“Sa Faatasi le Alii ma Iosefa,” Liahona, Mat. 2022.
Sau, Mulimuli Mai ia te A’u
Sa I Ai Ieova ia Iosefa
A o tatou taamilo i tulaga maualuluga ma maualalo o le olaga, e tele mea e mafai ona tatou aoaoina mai le faataitaiga a le perofeta anamua o Iosefa.
O Iosefa o loo Faamatala Miti a Farao, saunia e Jean Adrien Guignet, Musée des Beaux-Arts, Rouen, Farani / Bridgeman Images
I ni nai tausaga ua mavae, sa fiafia lo matou aiga ina ua matou iloa o lo‘u toalua, o Terri, sa maitaga i le ma tama lona fa. Peitai, i ni nai masina o le maitaga, sa matou iloa ai sa i ai se tulaga matautia tau le soifuamaloloina o Terri. O le filifiliga sili ona saogalemu e mo ia ina ia taofia i le falemai, lea e mafai ai ona ia maua le tausiga faifai pea. Sa taofia o ia e malolo i se taumafaiga e faaauau le maitaga i le umi e mafai ai.
Na avea lenei mea ma se taimi pogisa ma faigata mo lo matou aiga, aemaise lava mo Terri. Sa ia lagonaina le tuuatoatasi. Ma sa luitauina au i le tausiga o se fanau laiti e toatolu a o ou galue ai i la‘u galuega ma auauna atu foi o se epikopo. Sa foliga fenumiai ma faigata le olaga.
I lona tuuatoatasi, na maua ai e Terri le mafanafana i upu o se viiga matagofie:
Ou te manaomia lava Oe.
Na o lou alofa e mou ai le fili?
O ai, se e pei o oe o lo’u tautai?
I mala i manū, Iesu, afio mai!1
Sa Faatasi le Alii ma i Matou
Mulimuli ane, sa manaomia le taotoga faanatinatii e laveai ai lo ma atalii o Jace. Ae sa tausia ma le saogalemu uma le tina ma le atalii ona sa i ai Terri i le falemai. Sa matou lagonaina le puipuiga a le Alii i o matou olaga.
Na vave ona fanau mai Jace i le fa vaiaso ma sa tuu i totonu o le iunite o le tausiga e mata’itu ai pepe fou faatoa fananau mai. Sa ma o mai i le fale e aunoa ma le ma pepe. I le aluga o le masina na sosoo ai, sa ma faia ai ni malaga i aso taitasi i le falemai. Sa foliga mai na taamilo le olaga i se tulaga maualalo.
Peitai, sa ma molimauina foi le aao o le Alii. Sa faasolo manuia Jace i le tulaga lea na mafai ai ona matou aumaia o ia i le fale, o se vaega maualuga a o matou faatasia o se aiga.
Ona matou iloa ai lea o Jace sa i ai se faaletonu o sooga o ponaivi, o se tulaga ua vave fesootai ai ponaivi o le atigipoo ae lei oo i le taimi e tatau ai. O le taunuuga, e le mafai ona tupu le ulu o se pepe. Na pau lava le togafitiga o le aveesea lea o se vaega tele o le atigipoo o Jace ina ua na o le tolu masina lona matua. Sa matou onosaia lenei luitau e ala i le tatalo ma faamanuiaga faaleperisitua. Na matou toe vaaia foi le aao o le Alii i o matou olaga. Sa tali mai talosaga. Na faataunuuina faamanuiaga. Sa manuia le taotoga. Sa toe oo foi le olaga i se tulaga maualuga.
Se malaga sa luga ma lalo! Ae sa aoaoina i matou e le Alii i le tele o lesona i lenei faigamalaga. Ua matou iloa sa faatasi o Ia ma i matou i le ala.
Sa I Ai Ia Iosefa Ona Tulaga Lelei ma Leaga
Na Faatau atu Iosefa i Aikupito, saunia e William Brassey Hole, © Look and Learn / Bridgeman Images
A o tatou suesue i le soifuaga o Iosefa i le Feagaiga Tuai, tatou te iloa ai o lona soifuaga foi, o se malaga mai mea maualuluga i le maualalalo ma toe foi atu ai i tulaga maualuluga o le olaga. Ma ua tatou aoao sa faatasi pea le Alii ma ia, i le lelei ma le leaga.
O le ofutele na tuuina atu e Iakopo ia Iosefa o se faatusa matagofie o le alofa o Iakopo mo Iosefa. Ae sa avea foi o se faamanatu le fiafia i uso o Iosefa e uiga i le sootaga i le va o Iosefa ma lona tama.
Ina ua o atu le au uso e fafaga ia lafu a lo latou tama, sa fai atu Iakopo ia Iosefa e alu e siaki i latou. Sa alu Iosefa e pei ona talosagaina ai. Peitai, e foliga mai na leiloa o ia i le ala. O lea na auina atu ai e le Alii se tagata e tuuina atu faatonuga ia Iosefa ina ia mafai ai ona ia maua ona uso (tagai i le Kenese 37:15–17).
Ina ua taupulepule uso o Iosefa e fasioti o ia, na foliga mai e sili atu nai lo o se mea na tupu i lea lava taimi i se karaveni lea faatoa pasi ane i le ala i Aikupito. Nai lo le fasiotia o Iosefa, pe tuua o ia e oti i se lua, sa faatau atu o ia e ona uso i le karaveni. (Tagai i le Kenese 37:25–28.)
Sa toe manino mai le taitaiga a le Alii ina ua faatau atu e le karaveni ia Iosefa ia Potifara, o se kapeteni o leoleo a Farao. E oo lava i le avea ai o se auauna, na liliuina e Iosefa aafiaga uma i se mea lelei. Na faia e Potifara ia Iosefa ma se e vaaia lona maota. Sa ia tuuina atu mea uma sa ia te ia i lima o Iosefa. (Tagai i le Kenese 39:4.) Sa malaga Iosefa mai se tulaga maualalo i se tulaga maualuga. Ua fiafia nei o ia i avanoa ma manuia o le maota o Potifara.
Ae peitai, o lenei manatu maualuga sa lei umi. Ina ua sola ese Iosefa mai taumafaiga le talafeagai a le ava a Potifara, sa ia tuuaia o ia i le ola le mama. E ui lava sa sese ana tuuaiga, sa faigofie lava ona fasiotia Iosefa. Nai lo lena, e ofoofogia sa na o le tuuina o ia i le falepuipui. Sa manino lelei sa toe faasaoina ia Iosefa e le Alii.
Faatuatua Ofoofogia
Ana faapea o oe lea na lafo ma le le tonu i le falepuipui, o le a se mea semanu e te faia? Afai e i ai se tagata na i ai se mafuaaga mo le lotovaivai ma le lototiga, o Iosefa lea. O le pau tele mai luga i le maualalo atonu na faigofie ai ona ia mafaufau, “O le a le aoga o le taumafai e auauna atu i le Atua? Na pau lava Lana mea lea e fai o le faasala o au.” Ae sa lei oona pe tuuaia e Iosefa le Alii, ma e lei fiu foi o ia. E lei i ai lava se taimi na tautevateva ai lona faatuatua ofoofogia.
Ma e oo lava i aso pogisa o le faafalepuipuiina, sa lei tuulafoaiina lava Iosefa e le Alii. Muamua, na saunia e le Alii se avanoa mo Iosefa e faaliliu ai miti a le fai meaai ma le tautu uaina (tagai i le Kenese 40). Ona oo lea i ni nai tausaga mulimuli ane, ina ua oo atu lena mea i le avanoa e faamatalatala ai le miti a Farao, sa faailoa atu ai e Iosefa o le tomai e faia ai lea mea na sau mai le Atua (tagai i le Kenese 41:16). E le gata ina sa toefuatai e Farao ia Iosefa, ae “sa ia faia foi o ia ma pule i le nuu uma o Aikupito” (Kenese 41:43). Ina ua mavae le puapuagatia o Iosefa ma tauiviga mo le tele o tausaga, sa mafai e le Atua ona avea Iosefa ma se tagata iloga i le laueleele, e lona lua ia Farao—o le isi itu maualuga i le olaga o Iosefa.
E Faia e le Atua mo lo Tatou Lelei
Na iu lava ina toe feiloai Iosefa i ona uso, o i latou sa taupulepule faasaga ia te ia ma faatau atu o ia e fai ma pologa. Semanu e sili atu ona ita o ia. Semanu na te tuuaia i latou mo le “faapito’au faaosolilivau” na latou faaoo atu ia te ia.2
Ae na iloa e Iosefa na vaavaaia e le Alii ia mea faigata ma le le manuia o lona olaga. O lana faamatalaga i ona uso ua aumaia ai se malamalamaaga loloto i lena malamalama:
“Ao outou, na fai togafiti e outou ia leaga ai au; ao le Atua na finagalo ia ia iu i le lelei, ina ia oo ina faaolaina le nuu e toatele.
“O lenei aua nei matatau outou: o au nei ou te tausi lava ia te outou, ma a outou fanau. Ona faamatalaloto mai lea o ia ia te i latou, ma tautala lelei mai ia te i latou” (Kenese 50:20–21).
A o tatou taamilo i tulaga maualuluga ma maualalo o le olaga, o se faamanatu sili lea, o le faauigaga a le Atua e mo lo tatou lelei. Sa faamalamalama mai e le Alii lea lava mataupu faavae e tasi i se Iosefa o aso e gata ai:
“Afai e valaauina oe e te ala atu i puapuaga; …
“Afai ua tuua‘ia oe i ituaiga o tuuaiga pepelo uma; afai e pauu mai ou fili i luga o oe; afai latou te vavaeese oe mai le mafutaga ma lou tama ma lou tina … ma toso atu oe i le falepuipui, …
“… Ia e iloa lo’u atalii e, o nei mea uma e te maua ai le poto masani, ma o le a avea mo ou lelei” (Mataupu Faavae ma Feagaiga 122:5–7).
Sa I Ai Pea Faigata
Ina ua ma feagai ma Terri ma o ma luitau, sa ma maua le mafanafana i lenei saunoaga mai se perofeta a le Atua:
“Ou te manao ia e iloa sa i ai lava ni faigata i le olaga faitino, ma o le a i ai pea lava. Ae o le iloaina o mea ua tatou iloa, ma le ola ai e pei ona tatau ona tatou ola ai, o le a leai ai lava se avanoa, leai se ‘alofaga, mo le lotovaivai ma le faanoanoa. …
“… O lea la ou te faamoemoe o le a outou le talitonu ua faupue uma atu faigata o le lalolagi i lo outou vaitau, pe faapea foi e lei leaga tele faapea le tulaga na i ai nai lo lo outou taimi, pe o le a le toe lelei lava. Ou te faamautinoa atu na sili atu foi ona leaga ma o le a agai pea foi ina lelei. O le a agai pea lava ina lelei—aemaise ai, pe a tatou ola ma alolofa i le talalelei a Iesu Keriso, ma tuu atu se avanoa e lauusiusi ai i o tatou olaga.”3
Mai le tala ia Iosefa ma mai mea le manuia na tutupu i le lalolagi o loo siomia ai i tatou, e faigofie lava le vaaia o mea leaga e tutupu i tagata lelei. O le ola amiotonu e le faapea o le a tatou aloese ai mai luitau ma faanoanoaga i o tatou olaga. Peitai, e pei lava ona sa faatasi le Alii ma Iosefa i ona puapuaga, o le a faatasi foi o Ia ma i tatou. O le a mautinoa lava le oo mai o tofotofoga. Ae afai tatou te oo i ai ma se naunautaiga e faalogo ia te Ia, o le a taiala ma musuia i tatou e le Alii, e pei lava ona sa ia faia ia Iosefa.