“Liliu Atu i le Atua ma i o Tatou Aiga,” Liahona, Mat. 2022.
Mo Matua
Liliu Atu i le Atua ma i o Tatou Aiga
Atapue mai le Getty Images
Matua Pelē,
E mafai ona tatou maua le fesoasoani a le Atua e onosaia ai tofotofoga ma taimi faigata i o tatou olaga. O lenei lomiga e mafai ona fesoasoani ia te oe e aoao ai lau fanau e uiga i le ala e mafai ai e le Alii ona laveai i tatou e pei lava ona Sa Ia faia ia i latou sa ola i taimi o le Feagaiga Tuai. E mafai foi ona e faaaogaina manatu o loo i lalo e fesoasoani ia te oe e amata ai talanoaga e uiga i auala e foia ai feteenaiga i o tatou aiga.
Talanoaga o le Talalelei
Faigata ma Puapuaga
Faitau le tusiga a Elder Christofferson i le itulau e 6 e uiga i faigata. O a ni auala, faatasi ai ma le fesoasoani a le Tama Faalelagi, e mafai ai ona tatou faatagaina faigata e faamamaina i tatou nai lo le faatoilaloina o i tatou? E mafai faapefea ona tatou auauna atu ia i latou o e o loo feagai ma faigata patino?
Faasaoina e ala i Tofotofoga
Faitau le tusitusiga a Elder Johnson o loo i le itulau e 44 e uiga ia Iosefa i Aikupito. Valaaulia lau fanau e faatino le tala e faaaoga ai toniga ma teuga. Ona talanoaina lea, e pei ona ta‘ua e Elder Johnson, le ala na faatasi ai le Atua ma Iosefa i taimi lelei ma taimi leaga. Na faapefea ona e vaaia le aao o le Atua i lou olaga i taimi o ou tofotofoga?
Foiaina o Feteenaiga
Faitau le tusiga e uiga i le foiaina o feteenaiga i le itulau 26. E mafai faapefea e tala mai tusitusiga paia ona aoaoina i tatou e uiga i le auala e foia ai feteenaiga i o tatou aiga? O le a se mea e mafai ona tatou faia o ni tagata taitoatasi ina ia avea ai ma e sili atu i le faatupuina o le filemu?
Lagolago mo leSau, Mulimuli Mai ia te A’u
Ina ia lagolagoina suesuega faalevaiaso a lou aiga o le Sau, Mulimuli Mai ia te A‘u i lenei masina, tagai i le itulau 48 mo se lisi o mea e tutusa ai Iosefa o Aikupito ma Iesu Keriso.
Sau, Mulimuli Mai ia te A’u Mea Faafiafia a le Aiga
Lanu o Lagona
Sa faamalamalama atu e le Alii ia Mose sa Ia vaai i puapuaga o le fanauga a Isaraelu, faafofogaina a latou tatalo, ma silafia o latou faanoanoaga (tagai Esoto 3:7).
-
Atofa atu i tagata taitoatasi se lagona e faavae i luga o le lanu o loo tele lo latou ofuina:
-
Samasama = fiafia
-
Lanumoana = faanoanoa
-
Lanumumu = ita
-
Lanumeamata = toafimalie
-
Lanumoli = fefe
-
Isi = fenumiai pe faateia
-
-
O le a faasoa mai e tagata taitoatasi se aafiaga patino i se taimi na latou lagonaina ai lena lagona.
-
E mafai ona tatou iloa pe o a lagona o tagata i o latou foliga vaaia po o mea o loo latou ofuina?
-
O ai e vaai i o tatou lagona uma, e aofia ai o tatou puapuaga ma faanoanoaga, e tusa lava pe le mafai e isi?
-
Sue mau o loo faaalia ai le ala e silafia ma malamalama ai Iesu Keriso ia i tatou.
Talanoaga: O a nisi o tofotofoga na tatou oo i ai? E mafai faapefea ona tatou iloa sa silafia i tatou e le Alii i na taimi?
Faatalitali mo Faamanuiaga
O le Kenese ma le Esoto o loo i ai le tele o folafolaga mai le Alii, faatasi ai ma tala o tagata o loo faatalitali ma le onosai i na folafolaga. Ua faatali Iakopo e vaai i le faamanuiaga o le avea ma se malo maoae. Ua faatali Iosefa mo le Alii e fesoasoani ia te ia e alu ese mai le falepuipui. Ua faatalitali le fanauga a Isaraelu ina ia faasaolotoina mai le puleaga a Aikupito.
-
Filifili se tagata se toatasi e avea ma taitai ma tuu atu i isi tagata uma e tutu i le isi itu o le potu.
-
A sii i luga e le taitai se lima, e laa atu tagata uma agai atu ia te ia. A tuu i lalo e le taitai le lima, ona taofi lea o tagata uma. Afai e maua se tasi o laa pe a tuu i lalo le lima o le taitai, e tatau i lena tagata ona alu i tua o le potu e toe amata.
-
O le tagata muamua e taunuu atu i le taitai e avea ma taitai mo le isi taaloga.
Talanoaga: Faitau faatasi le Mamona 8:22. A o e faitauina le Kenese ma tusi nei o le Feagaiga Tuai i lenei tausaga, ia matauina faapitoa folafolaga uma a le Alii ma pe a faataunuuina. Aisea e taua ai le iloa o folafolaga a le Alii i o tatou lava olaga ma faalagolago i le Alii a o tatou faatalitali i na folafolaga?