“Tawagi Ako Daan,” Liahona, Mar. 2022.
Mga Tingog sa mga Santos sa Ulahing mga Adlaw: Kababayen-an nga may Hugot nga Pagtuo
Tawage Ako Daan
Nalipay ko nga wala ako nawad-i sa kahigayonan sa pagtabang sa usa ka sister kinsa nagkinahanglan nako og kinsa akong gikinahanglan.
Sa batan-on pa ako nga inahan uban sa akong unang anak, ang akong bana anaa pa sa kolehiyo. Kaming duha nagtrabaho og part time aron masustiner ang among mga panginahanglan.
Sa pagpaabot sa day off sa trabaho, nagplano ko nga motan-aw og karaan na nga salida sa telebisyon. Wala pa kadto mauso ang mga DVD o mga streaming service.
Ang salida magsugod sa untop nga oras—10:00 sa buntag—sa higayon nga tingkatulog na sa among anak nga lalaki. Gibituonan kini ni Cary Grant, usa sa akong paborito nga Amerikanong artista.
Sa gabii nga wala pa ang gipaabot nako nga day off, ang president sa Relief Society sa ward mitawag. Usa ka sister sa among ward nag-antos og mild nga stroke ug nagkinahanglan og pag-atiman sa sunod nga adlaw hangtod sa pag-abot sa iyang anak nga lalaki nga mobalik gikan sa trabaho.
“Ako ra unta ang mohimo niini, apan aduna koy bisita,” miingon ang presidente sa Relief Society. Siya mipasabot nga wala siyay laing mahangyo ug mitanyag sa pagbantay sa among anak nga lalaki samtang mag-atiman ko sa sister. Nagpanuko ako sa pagsugot.
Pagkasunod buntag, akong gibilin ang akong anak nga lalaki ug mibisita sa sister. Ang iyang ngalan si Louise, ug kalit kong mibati og gugma ngadto kaniya. Maingon-ingon ang iyang katigulangon sa akong apohan nga babaye, kinsa bag-o lang namatay.
Mitabang ko ni Louise nga mag-ilis ug dayon miandam sa iyang pamahaw. Mipahiluna siya sa usa ka lingkoranan ug mibukas sa telebisyon. Wala madugay nag-alas 10:00 na kadto sa buntag. Samtang iyang gibalhin-balhin ang mga channel gamit ang remote, miingon siya, “Kining telebisyon wala may maayong salida karon.”
Ako nagpanuko ug dayon miingon, “Adunay Cary Grant nga salida sa channel 11.”
“Tinuod?” nangutana siya. “Ganahan ko ni Cary Grant!”
Gitan-aw namo ang salida ug nalingaw gyod niini. Pagkahuman niana, mipaambit siya og mga butang kabahin sa iyang kinabuhi sa dihang nag-edad pa siya og sama nako. Misulti siya nako mahitungod sa iyang anak nga lalaki, ug misulti ko kaniya mahitungod sa akong anak. Naghisgot siya mahitungod sa Simbahan ug sa unsang paagi nga gimingaw gayod siya niini.
Sa dihang ang iyang anak nga lalaki mibalik na, misaad ko sa pagbalik. Akong gisultihan ang presidente sa Relief Society nga motawag nako daan kon si Louise magkinahanglan og kauban.
Dihay higayon ato sa mosunod nga duha ka semana, si Louise na-stroke na usab ug namatay sa wala pa ko nakahigayon sa pag-adto niya pag-usab. Nagsawo lang kami og siyam ka oras ug usa ka salida, apan nahimo siya nga minahal nga higala. Naghunahuna ako niya sa kanunay.
Nagpasalamat ako nga wala ako mawad-i sa kahigayonan sa pagtabang sa usa ka sister kinsa nagkinahanglan nako—ug kinsa akong gikinahanglan, bisan og ako wala makaamgo niini.