Saunia mo A‘u Matafaioi i le Lumanai o le Tane ma le Tama

Saunia e Christopher Bingham

E alala le tusitala i Iuta, ISA.

I le avea ai ma se tagata matua nofofua, o loo ou ola i le asō e faamalosi lo‘u aiga i le lumanai.

I le popofou o lo’u talavou, sa ou auai i se tolauapiga mo aoaoga faaleautaitai a le autalavou. I le aluga o le vaiaso, sa maua ai e se tasi o o‘u taitai o Alii Talavou, o Bryan Thelin, ni faamatalaga se tele na tusia e lona faletua, o Julie, sa ia nanaina i ana meatotino. Sa ia faasoa mai nisi o na manatu agaalofa ma faatupu faatuatua ia i matou. Sa faagaeetia au ma sa mafai ona ou lagonaina le alofa o le faatinoga faigofie ma le alofa a lona toalua na faia i le la faaipoipoga. E ui lava e lei i ai faatasi faaletino Bryan ma Julie i lena vaiaso, ae sa faamalosia le la faaipoipoga.

Mulimuli ane i le avea ai ma se faifeautalai i Atenitina, sa ou matauina ai se ulugalii faaipoipo i se tasi o a‘u eria sa faatumulia i le alofa o Keriso. O taimi uma lava ou te vaaia faatasi ai i laua e toalua, sa la faasusulu atu le agalelei. Sa mafai ona ou lagonaina le tele o lo la popole e le gata mo le tasi ma le isi ae faapena foi i tagata uma sa la feiloai i ai. Sa ou lagonaina lo la faamaoni ia te au i taimi taitasi matou te talanoa ai. Sa ou manao e faaalu se taimi tele matou te faatasi ai ona o le alofa o Keriso lea na susulu mai ia i laua.

O faataitaiga e pei o nei ulugalii e toalua ua faamanuiaina ai lo‘u olaga. Na latou fesoasoani ia te au ia iloa le auala e mafai ai ona ou faamalosia sa‘u lava faaipoipoga ma se aiga i le lumanai.

O Se Faamaumauga o Uunaiga mai le Agaga

Ua ou tulimatai atu ma le naunautai i le aso e mafai ai ona ou fausia se faaipoipoga malosi. Peitai, ua ou matauina o le avea ai ma se tagata matua nofofua, e le manaomia ona ou faatali seiloga ua ou faaipoipo e vaavaai ai mo ma aoao ni auala e fesoasoani ai e saunia mo a‘u matafaioi i le lumanai o se tane ma se tama.

“E mafai ona e aoaoina mea taua i mea e te faalogo ma vaai i ai, aemaise lava i mea e te lagonaina, e pei ona uunaia ai e le Agaga Paia,” na aoao mai ai Elder Richard G. Scott (1928–2015) o le Korama a Aposetolo e Toasefululua.

Na ia faaauau: “Tusi i se mea e malupuipuia, ia mea taua ua e aoaoina mai le Agaga. O le a e iloaina a o e tusia musumusuga taua, e masani ona tele isi musumusuga e oo mai.”¹

O uunaiga e fesoasoani e faamalosia lo‘u aiga ua o mai ia te a’u i taimi eseese. O nisi taimi ou te lagonaina ai nei uunaiga a o ou molimauina ni faataitaiga lelei i lo’u olaga. O isi taimi sa ou lagonaina se uunaiga a o faalogologo i se lauga po o le suesueina o tusitusiga paia. E mafai e i tatou taitoatasi ona maua uunaiga i le tele o ala eseese.

Pe a ou maua se uunaiga pe faalogo i se manatu e uiga i se mea e mafai ona ou faia, ou te tusia i se api. Mo se faataitaiga, e tasi la‘u api o tusigamanatu ou te faatumuina i manatu e fesoasoani ai e faamalolosia le faatuatua o tamaiti, ma e i ai se isi a’u api o tusigamanatu e i ai manatu e fesoasoani e faamalosia ai la‘u faaipoipoga. Ou te fiafia e fatu nei api e fai ma pepa o faamatalaga i luga o le initoneti ina ia mafai ai ona ou faaaogaina mai la‘u telefoni i soo se taimi ma soo se mea, ae o lenei faiga e mafai foi ona faia i api e tusi ai faamatalaga faaletino. O nei faaputuga o manatu ua avea ma se faamanuiaga ia te au a o ou taumafai e saunia mo nei matafaioi i le lumanai.

Faataitaiga o Api o Tusigamanatu

Na faasoa mai e Peresitene Jean B. Bingham, Peresitene Aoao o le Aualofa, e faapea “o le matafaioi aupito taua a se matua o le fesoasoani lea i a latou fanau e fesootai ma le lagi, ia atiina ae le polokalama o le tulaga faatauaina o le talalelei lea o le a fesoasoani e taula ai i latou i luitau o o latou olaga.”² O lea la, i se tasi o a‘u api, ou te tusia ai manatu e fesoasoani ai e taula la’u fanau i le lumanai i se faavae o le faatuatua i le Tama Faalelagi ma Iesu Keriso. O nisi o nei manatu e aofia ai foi tu masani ou te manao e fatufatu e fesoasoani ia i matou e faalolotoina ai molimau. O lenei api e aofia ai manatu faapenei:

Faaalu le lima minute i aso taitasi ma lau fanau e fesoasoani ai ia i latou e tusi i lalo faamanuiaga mai le Tama Faalelagi latou te faafetai ai. O lenei gaoioiga e mafai ona tuufaatasi ma suesuega faaleaiga o tusitusiga paia.
Afai e te fesili atu i lou alo faatoa savali po o ai le perofeta ae latou te le mautinoa, tautau i le potu ata o le perofeta mai le mekasini o le Uo ia mafai ona feagai tonu ma la latou vaai.
Fai soo ni malaga i le malumalu e fai papatisoga mo e ua maliliu pe a lava le matutua o lau fanau; ia i ai se valaaulia tatala mo tuaoi ma uo e auai pe a tusa ai ma le mamao. O se tu masani manaia e potopoto faatasi i aso malolo o le Kerisimasi o le sueina faatasi lea o igoa o le aiga ma ave i le malumalu.
Afai e i ai sau tama o loo sauni e auauna atu i se misiona, fai atu ia i latou e tusi ni tusi patino o molimau i o latou tei ao lei amataina la latou misiona.
Mo aso fanau, tuu atu i tagata o le aiga ma malo e tusi i lalo uiga latou te faamemelo i ai po o se aafiaga na latou maua ma le tagata fai aso fanau. A uma ona faitau faatasi ia manatuaga ma faatasi ai ma le faatagaga a i latou na aafia ai, uta i luga se kopi o pepa i le vaega o Manatuaga o le faamaumauga o le Gafa o le Aiga a le tagata i le FamilySearch.org mo le mauaina mulimuli ane po o le taimi latou te manaomia ai.

O loo i ai ni manatu e le mafaitaulia, ma a o e sailia le taitaiga faalelagi, o le a uunaia oe ia iloa mea e tusifaamaumau a o e saunia mo lou aiga i le lumanai.

O le isi faataitaiga o le tusigamanatu o le tusifaamaumau lea o manatu mo le fatuina o se siosiomaga e i ai le Agaga. O le fesoasoani i tamaiti e aoao ia iloa uunaiga a le Agaga Paia e matua taua lava. Na aoao mai Peresitene Russell M. Nelson: “A o siomia ai i tatou e faigata, e manaomia ona tatou fatuina nofoaga ia tatou te saogalemu ai, i le faaletino ma le faaleagaga. A oo ina avea lou fale ma se malutaga o le faatuatua—lea e afio ai le Agaga—e avea lou fale ma laina muamua lava o le puipuiga.”³

Mafaufau i le siosiomaga o le talalelei e te manao e atinae. E mafai e i tatou taitoatasi ona taulai atu ma le loto i ai i le fausiaina o se aiga o loo i ai le Agaga. E le manaomia ona ou faaipoipo e amata ai ona fatuina lenei ituaiga o siosiomaga. O se avanoa ofoofogia le fausia o se aiga e valaaulia ai le Agaga. E mafai e i tatou taitoatasi ona faaaoga lo tatou faitalia e faafailele ai se siosiomaga e faatotonugalemu i le talalelei. E mafai ona tatou tusifaamaumauina manatu e fatu ai lenei siosiomaga, ma e mafai ona tatou faatinoina i le asō.

Ia Saunia e Maua Musumusuga ona Faatino Lea

Ina ua maua e Iosefa Samita ma Sini Rikitone le faaaliga vaaia o tikeri e tolu o le mamalu, sa poloaiina faatolu i laua e tusi “a‘o i ai [i laua] i le Agaga” (Mataupu Faavae ma Feagaiga 76:28, 80, 113). O le tusifaamaumauina o uunaiga faaleagaga i lenei auala ua faamanuiaina ai lo‘u olaga. O le tusia o uunaiga i le taimi tonu lava tatou maua ai e fesoasoani e faasaoina ai le manino o le savali. E faasaoina ai foi le savali mo le faasoa atu i isi i le lumanai. A tatou tusia i lalo nei uunaiga, tatou te molimau atu i le Tama Faalelagi tatou te popole e uiga i uunaiga ua tatou maua ma ua tatou naunau e maua nisi. E faamalosia lenei mea a o tatou faatinoina uunaiga e mafai ona faatinoina i le taimi nei.

O nei faatinoga faamoemoeina i aso nei o loo fesoasoani e faamalosia ai lo‘u aiga i le lumanai. Ua faamanuiaina a‘u i le tuufaatasia o uunaiga o auala e mafai ona ou saunia lelei ai e faamalosia la’u faaipoipoga i le lumanai ma faamalosia le faatuatua o la‘u fanau i le lumanai. Ou te valaaulia outou ia mafaufau i ni auala e mafai ona e saunia ai mo lau matafaioi o se toalua ma se matua. A tatou faia lea mea, ou te iloa o le a taialaina i tatou e le Tama Faalelagi ma Iesu Keriso i a tatou taumafaiga amiotonu.