Faalagolago Mai ia te A‘u

Saunia e Karla Knapp Oswald, Idaho, ISA

Ina ua ou faasoa atu a‘u fesili ma popolega i lo’u tama, sa ia ta‘u mai ia te a’u se mea ou te lei faagaloina lava.

Ata

tamaitai o loo tauina fugalaau

Ata na pueina e Richard M. Romney

A o ou laitiiti, ou te mulimuli lava i lou tama i la matou tamai faatoaga, tauanau atu e galulue faatasi ma ia, ma taumafai e fesoasoani ia te ia i le tele o ana galuega faatino. Sa ou fiafia e tietie i lana loli ma fesoasoani ia te ia e sui ia kia. Ou te manatuaina o ia a o ia faitau maia tala ia i matou o tamaiti ma ave i matou i tietiega taavale toso, malaga o fagotaga, ma tolauapiga. O le tietie solofanua ma Tama, aemaise lava i mauga, o le a avea pea ma se manatuaga faapitoa.

Ina ua ou amata i le aoga maualuga, sa amata ona ou mafaufau e uiga i mea sa aoaoina ai au e uiga i le talalelei. O mea na fai mai nisi o a‘u uo na fatuina ai ni fesili ma masalosaloga i lo’u mafaufau.

I se tasi po sa ou tu ai i lo matou potu malolo ma tilotilo atu i fafo o le matou faamalama tele i fetu. Sa leva le po, ma sa ou manatu ua o uma tagata e momoe. Ae na sau Tama i ou tafatafa, ma amata ona ma talanoa.

Sa ou ta‘u atu ia te ia a’u fesili ma popolega. I le tali mai i ai, sa molimau mai lou tama na ia iloa e moni le talalelei. Sa ma talanoa e uiga i le popole vale i “mealilo” ma le faavalevalea o lena mea. Sa ia fai mai e tatau ona ou faia ni a‘u lava faaiuga ma e ono alu ai sina taimi mo a’u. Ona ia tau mai lea ia te au se mea ou te lei faagaloina lava. Fai mai a i ai ni a‘u fesili po o ni atugaluga, e mafai ona ou faalagolago atu i lona faatuatua ma lana molimau.

Sa ou alofa i lo‘u tama ma iloa o le a ia le taitai seseina lava a’u pe ta‘u mai ia te a’u se mea e le moni. Afai sa ia lagona le mautinoa e uiga i mea sa ia talitonu i ai, sa ou iloa e mafai ona ou faatuatuaina o ia.

O le mea lea sa ou faia.

I le aluga o o‘u tausaga faigaluega, ina ua ou aafia i le tele o manatu, teori, faiga o le olaga, ma talitonuga na luitauina ai a’u, sa ou tilotilo atu i lo‘u tama ma faalagolago atu i ai. I le aluga o o‘u tausaga o se avā ma se tina, a o tofotofoina e aafiaga lo’u faatuatua, sa ou vaai atu i lo‘u tama ma faalagolago atu i ai. E oo lava i le taimi nei, a o ou mafaufau i tulaga o i ai nei i le lalolagi, ou te vaai atu i lo‘u tama ma faalagolago i ai.

E masani ona ou mafaufau i lena po ua leva ma la‘u talanoaga ma Tama. Ou te mafaufau po o le a se eseesega semanu e i ai lo‘u olaga e aunoa ma lana faamautinoaga toafimalie ma se faataitaiga tumau.

I le avea ai ma teineitiiti, ou te lei manao lava mo mea e manaomia o le olaga. Sa tausia a‘u e o’u matua lelei. Ae mai mea uma na tuuina mai e o‘u matua ia te a’u, ou te matua faafetai lava mo tulaga faatauaina na la aoaoina ai a‘u, o le faavae mausali i le talalelei na la tuuina mai ia te a’u, ma le olaga faigofie, ma le faataitaiga na la taitaia.

Ou te faafetai foi sa i ai Tama iina mo au e faalagolago i ai—e le faatasi ae o taimi uma. Sa avea o Ia ma o se faataitaiga sili o mea e sili ona taua. O lo‘u tamā o la’u toa lea.