“E Mafai Ona Fesoasoani le Atua ia i Tatou i Taimi Faigata,” Liahona,, Mat. 2022.
Mataupu Faavae o le Auaunaga
E Mafai e le Atua ona Fesoasoani ia i Tatou i Taimi Faigata
Ma e mafai ona tatou faaaogaina mea tatou te maua mai o tatou tofotofoga e fesoasoani ai i isi.
Atapue a le Getty Images
O Marcela Endrek, o se tagatanuu o Córdoba, Atenitina, sa ma‘i ma faanoanoa. Sa mamafatu ia te ia. I le lotolotoi o lagona sa leai se auala e aluese ai, sa ia faalogo ai i se lauga o le konafesi lea na saunoa e uiga i le tatalo. Sa oo sa‘o mai le manatu i lona loto e tatalo faatauanau e uiga i ona faafitauli.
Sa amata ona ia tatalo e le aunoa mo se toomaga. O le tatalo na aumaia ai lona filemu ma le mafanafana e ui lava e lei faaleleia lona soifua maloloina. O le mea moni, sa faateteleina le faaletonu o lona tulaga seia oo ina le toe mafai ona galue. O lea la ua ia maua le atuatuvale faaopoopo o le le mafai ona gafatia tupe faaalu mo togafitiga faafomai.
Ona o le tatau ai, sa amata ona ia sailiili pe faapefea ona ia taulimaina ona faafitauli o le soifua maloloina i se isi auala. Sa ia lagona le uunaiga e taulai atu i le suia o nisi o mausa o le taumafa ma sa faateia i le tele o le na fesoasoani. Sa matua faagaeetia lava lona toe malosi lea na amata ai ona ia suesue loloto i meaai paleni.
I se taimi mulimuli ane, sa ia feiloai ai i se tamaitai talavou e igoa ia Evelyn i le tulaga lava e tasi e pei ona sa i ai Marcela—ma‘i, faanoanoa, ma le naunautai mo ni tali. Na vaai Marcela ia te ia lava i lana uo fou. Sa ia faasoa mai nisi o mea sa ia aoaoina e uiga i filifiliga o meaai ma meaai paleni. Sa ia faasoa atu foi ia Evelyn lana molimau i le mana o le tatalo. Sa ia valaaulia Evelyn e tatalo ina ia ona lagonaina foi le alofa o le Atua ma iloa sa Ia silafia o ia.
I ni nai aso mulimuli ane, sa fiafia Marcela e toe vaai ia Evelyn. O se suiga ua manino faaletino ma faaleagaga. Sa faailoa atu e Evelyn ia te ia ua suia lona olaga ma ua mafai ona ia lagonaina le alofa o le Atua mo ia.
Mai ona tofotofoga ma luitau, na maua ai e Marcela le agaalofa ma faamatalaga sa ia manaomia e fesoasoani ai i isi.
Lavea’ia Ina Ia Mafai Ona Tatou Laveaiina
O Iosefa i Aikupito, saunia e Robert T. Barrett.
O le tala ia Iosefa i Aikupito o se isi lea faataitaiga o le mea e mafai ona tupu pe a tatou naunau e faalagolago i le Atua i o tatou tofotofoga: e le gata e mafai ona Ia laveaiina i tatou, ae e mafai ona Ia faatulagaina i tatou e faaaoga o tatou aafiaga e fesoasoani ai i isi (tagai i le Kenese 37–45)..
Sa naunau Iosefa e faalagolago i le Atua ma tausi Ana poloaiga e ui i le faalataina, leiloa, ma le faafalepuipuiina. Ona o le faatuatua o Iosefa i le Atua ma lona naunau e onosaia ona tofotofoga ma le onosai ma e aunoa ma le ita, “sa i ai Ieova ia Iosefa” (Kenese 39:21) ma tuu o ia i se tulaga e faamanuia ai le toatele (tagai i le Kenese 45:5–8).
Mataupu Faavae e Mafaufau i Ai
A o e mafaufau i ou avanoa e auauna atu ai i isi, mafaufau i nei mataupu faavae o loo faapupula mai i tala:
-
O o tatou luitau e mafai ona avea ma faamanuiaga. Afai o le a tatou “tatalo e le aunoa, ma talitonu” a o tatou feagai ma o tatou luitau, e mafai e le Tama Faalelagi ona liliu atu i latou i lo tatou lelei (tagai i le Mataupu Faavae ma Feagaiga 90:24; tagai foi i le Roma 8:28).
-
E mafai e o tatou luitau ona saunia i tatou. Afai o le a tatou agamalu i tofotofoga, e mafai e le Atua ona faaaoga o tatou aafiaga e aoao ai i tatou ma suia i tatou (tagai i le Mataupu Faavae ma Feagaiga 112:13).
-
O o tatou luitau e mafai ona avea ma avanoa e auauna atu ai. Afai tatou te naunau e faalagolago ia te Ia, o le a tuu i tatou e le Tama Faalelagi i tulaga e faaaoga ai mea ua tatou aoaoina i o tatou lava aafiaga e fesoasoani ai i isi (tagai Mosaea 24:13–14).
O Le a se Mea e Mafai ona Tatou Faia?
Tatalo ia iloa pe mafai faapefea e ou aafiaga ona fesoasoani ia te oe e faamanuia ai i latou e te auauna atu i ai. Ona aapa atu lea.