Digital Lamang: Mga Young Adult
Gina-adjust ba Ninyo ang Ebanghelyo aron Mohaom sa Inyong Kinabuhi?
Usa ka talagsa nga desinyo sa gambalay nakatabang nako sa pagsabot unsa kaimportante ang pag-adjust sa atong kinabuhi aron mohaom sa ebanghelyo—ug dili ang ebanghelyo maoy i-adjust.
Bag-o lang kong nakakita og litrato sa talagsaon kaayo nga gambalay. Sa atobang sa gambalay, dunay dako nga kahoy nga tataw kaayong nagtubo nga mas taas pa kay sa anaa nga gambalay. Sa bahin sa gambalay, dunay duha ka lebel sa mga balkonahe nga gibutangan og mga lungag aron ang mga sanga sa kahoy molapos niini. Ang kahoy padayon nga mitubo sa tupad sa gambalay, nga ang iyang punoan nagtubo nga eksakto gayod nga milapos sa lungag sa atop.
Samtang nagtan-aw ko niini nga litrato, nakahunahuna ko pag-ayo mahitungod sa gipahiuli nga ebanghelyo sa atong Ginoo nga si Jesukristo.
Nakapahunahuna kini kanako: Kita gusto bang mo-adjust sa atong kinabuhi aron mohaom sa ebanghelyo, o gipaningkamotan ba nato nga i-adjust ang ebanghelyo aron mohaom sa atong kinabuhi?
Sa Abril 2021 nga kinatibuk-ang komperensiya, si Elder Chi Hong (Sam) Wong sa Seventy miingon: “Ang ebanghelyo dili kabahin sa atong kinabuhi, apan ang atong kinabuhi sa tinuod kabahin sa ebanghelyo ni Jesukristo. Hunahunaa kini. Dili ba kana tinuod?”1
Motubag ko og oo, tinuod kini.
Ug ang pagsabot niining importante nga leksiyon makatabang nato nga malikay nga masakitan ang atong kasingkasing sa tibuok natong kinabuhi ug makakat-on aron makabig sa hingpit ug mapahinunguron ngadto sa Ginoo ug sa Iyang ebanghelyo.
Ang Kaalam ug mga Tingog sa Kalibotan batok sa Kaalam sa Dios
Atong hisgotan ang mahitungod niining matahom nga gambalay ug ang kahoy nga padayong nagtubo lapos gayod niini. Ang arkitekto mahimo untang moingon nga ang kahoy nakababag—“Nagpugong kini sa proyekto nga gusto nakong himoon.” O ang tag-iya sa gambalay mahimo untang moingon nga, “Apan duna koy kuwarta—putla lang ning kahoya aron duna pay luna nga matukod ang gambalay.” Apan wala nila kini buhata. Hinoon, gipili nila nga i-adjust ang desinyo sa ilang gambalay aron makapadayon ang anaa nga kahoy.
Sa pagtan-aw niini gikan sa usa ka panglantaw sa ebanghelyo, dili kita mahimong mopili nga usabon ang mga baroganan sa ebanghelyo ug doktrina anaa nang daan sa mahangturon nga paagi—mga baroganan ug doktrina nga alang sa atong kaayohan. Sa pagkatinuod, kita “gawasnon sa pagpili” (2 Nephi 2:27) kon magpakabuhi ba kita nga magsubay sa ebanghelyo ni Jesukristo, apan dili kita makapili sa mga sangpotanan sa atong mga pagpili.
Hinumdoman nato unsay nahitabo kang Uzzah sa Daang Tugon:
“Gibutang ni Uzza ang iyang kamot sa arca sa Dios ug nakakupot siya niini; kay ang mga [b]aca nahapangdol.
“Ug ang kasuko sa Ginoo misila[o]b batok kang Uzza; ug ang Dios naglaglag kaniya didto tungod sa iyang say[o]p; ug didto namatay siya tupad sa arka sa Dios” (2 Samuel 6:6–7).
Sa paningkamot nga mapernanente ang arka, gipakita ni Uzza nga abi niya og mas nakahibalo siya kay sa Ginoo. Sa karon nga panahon nag-atobang kita og modernong mga Uzza, kinsa misulay sa pagtuy-od sa ilang mga kamot, og paggamit sa ilang kaalam, mga plano, o mga ideya aron ipahigayon ang ilang kaugalingon nga mga balaod imbis ang mga balaod sa Dios. Nagtuo sila nga mas nakahibalo sila kay sa Ginoo ug nagtinguha sa pag-agni kanato palayo sa eksaktong mga baroganan nga Iyang hinatag pinaagi sa Iyang balaan nga mga propeta. Tingali mosulay sila sa pagkombinser kanato nga mohimo lamang og mga pag-usab o mosuporta lamang og mga bahin sa ebanghelyo nga mohaom sa atong gimanggad nga estilo sa kinabuhi.
Apan ang Langitnong Amahan nagdapit kanato sa paghimo og mga kausaban sa atong kinabuhi sa pagsunod sa lunsay, mahangturon nga ebanghelyo ni Jesukristo. Tungod kay kon buhaton nato kini, Siya makapanalangin kanato.
Ang mga Panalangin sa Paghangop sa Kahingpitan sa Ebanghelyo ni Jesukristo
Sama sa gihulagway niini nga gambalay ug sa kahoy, kita makapili nga irespeto ang mga baroganan sa ebanghelyo nga anaa sa atong atobangan, sama sa arkitekto sa maong gambalay mipili nga irespeto ang kinaiyahan nga anaa sa iyang atobangan. Mahimo nato kini pinaagi sa pagpahiangay sa atong kinabuhi diha sa ebanghelyo ni Jesukristo ug dili ang ebanghelyo maoy i-adjust, nga modala kanato ngadto sa masakit nga mga sangpotanan, sama sa labihan ka alaot nga kasinatian ni Uzza. Kon kita mohinumdom nga dili kita “makasab[o]t sa tanan nga mga butang diin ang Ginoo mahimo nga makasab[o]t” (Mosiah 4:9) ug nga Siya “nakatugkad sa tanan nga mga butang” (Alma 26:35), masayod kita nga Siya mihatag kanato og mga sugo o mga direksiyon nga sundon alang sa atong kalipay, kasiguroan, ug, sa kataposan, mahangturon nga kaluwasan (tan-awa sa Doktrina ug mga Pakigsaad 82:8–9).
Kombinsido ako sa hingpit sa gahom sa kaalam sa atong Langitnong Amahan ug sa Iyang Anak, nga si Jesukristo—ug nga ang Ilang gahom ug mga panalangin atong maangkon kon kita motuman sa Ilang mga sugo nga Ilang gipasiugdahan alang sa atong kaayohan. Mianhi kita sa yuta aron makagamit og hugot nga pagtuo ug motuman sa Langitnong Amahan aron atong masinati ang walay kataposang kalipay ug kamaya ug makabalik Kaniya.
Nasayod ko nga ang Simbahan ni Jesukristo sa mga Santos sa Ulahing mga Adlaw mao ang tinuod nga dapit diin kita makakat-on nga mas mahimong sama sa atong Langitnong Amahan ug sa Iyang Anak, si Jesukristo, pinaagi sa pagsunod sa mga direksiyon sa modernong mga propeta—kay ang ilang mga direksiyon takos sa hugot nga pagtuo nga gihatag sa Manluluwas Mismo aron matabangan kita nga magiyahan sa atong panaw balik Kaniya.