mga sakop sa pamilya ug sa kahigalaan.
Sa dihang ang mga tawo sa Capernaum nakahibalo nga si Jesus anaa sa usa ka piho nga balay, ilang gidala ngadto kaniya ang usa ka tawo nga nasakit og paralisis.
“[Ug] tungod sa kadaghan sa mga tawo, wala sila makaduol kang Jesus. Busa giukab nila ang usa ka bahin sa atop sa tungod gayod ni Jesus ug ilang gitunton ang paralitiko nga naghigda sa iyang higdaanan.”
Nakita ni Jesus nga dako kaayo ang ilang pagtuo kaniya busa miingon siya sa paralitiko, “Anak, gipasaylo na ang imong mga sala.” (Tan-awa sa Marcos 2:1–11.)
Sama sa tawo nga adunay paralisis, ang akong ugangan nga babaye natabangan sa gahom sa Manluluwas pinaagi sa panalangin sa pagkapari ug sa hugot nga pagtuo sa pamilya ug mga higala.
Niining mga panahon sa kawalay kasiguroan, ako nasayod nga kita makadawat og giya sa pagpalig-on ug pag-awhag niadtong nagkinahanglan. Kon kita modangop sa Langitnong Amahan ug sa Iyang Anak, kita makabaton og kalinaw, paglaom, ug pagkaayo.