Digital Lamang: Mga Young Adult
Ang Pagkagialagaran Nakatabang Kanako sa Pagpalawom sa Akong Pagsalig sa Ebanghelyo ni Jesukristo
Human ako mipasakop sa Simbahan, ang mga paningkamot sa pagpangalagad sa mga miyembro nahimong mas importante sama sa mga leksiyon uban sa mga misyonaryo.
Litrato nga mga modelo ang nagposing
Niadtong una akong mipasakop sa Simbahan, daghang bahin niini nakapalibog. Nasayod ako sa mahinungdanon nga mga baruganan sa ebanghelyo ni Jesukristo, nga gitudlo ngari kanako sa buotan nga mga misyonaryo, apan walay mitudlo kanako mahitungod sa orgnisasyon sa Simbahan. Ang korum sa mga elder, Relief Society, institute, ug daghan pang mga programa ug mga baroganan wala ko makahibalo. Nasayod lamang ako nga kinahanglan kong moadto sa simbahan ma-Domingo, magtuon sa mga kasulatan, ug mag-ampo.
Swerte ko, bisan pa man, nga nakaangkon og mga higala kinsa mitabang kanako sa pagmaneho sa akong sayo nga wala mahibaloi. Ang mga misyonaryo mipaila-ila kanako sa ebanghelyo, apan pinaagi kadto sa Kristohanong pagpangalagad gikan sa daghang miyembro ang nakapadayon kanako sa pagpalig-on sa akong pagpamatuod.
Aniay pipila ka mga tawo kinsa mipanalangin sa akong kinabuhi pinaagi sa ilang mga pagpaningkamot nga pagpangalagad.
1. Ang Pamilya Kinsa Mipalakip Kanako
Usa sa unang mga pamilya nga mihimo og impresyon kanako mao ang dugay na nga mga miyembro sa branch nga akong gitambongan duol sa akong panimalay sa Malaysia. Kon makakita sila kanako sa simbahan matag Domingo, ila kong abiabihon uban sa dakong mga pahiyom sa ilang mga nawong. Ila usab akong giubanan sa mga klase ug mipakita kanako asa adto ug bisan gani hapiton ko ug usahay drayban ko padulong sa simbahan. Sa katapusan misugod sila og dapit kanako nga manihapon usab sa ilang lugar. Kini nga pamilya mihangop gayod sa ebanghelyo sa ilang kinabuhi, ug ilang gipakita ang ilang debosyon ngadto kang Jesukristo pinaagi sa tinuod nga pag-atiman ug paghigugma alang kanako. Tungod sa ilang pagpangalagad, nahimo kaming suod nga managhigala, ug mibati ako og kahiusa og maayo uban sa branch ug daw kami usa ka dako nga pamilya.
2. Ang mga Young Adult Kinsa Anaa sa Susama nga mga Kahimtang
Nakadawat usab ako og daghang tabang ug suporta gikan sa ubang batan-ong single adult. Nasuod gyod ko sa kadaghanan kanila sayo sa akong pagkakabig tungod kay kadaghanan kanamo mao lamang ang mga miyembro sa Simbahan sa among mga pamilya. Sa among mga kahimtang, nagsalig kami sa usag usa alang sa pagsabot ug naghatag og luwas nga kadangpan alang sa matag usa. Kasagaran magkita kami alang sa mga pagsalo-salo ug mga kalihokan. Ang among pagpanag-uban, pagpakigbahin sa among gugma alang sa ebanghelyo, ug pag-abag sa usag usa nakatabang sa pagpalawom sa akong hugot nga pagtuo ug pagtan-aw sa unahan sa pipila sa sosyal nga aspeto sa simbahan.
3. Ang Managtiayon Kinsa Mihangop sa Pagpangalagad isip Labaw pa Nga Tawag
Ang mga paningkamot sa pagpangalagad sa usa ka magtiayon nakapahimo usab kanako nga mibati og daw ako adunay mga sakop sa pamilya sa Simbahan. Matinuoron akong mikonsiderar kanila nga akong mga apohan sa Simbahan—ila kong gitratar nga daw ila kong apo.
Dayag lang, sila ang mga tigtambag sa young adult sa district ug kini mao ang ilang calling sa pagpangalagad ngadto sa mga young adult, apan wala gayud nila gitratar ang ilang mga katungdanan nga usa ka yano nga calling. Lapas pa ang ilang gibuhat ug sobra pa aron sa pagpangita og mga kahigayonan sa pag-amoma kanato isip mga young adult. Kon ako o bisan kinsa nga young adult sa area nagkinahanglan og usa ka tawo nga ikaistorya, usa ka tawo nga mohatag kanamo og tambag, o bisan usa ka abaga lang nga kasandigan, kini nga magtiayon anaa gayod alang kanamo.
Usa ka partikular nga makatabang nga ehersisyo nga buhaton sa sister ngari nako sa wala pa ang akong misyon mao ang pagpabasa namo og usa ka kinatibuk-ang komperensiya sa matag adlaw ug ipakigbahin ang among mga hunahuna bahin niini. Amo kining gibuhat sulod sa mga bulan, hangtod sa adlaw nga mibiya na ko alang sa akong misyon. Ang mga adlaw ngadto sa serbisyo sa misyonaryo usahay makapaugtas ug lisod, apan nagtuo ko nga ang iyang pasensya ug kamatogtanon sa pagbuhat niini nga ehersisyo uban nako matag adlaw nakatabang nako kon hain na ko karon.
Ang Pagpangalagad Makahimo og Kalainan
Ang epektibo nga pagpangalagad makapausab sa kinabuhi sa usa ka tawo sa kahangturan—ako ang proweba niana—ilabi na kon matogtanon kita sa pagdawat og tabang. Sa ginaingon diha sa Alma 37:6, “Pinaagi sa gagmay ug yanong mga butang ang dagkong butang ipahinabo.” Ug tinuod kana. Ang ginagmay nga buhat sa serbisyo nga akong nadawat, sama nianang dapiton ko og panihapon niadtong mahigugmaon nga pamilya sa akong branch, nagdawat og suporta gikan sa ubang young adult, ug pagkaanaay kahigayonan sa pagbasa og mga pakigpulong sa komperensiya uban niadto nga sister, nakapahimo sa tanang kalainan. Ang pagpangalagad wala nagpasabot nga mahimong lisod; yano kini nga mga buhat sa gugma ug kamabination nga makapausab sa tuyok sa kinabuhi sa usa ka tawo ngadto sa 180 degrees.
Tungod sa kamauyonon niini nga mga miyembro sa pagtan-aw sa akong mga gikinahanglan ug pagpakita kanako og gugma, may igong suporta ako sa pagtukod sa akong pagpamatuod, ug nagserbisyo ako og usa ka misyon karon. Ang mga pulong ni Presidente Jean B. Bingham, Kinatibuk-ang Presidente sa Relief Society, mao ang tinuod: “Sa katap[o]san ang importante, ang tinuod nga pagpangalagad nabuhat sa tagsa-tagsa uban ang gugma isip ang hinungdan.”1 Ug ako nasayod nga samtang magsalig kita sa Espiritu sa paggiya kanato, makapangalagad kita sama sa gibuhat ni Kristo ug dad-on ang uban ngadto Kaniya.