Ua Na’o Tusiga Faatekinolosi: Autalavou Matutua
O E Fetuunaia le Talalelei ina ia Fetaui ma Lou Olaga?
O se mamanu tulaga ese o se fale na fesoasoani ou te malamalama ai i le taua o le fetuunai o o tatou olaga ina ia fetaui ma le talalelei—ae le o le isi itu.
Sa ou vaai talu ai nei i se ata o se fale e le masani ai. I luma o le fale, sa i ai se laau tele sa manino lava le umi o le ola nai lo le fale sa i ai. I autafa o le fale, sa i ai ni vaega se lua o faapaologa sa i ai ni pu na tatipi i totonu e faataga ai lala o le laau e ui atu ai. Sa faaauau pea ona tupu le laau i autafa o le fale, faatasi ai ma lona ogalaau o loo tupu ae tonu lava i se pu i le taualuga.
A o ou tilotilo atu i lenei ata, sa ou matua mafaufau e uiga i le talalelei toefuataiina a lo tatou Alii o Iesu Keriso.
Sa ou mafaufau ai: Pe tatou te mananao e fetuunai o tatou olaga ina ia fetaui ma le talalelei, pe o tatou taumafai e fetuunai le talalelei ina ia fetaui ma o tatou olaga?
I le konafesi aoao ia Aperila 2021, na saunoa ai Elder Chi Hong (Sam) Wong o le Fitugafulu: “O le talalelei e le o se vaega o o tatou olaga, ae o lo tatou olaga o se vaega moni o le talalelei a Iesu Keriso. Mafaufau i ai. Pe le sa’o ea lena mea?”1
Ou te tali atu, e moni.
Ma o le malamalama i lenei lesona taua e mafai ona fesoasoani ia i tatou e aloese ai mai le lototiga i o tatou olaga atoa ma aoao ai ina ia liua atoatoa ma tuuto atu i le Alii ma Lana talalelei.
O le Poto ma Leo o le Lalolagi ma le Poto o le Atua
Sei o tatou talanoa e uiga i lenei fale manaia ma le laau lea na faaauau pea ona ola mai ai. Sa mafai ona faapea mai le tufuga faufale o loo faalavelave le laau i le ala—“O loo taofia ai le galuega faatino ou te manao e faataunuu.” Po o le fai mai o le pule o le fale, “Ae e i ai au tupe—na o le tipi lava i lalo o lenei laau ina ia i ai se avanoa e fausia ai le fale.” Ae leai. Nai lo lena, sa latou filifili e fetuunai la latou mamanu o le fale e faaofi ai pea le laau o loo i ai.
O le vaai atu i lenei mea mai se vaaiga faaletalalelei, e le mafai ai ona tatou filifili e suia mataupu ma aoaoga faavae autu o le talalelei uaa i ai e faavavau—mataupu ma aoaoga faavae autu e mo lo tatou manuia. Ioe, ua tatou “saoloto e filifili” (2 Nifae:27) pe o le a tatou ola e tusa ai ma le talalelei a Iesu Keriso, ae e le mafai ona tatou filifilia taunuuga o a tatou filifiliga.
Ia tatou manatua le mea na tupu ia Usa i le Feagaiga Tuai:
“Ona tago atu lea o Usa i le atolaau a le Atua, ua na taofia ai, ua taupau povi.
“Ona tupu ai lea o le toasa o Ieova ia Usa, ona fasia lea o ia e le Atua i lea lava mea ona o lona sese, i le, ua oti ai o ia i lea mea i tafatafa o le atolaau a le Atua” (2 Samuelu 6:6–7).
I le taumafai ai e faasa’o le atolaau, sa faaali atu ai e Usa sa ia manatu e sili atu lona iloa nai lo le Alii. O aso nei tatou te feagai ai ma Usa i ona po nei, o e taumafai e faaloaloa atu o latou lima, pe faaaoga lo latou atamai, lisi o mataupu e talanoaina, po o manatu e tuuina atu ai a latou lava tulafono nai lo tulafono a le Atua. Latou te talitonu e sili atu lo latou iloa nai lo le Alii ma saili e taitai ese i tatou mai mataupu faavae sa‘o na tuuina mai e Ia e ala mai i Ana perofeta paia. Atonu latou te taumafai e faatalitonu i tatou ia faia na o suiga po o vaega lagolago o le talalelei e fetaui ma o tatou ituaiga olaga lelei.
Ae ua valaaulia i tatou e le Tama Faalelagi e faia ni suiga i o tatou olaga e mulimuli ai i le talalelei mama, ma faavavau a Iesu Keriso. Aua a tatou faia, e mafai ona Ia faamanuiaina i tatou.
O Faamanuiaga o le Taliaina o le Atoatoa o le Talalelei a Iesu Keriso
E pei ona faapupula mai e lenei fale ma le laau, e mafai ona tatou filifili e faaaloalo i mataupu faavae o le talalelei sa i ai i o tatou luma, e pei lava ona filifilia e le tufuga o le fale e faaaloalogia le natura sa i ai i ona luma. Tatou te faia lenei mea e ala i le fetuunaia o o tatou olaga i le talalelei a Iesu Keriso ae le o le isi itu, lea e mafai ona taitai atu ai i tatou i taunuuga tiga, e pei o Usa na matua aafia ai lava. Pe a tatou manatua tatou te le “malamalama i mea uma e mafai ona malamalama i ai le Alii” (Mosaea 4:9) ma o Ia “ua malamalama i mea uma” (Alema 26:35), e mafai ona tatou iloa ua Ia tuuina mai ia i tatou poloaiga po o faatonuga e ola ai mo lo tatou fiafia, saogalemu, ma, mulimuli ane, o le faaolataga e faavavau (tagai Mataupu Faavae ma Feagaiga 82:8–9).
Ua faatalitonuina atoatoa a‘u i le mana ma le poto o lo tatou Tama Faalelagi ma Lona Alo, o Iesu Keriso—ma o lo La mana ma faamanuiaga e mafai ona avea mo tatou pe a tatou usiusitai i a Laua poloaiga ua La faatuina mo lo tatou lelei. Na tatou o mai iinei i le lalolagi e faatino le faatuatua ma usitai i le Tama Faalelagi ina ia mafai ona tatou maua le fiafia ma le olioli e faavavau ma toe foi atu ia te Ia.
Ou te iloa O Le Ekalesia a Iesu Keriso o le Au Paia o Aso e Gata Ai o le nofoaga moni lea e mafai ona tatou aoao ai ia avea atili e faapei o lo tatou Tama Faalelagi ma Lona Alo, o Iesu Keriso, e ala i le mulimuli i taitaiga a perofeta o aso nei—aua o a latou taitaiga e agavaa mo le faatuatua ma tuuina mai e le Faaola lava Ia e fesoasoani e taiala i tatou i la tatou malaga e toe foi atu ia te Ia.