“Ua E Tuu Atoa Lou Tagata i Totonu,” Liahona, Mat. 2022.
Matutua ma le Faatuatua
Ua e Tuu Atoa Lou Tagata i Totonu
E tusa lava pe o lona uiga e tatau ona e “luluina oe lava ia,” o le auaunaga faafaifeautalai matutua o le a aumaia ia te oe le olioli.
Ata pue mai le faaaloaloga a le tusitala
I ni nai masina talu ona ma foi mai ma lo‘u toalua mai le auauna atu i se misiona agaalofa, sa amata ona ou toetomanatu. Aisea na matua anoa ai lava la ma misiona?
Pe a talosagaina i ma’ua e talanoa e uiga i o ma aafiaga, e pei o se afu o le agalelei e ufitia ai au ma toe aveina atu ai a’u e au i le taimi ma aafiaga sa matou fefaasoaa’i ai ma tagata matagofie o Lao.
Ou te manatua se pese malie sa masani ona matou usuina faatasi ma i latou. Ua faaigoaina “O Le Hokey Pokey,” ma o le fuaiupu mulimuli e aofia ai le fasifuaitau, “Ua e tuuina atoa oe i totonu, ma e luluina oe lava.” A matou usuina le pese, e fiafia tagata e aufaatasi ai. Latou te lulu ma sisiva, ona patipati lea o o latou lima i le fiafia.
Ou te manatu o lena pese e faateleina ai o ma lagona e uiga i la ma’ua misiona—sa ma tuuina o ma tagata atoa i le galuega a le Alii. E lei umi ae ma iloa le faamanuiaina o i ma’ua i lo ma aufaatasi atu i le aganuu a tagata Lao. I le avea ai ma faifeautalai mo galuega alofa, sa mafai ona ma fesoasoani ia i latou e ala i le aoaoina o le Igilisi. Sa matou talanoa, sisiva, ma faatolotolo atu lo ma ala i a matou vasega. Ae sa suamalie lo ma totogi. Sa ma iloa ai e pei lava ona ma alolofa ia i latou, sa latou alolofa mai foi ia i ma‘ua.
Na avea ma se taimi faapitoa o o ma olaga e mafai ona ma ta‘ua moni o o ma’ua lava. Sa faasusuluina ai o ma’ua tausaga faaauro. Sa ma faaaluina se olaga atoa e tausia ai le ma fanau, faigaluega mo mea e ola ai, faatauina o se fale, ma le faia o na mea uma e foliga mai e taua tele i le aluga o le ala. Ona oo mai lea o le litaea ma le fesili, “O le a la le ma mea e fai nei?”
O la‘u savali e faapea afai e te manao e saili sina fiafia tumau, alu atu ma fesoasoani i se tasi i le ala. O iina e sau ai le olioli moni—auaunaga. Ma o le mea e ofo ai, a o e foai atu, o loo faateleina foi lou malosi. Sa ma iloa ai o le toatele o tagata Laotia e lei tele ni meatotino faalelalolagi. Ae sa mauoa i latou i le olioli i le ola ai, o se olioli sa latou faasoa saoloto mai ia i ma’ua. Sa latou faateleina lo ma tomai e olioli ai.
Ata na tusia e Carolyn Vibbert
O lea, aua e te fefe e “tuu atoa oe lava i totonu,” e tusa lava pe o lona uiga e tatau ona e “luluina oe lava.” Pese ma sisiva ma se isi aganuu ma o le a e iloa ai foi o le a tafe i ou luga se afu o le agalelei. O se tasi lena o mealilo o le taumafaiga faafaifeautalai agaalofa—e te foai atu ma mauaina. Ou te faafetai i lo‘u Tama Faalelagi i aso uma ona sa faamanuiaina i ma’ua e avea ma se vaega o se avanoa matagofie, e faasalalau atu ai le agaga o le talalelei i o ma uso ma tuafafine i Lao.
E alala le tusitala i Iuta, ISA.